Muurtere Seba
20
1 Hakkunde worɓe ɓeen ɗoon na woodunoo gorko jaasuɗo gomma bi'eteeɗo Seba ɓii Bikiri, jeyaaɗo lenyol Benyamin. O fuufi luwal, o wi'i,— Min ngalaa ngeɗu to Daawda.
Min ngalaa ndongu to ɓii Yesa oon.
Ndelle Israa'iila'en, mono fuu hoota hukum muuɗum!
2 Nii worɓe Israa'iila fuu toowtiri Daawda, njokki Seba ɓii Bikiri oon. Ammaa worɓe Yahuuda takkii kaananke muɓɓen, njokki ɗum gilla Urdun faa yehi Urusaliima.
3 Nde Daawda wartunoo wuro mum Urusaliima ndeen, hooƴi nattaaɓe sappo ɓe yoppunoo faa ndooma wuro ɓeen, de dammbi ɓe ley suudu wonndu doomaandu. O wuurni ɓe toon, ammaa o waldaa e maɓɓe katin. Iɓe mbuuri hono wo ɓe maayraaɓe goriraaɓe muɓɓen. Ɓe ndammbii toon faa nyannde maayde maɓɓe. 4 Kaananke wi'i Amasa:
— Noddanaa kam worɓe Yahuuda ɓe ngara to am, ɗo e balɗe tati. Ngardaa e maɓɓe.
5 Ndelle Amasa yehi faa nodda worɓe Yahuuda, ammaa o ɓooyi faa ɓuri wakkati mo kaananke yamiri mo. 6 Ndeen Daawda wi'i Abisay:
— Joonin Seba ɓii Bikiri oon waɗan en bonnde ɓurnde nde Absalom waɗunoo. Hooƴu maccuɓe am de ndiiwaa mo taa o heɓana hoore makko galluuje deeneteeɗe, de o waɗa en ko boni.
7 Ndelle Abisay hooƴi worɓe Yo'ap, kamɓe e Karti'en e Peleti'en e worɓe suusuɓe fuu. Ɓe mburtii Urusaliima faa ɓe ndiiwa Seba ɓii Bikiri oon.
8 Nde ɓe ngonnoo to hayre mawnde wonnde wuro Gibiyon ndeen, Amasa hewti ɓe. Yo'ap ina ɓornii saaya sordaasiijo, na haɓɓi kaɓɓorgol dow makka. Ingol wondi e kaafaahi ngonduki e hulgo. Nde Yo'ap ɓadinoo Amasa ndeen, yeebii kaafaahi kiin soortii e hulgo mum. 9 Yo'ap wi'i Amasa:
— Noy sakiike am, aɗa reenii naa?
Ndeen o nanngi waare Amasa e junngo makko nyaamo faa o muccoo ɗum. 10 Ammaa Amasa taykaaki kaafaahi ngonki e junngo Yo'ap nano. Wakkati oon Yo'ap yuwi mo reedu faa teketti makko njoorii e leydi. Nii Amasa maayri, walaa ko o yuwa ɗum ɗiɗaɓerde.
Ndeen Yo'ap e sakiike mum Abisay ndiiwi Seba ɓii Bikiri oon.
11 Gooto e yimɓe Yo'ap darii ɗakkol ɓanndu Amasa, wi'i:
— Jiɗɗo Yo'ap e jiɗɗo Daawda fu, jokka Yo'ap. 12 Amasa ina waalii ɗoon ina ɓoyloo ley ƴiiƴam mum hakkunde laawol. Neɗɗo kaaldoowo e yimɓe oon ndaarii yimɓe fuu na ndarii ɗoon. Ndelle, o adi ɓanndu Amasa dow laawol, o yaari ndu to ngesa, o suddi ndu kaddungal. 13 Caggal ko Amasa adaa e laawol ɗuum, worɓe ɓeen fuu paltii, njokki Yo'ap faa ɓe ndiiwa Seba ɓii Bikiri oon.
14 Yo'ap rewi ley lenyi Israa'iila fuu e leydi Berim du faa hewti Abel-Bet-Maaka. Yimɓe Berim du kawriti njokki mo faa e ngalluure ndeen. 15 Yo'ap e sordaasiiɓe mum fuu ngari piilii wuro Abel-Bet-Maaka taa fay gooto wurtoo. Ɓe teli leydi e kokuwol ngalluure ngool faa ɓe ƴeeŋa, ɓe naata ley toon. Yimɓe wonduɓe e Yo'ap fuu na tappa kokuwol ngool faa caamdina ngol. 16 Ina woodi debbo jom hakkillo gomma e wuro ngoon, feekii, noddi e kokuwol ngalluure, wi'i:
— Kettindee! Kettindee! Kollee Yo'ap wara ga faa mi haalda e muuɗum.
17 Ndeen Yo'ap ɓattitii. Debbo oon ƴami mo wi'i:
— Yalla aan woni Yo'ap naa?
O wi'i, «Miin noon». Debbo oon wi'i:
— Hettinda haala am, miin korɗo maa.
O wi'i imo hettindii.
18 Ndeen debbo oon wi'i:
— Illa ko ɓooyi yimɓe na mbi'annoo, «Na kaani filaade tindinooje to Abel.» Si ɗe keɓaama fu, timmii. 19 Ngalluure amin nde laatake jam e hoolnaare. Aan kaa, aɗa yiɗi halkude ngalluure laatiinde inna ley Israa'iila. Ko waɗi aɗa yiɗi moɗude ndongu Joomiraaɗo? 20 Yo'ap jaabii wi'i:
— Abada koy! Abada mi moɗataa, mi halkataa fay huunde! 21 Ɗum wanaa goonga. Ko laatii dey, gorko bi'eteeɗo Seba ɓii Bikiri jeyaaɗo baamle Efrayim ummanake, muurtani kaananke Daawda. Mburtinee mo, kanko tan, ndeen mi dillan ngalluure mon.
Debbo oon wi'i Yo'ap:
— Wooɗi, a faɗɗante hoore makko dow kokuwol.
22 Ndeen debbo oon yehi to yimɓe wuro ɓeen, haaliri hakkillo. De ɓe taƴi hoore Seba ɓii Bikiri oon, ɓe paɗɗi nde to Yo'ap. Ndeen Yo'ap fuufi luwal faa yimɓe muuɗum mburtii ngalluure ndeen, mono fuu hooti wuro mum. Yo'ap du yeccii Urusaliima to kaananke.
23 Yo'ap wo hooreejo sordaasiiɓe Israa'iila fuu. Benaya ɓii Yehoyada wo hooreejo Karti'en e Peleti'en (reenooɓe kaananke). 24 Mawɗo dow golleeji tilsinaaɗi du wo Adoram. Kayboowo dewte kabaaruuji wo Yoosafat ɓii Ahilut. 25 Binndoowo goɗɗo wo Sewa. Almaami'en wo Sadok e Abiyatar. 26 Ira Ya'iriijo du wo almaami saabe Daawda.