No Daawda yomnitorii Gibiyonkooɓe
21
1 Ley jamaanu Daawda du, rafo waɗiino. Nde ngo waɗunoo duuɓi tati ndeen, Daawda wari yeeso Joomiraaɗo, ƴami daliili rafo ngoon. Joomiraaɗo jaabii mo:— Rafo ngo warii sabo Sawulu e lenyol mum ndufii ƴiiƴam. Ɓe mbarii Gibiyonkooɓe.
2 Tawi Gibiyonkooɓe njeyaaka e lenyi Israa'iila. Wo hakkunde Amorinkooɓe ɓe ƴuuri. Israa'iila'en ngaddunoo ɓe amaana jam. Ammaa Sawulu muuyiino halkude ɓe, sabo imo yiɗi Israa'iila e Yahuuda tan keddoo. Wooɗi, ndelle kaananke Daawda noddi Gibiyonkooɓe haaldi e maɓɓe, 3 ƴami ɓe:
— Ɗume ngaɗanammi on? Noy ittirammi hakke mo ngaɗaɗon oon, faa ɗum barkina yimɓe Joomiraaɗo?
4 Gibiyonkooɓe njaabii mo mbi'i:
— Huunde hakkunde amin e saare Sawulu ndeen moƴƴinirtaake cardi naa kaŋŋe, wooɗi du, min kaanaa warude goɗɗo ley Israa'iila du.
Daawda ƴami:
— Ɗume njiɗɗon mi waɗana on?
5 Ɓe njaabii, ɓe mbi'i:
— Sawulu muuyiino halkude min faa taa goɗɗo e lenyol amin heddoo ley Israa'iila abada. 6 Ndelle hokku min worɓe njeɗɗo ley ƴuwdi makko faa min mbara ɓe yeeso Joomiraaɗo faa Gibeya, ngalluure Sawulu, cuɓaaɗo Joomiraaɗo.
Daawda wi'i:
— Mi hokkan on ɓe.
7 Daawda heddi Mefiboset ɓii Yonatan saabe daliili hunayeere hakkunde Daawda e Yonatan nde ɓe kunii (kuninoo) yeeso Joomiraaɗo ndeen. 8 Kaa o hooƴi ɓiɓɓe ɓe Sawulu rimdi e Rispa ɓii Aya ɓeen. Ɗum wo Armoni e Mefiboset (tokara ɓii Yonatan oon). O hooƴi du ɓiɓɓe njoyo ɓe Meerap ɓii Sawulu debbo rimani Adiriyel ɓii Barsilay mo Mehola. 9 Wo kamɓe kaananke watti e ley juuɗe Gibiyonkooɓe. Ɓeen mbari ɓe (de ɗisi ɓalli maɓɓe) dow waamnde Joomiraaɗo seniinde toon. Ɓe njeɗɗo fuu ɓe maaydi nyalaande wootere. Wo ɗum wakkati mo tayri gese (nannduɗe e alkama) fuɗɗata.
10 Rispa, inna ɗiɗo maɓɓe oon, o hooƴi bootooru, o weƴƴiti ndu dow tefaare ɗoon. O jooɗii ɗoon illa fuɗɗoode tayri ndiin (lewru Awiril) faa ƴuwoonde wari toɓi dow ɓalli ɗiin. Nyalooma fuu o haɗa pooli jippaade e majji. Jemma du fuu imo riiwa kulle ladde. 11 Daawda nanii ko Rispa nattaaɗo Sawulu-no oon gollirani waraaɓe ɓeen. 12 De o yehi to mawɓe wuro Yabes ley leydi Galaad faa o jaɓowa ƴi'e Sawulu e ɓiyum Yonatan. Sabo nyannde Filistiyankooɓe mbarunoo Sawulu e Yonatan dow waamnde Gilbo'a ndeen, ɓe ɗisii ɓalli muɓɓen to taliyaare ley wuro maɓɓe wi'eteengo Bet-San. Sakitii worɓe Yabes ɓeen kooƴi ɓalli ɗiin e ley cuncukka. 13 Daawda adi ƴi'e Sawulu e ɓiyum Yonatan to wuro ngoon. O adi ƴi'e ɓilaaɓe njeɗɗo ɓeen du. 14 Daawda yamiri ƴi'e Sawulu e Yonatan ɗeen njaaree faa wuro Seela ley leydi Benyamin. Ɓe uwi ɗe toon ley saabeere Kis, baaba Sawulu. Ɓe ngaɗi ko Daawda yamiri fuu. Caggal ɗuum Laamɗo jaɓi du'aawuuji, rafo ngoon ƴuwi e leydi Israa'iila.
Haala Bolwole hakkunde Daawda e Filistiya'en
15 Wooɗi, Filistiya'en puɗɗiti wolde e Israa'iila'en. Daawda e worɓe mum njehi kaɓi e maɓɓe faa Daawda ronki. 16 Ndeen Filistiyankeejo gooto wi'i waran Daawda. Innde makko wo Isbi-Benop, ƴuurɗo e lenyol Rafaa. Hunnduko labbo makko wo alhan, teddeefi maggo wo kilooji tati e feccere. Imo woodi kaafaahi kesi du. 17 Ammaa Abisay ɓii Seruya wari, hisini Daawda. O fiyi Filistiyankeejo oon, o wari ɗum. Ndeen sordaasiiɓe Daawda njamiri Daawda hunanoo ɓe wurtadataako e maɓɓe faa haɓowee. Ɓe mbi'i, «Si aan a halkii, ɗum laatoto hono lampal Israa'iila nyifii.»
18 Caggal ɗuum wolde e Filistiya'en ɓeen fuɗɗiti wuro Gop. Wakkati oon Sibecay Husatiijo wari neɗɗo ƴuuruɗo e lenyol Rafa bi'eteeɗo Saf.
19 Ina woodi wolde wonnde e Filistiya'en to wuro Gop. Wakkati oon, Elhanan ɓii Ya'ir mo Baytilaama wari minyiraawo Goliyat jeyaaɗo Gaat. Cenngal labbo mum nanndi e leggal canyorgal.
20 Katin du na woodunoo wolde wuro Gaat. Gorko toowɗo na woni toon, juuɗe muuɗum e koyɗe muuɗum fuu na ngoodi kolli jeegom jeegom. Kanko du wo o ƴuuruɗo e lenyol Rafa. 21 O toonyorii Israa'iila'en haalaaji mawnitaare. Ammaa Yonatan ɓii Samma, mawno Daawda, wari mo. 22 Nayo ɓeen fuu ƴuwii e Rafa mo wuro Gaat. Daawda e sordaasiiɓe muuɗum mbari ɓe.