Jimol Daawda Yettoore
22
1 Inan jimol ngol Daawda yimanii Joomiraaɗo wakkati Joomiraaɗo hisini mo e juuɗe wayɓe makko e junngo Sawulu. O yimi o wi'i:2 — Joomiraaɗo woni tefaare am,
wo suuɗorde am to ndeenotoomi,
wo kisinoowo kam.
3 Laamɗo am wo tefaare am to moolotoomi,
wo wawaade am,
wo kisinoowo kam jom semmbe.
Kanko woni ndeenaagu am to cuuɗotoomi.
Aɗa hisina kam e jom'en nyanngere.
4 Miɗo nodda Joomiraaɗo,
jeyɗo maneede oon,
de o danna kam e wayɓe am.
5 Bempeƴƴe maayde mburwake dow am,
diyeele halkere njoolii kam.
6 Ɓoggi laakara njiɓake kam,
tuugi maayde kaɓɓii kam.
7 Mi noddii Joomiraaɗo ley torra am,
wo Laamɗo am noddumi.
O nootii kam ley suudu makko seniindu,
o nani bojji am.
8 De adunaaru dimmbii, diwni.
Joƴƴinirɗi kammu du ndiwni.
Ɗi ndiwnii saabe tikkere Laamɗo mawnde.
9 Curki wurtii e hinere makko,
yiite nyaamoowe wurtii e hunnduko makko,
ƴulɓe kuɓɓooɗe njalti e makko.
10 O seeki kammu, o jippii,
duule ɓaleeje na ngoni ley koyɗe makko.
11 O waɗɗii dow bippeele keruba'en, o fiiri,
o fiiri dow bippeele henndu.
12 O suuɗii ley nimre,
o fiiliraa duule ɓaleeje keewɗe ndiyam.
13 Maƴƴere ɗelkoore na ƴuura e makko.
14 Joomiraaɗo riggii e ley kammu,
Laamɗo toowɗo ƴepti daande mum.
15 O fiɗi kure makko,
o sankiti wayɓe makko,
o maƴƴi dow maɓɓe, o dillini ɓe.
16 Leydi njooɗiindi faa ley maayooji ɓanginaa,
joƴƴinirɗi adunaaru cudditaa,
saabe daliili felɓugol Joomiraaɗo,
saabe henndu wifooru e hinere mum.
17 Laamɗo mo kammu oo liwƴii
de nanngi kam,
wurtini kam e diyeele lugguɗe.
18 O danni kam e ganyo am cemmbiɗinɗo,
e konneeɓe am ɓurɓe kam baawɗe.
19 Ɓeen ukkii e am ley nyalaande torra am.
Ammaa Joomiraaɗo laatii tuugorgal am.
20 O yaari kam to ɓillaare walaa,
o hisini kam,
sabo o korsinɗo kam.
21 O barjitii laaɓal am,
o barkini kam fodde e laaɓal juuɗe am.
22 Sabo mi jokkii laabi Joomiraaɗo,
mi wosaaki balangol Laamɗo dartiingol.
23 Jamirooje makko fuu yeeso am ngoni,
mi luttaay ko o yamiri fuu.
24 Mi laatake dartiiɗo yeeso makko,
mi reeni ɓernde am e hakkeeji.
25 Nii waɗi de o barjitii fonnditaare am,
o barkini laaɓal am.
26 Joomiraaɗo, aɗa holla hoolnaare to hoolniiɓe,
mo walaa feloore du,
aɗa holla ɗum laaɓal maa.
27 Wo a laaɓuɗo to laaɓuɓe,
aɗa ɓuri oonyiiɓe ƴoyre.
28 Aɗa danna leeƴuɓe,
de aɗa leeƴina mawnitiiɓe.
29 Yaa Joomiraaɗo, aan woni jayngol am,
Aɗa waylita nimre am e annoora.
30 Wo saabe maa aan Joomiraaɗo, miɗo huccita e orol sordaasiiɓe,
saabe maa miɗo waawi diwude kokuwol.
31 Laamɗo le, laawol muuɗum wo kiɓɓungol,
konngol Joomiraaɗo na hoolnii.
Imo laatii wawaade moolotooɓe e makko fuu.
32 Joomiraaɗo kam tan woni Laamɗo,
kam tan woni tefaare.
33 Laamɗo oon wo deenoowo kam jom semmbe,
o fonnditanii kam laawol kiɓɓungol.
34 Imo hoyna koyɗe am hono ɗe lewla,
imo darna kam dow nokkuuje toowɗe.
35 Imo ekintina juuɗe am wolde,
faa mi fooɗa ɓaaru alhan.
36 Aɗa hokka kam wawaade hisinoore kam,
hinney maa dow am na mawnina kam.
37 Aɗa yaajina laawol am ngol ndewammi,
kolɓule am ndimmbataako.
38 Mi riiwii wayɓe kam, mi halkii ɓe,
mi yeccaaki faa ɓe timmi.
39 Mi niisii ɓe fos, ɓe ummataako katin,
ɓe caamii ley koyɗe am.
40 A ɓornii kam semmbe saabe wolde,
A waɗii faa konneeɓe am kippoo yeeso am.
41 A dogginii wayɓe kam yeeso am,
de kalkumi ɓe.
42 Ɓe nyaagake ballal,
de balloowo ɓe walaa.
Ɓe noddii Joomiraaɗo de o jaabaaki ɓe.
43 Mi niisii ɓe faa ɓe ɗaati,
mi yaaɓii dow maɓɓe faa ɓe nanndi hono loopal dow laawol.
44 A dannii kam e muurtereeji yimɓe am,
a heddii kam e hoorewaaku leyɗe ɗuuɗɗe.
Fay yimɓe ɓe anndaano kam na ɗowtanoo kam.
45 Jananɓe na turoo yeeso am ley kulol,
nde nani kabaaru am fu, ɗowtanto kam.
46 Ɓerɗe maɓɓe na taaya kulol,
iɓe mburtoroo cuuɗi maɓɓe deenooji diwngol.
47 Joomiraaɗo wo buurɗo!
Jettooje ngoodanii mo, laatiiɗo tefaare am ndeen!
Miɗo mana Laamɗo, tefaare hisinoore kam.
48 Kam woni Laamɗo jomnitantooɗo kam,
kam waɗi leyɗe ɗowtanii kam,
49 wurtini kam e baawɗe wayɓe kam.
Aan Joomiraaɗo waɗi faa njaaliimi wayɓe kam ɓeen,
a dannii kam e jom'en nyanngere.
50 Ndelle Joomiraaɗo miɗo yette hakkunde leyɗe,
miɗo yimana innde maa e yettoore.
51 Imo hokka kaananke makko jaalogal manngal,
Imo holla cuɓaaɗo makko njinngu koolniingu,
miin Daawda e lenyol am faa abada.