Haalaaji Daawda cakitiiɗi
23
1 Inan haalaaji Daawda cakitiiɗi,haalaaji Daawda ɓii Yesa,
konngol gorko mo Laamɗo toowni,
mo Laamɗo Yaakuuba waɗi kaananke,
jimoowo jimi belɗi jeyaaɗo Israa'iila.
Kettindanee mo:
2 — Ruuhu Joomiraaɗo kaaldirammi,
konngol makko ina woni dow ɗemngal.
3 Laamɗo Israa'iila haalii,
tefaare Israa'iila ndeen haalanii kam, wi'i:
— Nde kaananke laamorii yimɓe laaɓal,
nde o laamorii ɓe ley kulol Laamɗo fu,
4 Imo wa'i hono pooyngol puɗal naange e dow beetee mo walaa duule,
imo wa'i hono jayngol gaɗa ƴuwoonde
fuɗinoowol huɗo dow leydi.
5 Nii lenyol am du worri e Laamɗo.
O waɗanii kam amaana tabitoowo faa abada,
ponnditaaɗo, deenaaɗo faa wooɗi.
Ndelle imo hisini kam e dow huunde fuu,
Anniyaaji am lobbi fuu,
imo wuurna ɗi, imo mawnina ɗi.
6 Ammaa ɓolɓe fuu na nanndi e gi'e paɗɗeteeɗe,
ɗe neɗɗo waawaa hooƴude e junngo.
7 Meemoowo gi'e fuu, sey nawtoro sawru njamndi naa cenngal labbo.
Ɗe fuu ɗe mbulete to ɗe mbaali ɗoon.
Sordaasiiɓe Daawda suusuɓe
8 Inan inɗe worɓe Daawda jom'en semmbe: Yoseb-Baasebet Hakmoniijo woni hooreejo worɓe tato ɓurɓe fuu suusude. Wo kanko dimmbi labbo dow worɓe keme njeetato fu nde wootere.
9 Jokkuɗo e makko wo Eliyasar ɓii Dodo Ahohiijo. Kanko du wo o gooto hakkunde tato ɓurɓe fuu suusude ɓeen. Imo wondunoo e Daawda nde ɓe njiɗunoo haɓude e Filistiyankooɓe. Wakkati oon worɓe Israa'iila na njeccoo e haɓo ngo. 10 Ammaa Eliyasar ummii darii ɗoon, fiyi Filistiyankooɓe faa junngo muuɗum ronki, ngo takkii e labbo mum. Nyannde ndeen Joomiraaɗo waddi jaalagol manngol. Sordaasiiɓe Israa'iila doggunooɓe ɓeen coƴƴii to makko faa kooƴa jawdi maayɓe tan.
11 Tataɓo maɓɓe wo Samma ɓii Aagi Harariijo. Tawi Filistiyankooɓe kawritii saabe wolde to Lehi. Na woodunoo toon ngesa keewnga iri nyebbe. Jamaa Israa'iilankooɓe ndoggi Filistiyankooɓe. 12 De Samma kaa darii hakkunde ngesa ngaan, reeni nga, fiyi Filistiyankooɓe ɓeen. Joomiraaɗo waddii jaalagol manngol.
13 Wakkati tayri, Filistiyankooɓe woɓɓe na ndaaka ley Naɗɗol Refayim. Tato hakkunde hooreeɓe capanɗe tato ɓeen ngari to Daawda to lohol Adulam. 14 Daawda na woni ley nokku muuɗum deenorɗo, kawrital sordaasiiɓe Filistiyankooɓe du na ngoni Baytilaama. 15 Ɗomka nanngi Daawda, de wi'i:
— Hay! Si mi heɓii ndiyam ɓunndu wonndu dammbugal Baytilaama fu, mi yaran koy!
16 Ndelle tato suusuɓe ɓeen naati hakkunde ndaaka Filistiyankooɓe, nyeɗi ndiyam ɓunndu ɗaam to dammbugal Baytilaama, ngaddani Daawda. Daawda kaa salii yarude ɗam, rufi ɗam ɗam laatoo dokkal saabe Joomiraaɗo. 17 O du'ii, o wi'i:
— Joomiraaɗo haɗam yarude ndiyam ɗam! Yalla mi yaran ƴiiƴam worɓe yahuɓe faa parritii nguurndam muɓɓen naa?
Ndelle o jaɓaay yarude ɗam. Ɗum ɗo woni ko tato suusuɓe ɓeen ngaɗi.
18 Abisay sakiike Yo'ap ɓii Seruya wonnoo ardiiɗo hooreeɓe capanɗe tato ɓeen. Won nyannde gomma nde o faɗɗi labbo makko dow sordaasiiɓe keme tato, o wari ɓe fuu. Ndeen o wurtodii e innde ɗakkol tato ɓurɓe fuu suusude ɓeen. 19 O heɓii teddeengal faa ɓuri tato suusuɓe ɓeen. Si goonga o laatake ardiiɗo maɓɓe fay si o limaaka hakkunde maɓɓe.
20 Benaya ɓii Yehoyada du wo sordaasiijo cuusuɗo ƴuuruɗo Kafsiilu, golluɗo kujje mawɗe feere-feere. Wo kanko wari Mo'abinkooɓe ɗiɗo ɓurɓe waawude wolde. Nyalaande feereere du o haɓdi e rawaandu ladde. Iri marmalluuje hono nguufo na ndufa e leydi. Fay e ɗuum fuu, o jokkiti ndu ley ngayka, o wari ndu. 21 Kanko du fiyi Misirankeejo kalahaldiijo faa maayi. Misirankeejo oon na tiigii labbo, de kanko kaa, sawru tan o wondi. Ndelle Benaya ɓattitii mo, teeti labbo e junngo makko de wardi mo ngo. 22 Ɗum woni ko Benaya ɓii Yehoyada waɗi. Innde makko sankitii hono inɗe tato suusuɓe ɓeen. 23 Teddeengal makko faltake teddeengal capanɗe tato suusuɓe, de hewtaay teddeengal tato ɓeen. Daawda du waɗi mo hooreejo reenooɓe ɗum.
24 Wooɗi, inan inɗe sordaasiiɓe hakkunde capanɗe tato ɓeen:
Asahel sakiike Yo'ap, Elkaana ɓii Dodo mo Baytilaama, 25 Samma mo Harot, Elika mo Harot, 26 Heles mo Palti, Ira ɓii Ikkes mo Tekowa, 27 Abiyeser mo Anatot, Mebunnay mo Husat, 28 Salmon mo Ahoha, Maharay mo Netoofa, 29 Helep ɓii Baana mo Netoofa, Ittay ɓii Ribay mo Gibeya ley leydi Benyamin, 30 Benaya mo Piraton, Hidday ƴuuruɗo gooruuji Ga'as, 31 Abi-Albon mo Araba, Asamawet mo Bahurim, 32 Eliyaba mo Sa'albon, ɓiɓɓe Yasen, Yonatan 33 ɓii Samma mo Harari, Ahiyam ɓii Sarar mo Harar, 34 Elifelet ɓii Ahasbay mo Maaka, Eliyam ɓii Ahitofel mo Gilo, 35 Hesiro mo Karmel, Pa'aray mo Arbi, 36 Igal ɓii Natan mo Sooba, Baani Gadiyankeejo, 37 Selek mo Amon, Naharay mo Beerot, tiigiiɗo kaɓitirɗe Yo'ap ɓii Seruya, 38 Ira mo Itiri, Garem mo Itiri, 39 Uriya Hittiyankeejo.
Limgal joomiraaɓe semmbe ɓeen wo capanɗe tato e njeɗɗo.