4
1 Jonkaa haala Samuwiila yottake Israa'iila fuu.No Filistiya'en kooƴiri Keesuwal Laamɗo
Israa'iilankooɓe njehi faa kawra e Filistiyankooɓe faa ɓe kaɓa. Ɓe ndaaki nokkuure wi'eteende Ebeneser, Filistiya'en du ndaaki faro Afek.a 2 Filistiya'en orunduri yimɓe, cegilii faa kawra e Israa'iila'en. Nde wolde nde yaajunoo ndeen, Filistiya'en jaalake Israa'iila'en mbari worɓe hono ujunaaje nayo to nokkuure wolde toon. 3 Nde yimɓe Israa'iila ngartunoo ndaaka muɓɓen ndeen, mawɓe Israa'iila'en mbi'i:
— Ko waɗi Joomiraaɗo acci Filistiya'en njaalii min hannden? Accee kooƴen Keesuwal Amaana Joomiraaɗo gonngal nokkuure Siilo faa ngal wara hakkunde meeɗen, ngal danna en e baawɗe wayɓe en.
4 Ndelle yimɓe njehi Siilo, ɓe kooƴowi Keesuwal Amaana Joomiraaɗo Jom Baawɗe fuu, gonɗo dow keruba'en. Ɓiɓɓe Eli worɓe, Hofni e Pinahas, ɗowti Keesuwal Amaana Laamɗo ngaal. 5 Wakkati nde Keesuwal Amaana Joomiraaɗo ngaal warunoo ley ndaaka oon, Israa'iila'en fuu ƴeewnii semmbe faa leydi dimmbii. 6 Nde Filistiyankooɓe nannoo duko ƴeewnaako ngoon fu, ɓe mbi'i:
— Ɗume ƴeewnetee ley ndaaka Ibraninkooɓe?
Ndeen ɓe paami Keesuwal Joomiraaɗo waddaama ley ndaaka Israa'iila'en. 7 De Filistiya'en kuli, sabo ɓe miilii wo alla'en ngari ley ndaaka kaan.
Ɓe mbi'i:
— Halkere woodanii en, sabo abada hono ɗum waɗaay! 8 Halkere woodanii en! Moy waawi dannude en e juuɗe alla'en semmbeeɓe? Alla'en ɓeen mbardi Misirankooɓe nyawuuji daaɓooji keewɗi ley ladde. 9 Hey yimɓe Filistiya, cemmbinee ɓerɗe mon, laatoɗon worɓe! Si wanaa noon fu, on laatoto maccuɓe Ibraninkooɓe, hono no ɓe laatorii maccuɓe mooɗon noon. Ndelle laatee worɓe kaɓeɗon!
10 Ndelle Filistiya'en kaɓi e Israa'iila'en faa njaalii ɗum'en, mono fuu doggiri hukum muuɗum. Yimɓe waraaɓe na keewi sanne, sabo haɓeteeɓe Israa'iila ujunaaje capanɗe tato caami toon. 11 Keesuwal Laamɗo hooƴaama, ɓiɓɓe Eli worɓe Hofni e Pinahas du maayii.
Maayde Eli
12 Gorko jeyaaɗo e lenyol Benyamin doggi ƴuuri wolde toon, wari to Siilo nyannde ndeen, kaddule muuɗum na ceekii, kusaw na woni dow hoore muuɗum. 13 Nde o warnoo ndeen, tawi Eli na jooɗii joonnde muuɗum ɗakkol laawol ina taykoo, ɓernde muuɗum ina diwnana Keesuwal Laamɗo. Jonkaa gorko oon wari ley ngalluure faa haala ɗum, yimɓe ngalluure ndeen fuu mbulli. 14 Nde Eli nannoo wullaango ngoon ndeen ƴami:
— Ɗume woni bullaali ɗi?
Ndeen gorko oon wari law, holli Eli. 15 Tawi Eli waɗii duuɓi capanɗe jeenay e jeetati, gite muuɗum du cuddinii faa waawaa yi'ude. 16 Gorko oon wi'i Eli:
— Miin wo mi garɗo ƴuurɗo wolde. Goonga, mi doggii toon hannden.
Eli ƴami mo:
— Noy ɗum laatorii ɓiɗɗo am?
17 Gorko oon jaabii mo, wi'i:
— Israa'iila doggii Filistiya'en, yimɓe heewɓe du mbaraama, ɓiɓɓe maa worɓe Hofni e Pinahas maayii, Keesuwal Laamɗo du hooƴaama.
18 Nde o haalnoo haala Keesuwal Laamɗo ndeen, Eli boɓɓorii gaɗa e jooɗorgal ngaal ɗakkol dammbugal ngalluure, daande muuɗum heli. O maayi, sabo o naywii, imo teddi du. Ndelle o sarake Israa'iila faa waɗi duuɓi capanɗe nay. 19 Tawi esiiko debbo dee Pinahas wo reedu faa ɓadii rimde. Nde nannoo kabaaru Keesuwal Laamɗo hooƴaama, wooɗi esum gorko e gorum du fuu maayii ndeen, hofii, rimi, de naawalla ndimu nguun soƴƴii e muuɗum. 20 Wakkati nde o maayannoo ndeen, rewɓe wonduɓe e makko ɓeen mbi'i mo:
— Taa hulu, sabo a rimii gorko.
Kaa o nootaaki, o taykaaki. 21 O inniri cukalel ngel «Ikabot», o holli «Teddeengal dillii Israa'iila». O wi'iri noon sabo ko Keesuwal Laamɗo hooƴaa e ko esiiko gorko e goriiko maayi ɗuum. 22 O wi'i:
— Teddeengal dilli Israa'iila, sabo Keesuwal Laamɗo hooƴaama.