No Daawda tindiniri Suleymaana
2
1 Nde Daawda ɓadinoo maayude fuu, noddi ɓiyum Suleymaana, tindini ɗum, wi'i:2 — Dillugol am adunaaru ndu ɓadake. Semmbinɗin ɓernde maaɗa, njaha yaadu gorko. 3 Ngaɗaa muuyɗe Laamɗo Joomiraaɗo maaɗa, njokka laabi muuɗum, ɗowtanoɗaa jamirooje muuɗum, ndewaa sariyaaji e seedaakuuji muuɗum e ko winnda ley Tawreeta Muusaa fuu. Ndeen a heɓan barke ley golle maaɗa e ley laabi maaɗa fuu. 4 Joomiraaɗo yottinan aadi muuɗum mo fodaninoo kam nde wi'unoo kam: «Si ƴuwdi maaɗa hakkilani laawol am, si ɓe mbuurdii yeeso am e laaɓal ɓerɗe e yonkiiji maɓɓe fu, abada a hunngataako loomtoowo ma dow jooɗorgal laamu Israa'iila.»
5 Faa hannden, aɗa anndi ko Yo'ab ɓii Seruya waɗi kam, no wardi Abineer ɓii Neer e Amaasa ɓii Yeter hooreeɓe sordaasiiɓe Israa'iila. O warii ɓe, o rufii ƴiiƴam maɓɓe hono ley wolde de wo ɗum wakkati jam. Noon o tuuniniri kaɓɓorgol makko e paɗe makko ƴiiƴam. 6 Ndelle aan Suleymaana, hakkillo maaɗa anndinte ko ngaɗataa, de taa acca hoore makko rawna de o naata ley nokkuure maayɓe e jam. 7 Ammaa ɓiɓɓe Barjilay jeyaaɗo Galaad oon kaa, ngaɗanaa ɗum'en ko wooɗi. Acca ɓe ngonda e nyaamdooɓe e maaɗa. Sabo hono noon kamɓe du ɓe mballirnoo kam nyannde ndoggunoomi mawna Absalom. 8 Faa hannden, taa yeggitin Simi ɓii Geraa Benyaminkeejo ƴuwoo Bahurim. Kanko huɗi kam kuddi cattundi nyannde njahannoomi Mahanayim. Nde ngartannoomi du, o jakkitake kam ɗakkol maayo Urdun. Wakkati oon kunaniimi mo yeeso Joomiraaɗo mi wardataa mo kaafaahi. 9 Ndelle joonin, taa accu o hisa jukkungo. Wo a gorko jom hakkillo, a annditan ko o haani waɗeede faa taa hoore makko rawna de o naata ley nokkuure maayɓe e jam.
10 Ndeen Daawda dilli adunaaru, hawritowi e maamiraaɓe muuɗum. Ɓe mooɓi mo ley wuro Urusaliima wi'eteengo Galluure Daawda. 11 Duuɓi 40 Daawda laamorii dow Israa'iila: duuɓi jeɗɗi o laamorii ley Heberon, ley Urusaliima du, duuɓi 33.
No Suleymaana doomiri baawɗe muuɗum
12 Suleymaana jooɗii dow jooɗorgal laamu bammum Daawda. Laamu muuɗum tabitiri semmbe.
13 Nyannde gomma Adoniya ɓii Haagita wari to Bati-Seba inna Suleymaana. Bati-Seba ƴami mo wi'i:
— Kori jam waddi ma?
Adoniya jaabii wi'i:
— Ayyo, jam tan.
14 O wi'i:
— Won ko kaajaami haaldude e maaɗa.
Bati-Seba jaabii wi'i:
— Haalu.
15 O wi'i:
— Aɗa anndi wo miin jeynoo laamu, yimɓe Israa'iila fuu na ndaardannoo kam mi kaananke muɓɓen. Ammaa ɗum waylitake; sakiike am Suleymaana laamake sabo wo kanko Joomiraaɗo fodanii ɗum. 16 Joonin kaa miɗo woodi ŋaarnde wootere to maaɗa, taa calanoɗaa kam ɗum.
— Miɗo ŋaare, kaalda e kaananke Suleymaana, sabo salantaako ma, mbi'aa ɗum hokka kam Abiisaga faa laatoo jom suudu am.
18 Bati-Seba jaabii wi'i:
— Wooɗi, mi yottinan kaananke ŋaarnde maaɗa.
19 Ndeen Bati-Seba ummii yehi to kaananke faa haalana ɗum ko Adoniya ŋaari ɗuum. Nde o yottinoo fu, kaananke ummii jakkitii mo, leeƴinii, de yecci jooɗii dow jooɗorgal muuɗum laamu. O waɗi jooɗorgal laamu gonngal wadda, inniiko jooɗii dow ngaal gere nyaamo makko. 20 Nde jooɗinoo fu, wi'i mo:
— Miɗo yiɗi nyaagaade ma huunde famarde, de taa calanoɗaa kam.
Kaananke jaabii wi'i:
— Inna, ŋaaroɗaa kam ɗum. Mi salantaako ma.
21 Ndeen inniiko wi'i:
— Accu Abiisaga laatoo jom suudu sakiike maaɗa Adoniya.
22 Suleymaana jaabii innam wi'i:
— Ɗume mbi'uɗaa? Aɗa suusi ŋaaraade kam mi hokka Adoniya Abiisaga? Ndelle ŋaarana mo du, o laatoo kaananke, sabo wo o mawnam. Ŋaarana mo baawɗe, kanko e yimɓe jokkuɓe mo, almaami Abiyatar e Yo'ab ɓii Seruya!
23 Caggal ɗuum kaananke Suleymaana huni yeeso Joomiraaɗo, wi'i:
— Laamɗo jukkoroo kam torra mawɗo si mi ittaay yonki Adoniya saabe ŋaarnde muuɗum nde. 24 Mi hunorake Joomiraaɗo buurɗo, tabintinɗo kam dow jooɗorgal laamu baaba am Daawda, kokkuɗo kam lenyol hono no fodorinoo, hannden pay yonki Adoniya ittetee!
25 Suleymaana neli Benaya ɓii Yehoyada yehi waroy Adoniya.
26 Kaananke wi'i almaami Abiyatar:
— Doggu, yahu ngesa maaɗa faa Anatot sabo wo a jeyɗo wareede. Ammaa a warataake hannden sabo a ronndakeno Keesuwal Amaana Joomiraaɗo wakkati baaba am Daawda, wooɗi du a torrodakeno e makko.
27 Noon Suleymaana wurtiniri Abiyatar e golle almaamaaku Joomiraaɗo. Ko o wurtini Abiyatar ɗuum tabintinii konngol Joomiraaɗo ngol haalunoo dow kiita lenyol Eli, almaami mawɗo mo wuro Silo.a
28 Kabaaru oon yottii Yo'ab. Tawi Yo'ab, waldaano e Absalom ammaa na wondunoo e Adoniya. Ndelle o doggiri Hukum Joomiraaɗo, o nanngowi luwe hirsirde, o mooli. 29 Kaananke Suleymaana humpitaa Yo'ab doggii moolowake hukum Joomiraaɗo, na woni ɗakkol hirsirde.
Suleymaana neli Benaya wi'i ɗum:
— Yahu, waroy mo.
30 Benaya yehi hukum Joomiraaɗo toon de wi'i mo:
— Kaananke wi'i mburtoɗaa.
Ammaa Yo'ab jaabii wi'i:
— A'aa, ɗo maayammi.
— Ngaɗaa no o wi'iri, mbaraa mo toon de uwaa mo. Hono noon ittirtaa hakke ƴiiƴam ɗam o rufi dow ɓolum ɗaam dow am e dow suudu baaba am. 32 Joomiraaɗo wartiran ƴiiƴam makko dow hoore makko, sabo o wardiino worɓe ɗiɗo kaafaahi, ɓurɓe mo fonnditaare e wooɗude, tawi baaba am Daawda faamaay. O warii Abineer ɓii Neer, hooreejo sordaasiiɓe Israa'iila, e Amaasa ɓii Yeter, hooreejo sordaasiiɓe Yahuuda. 33 Ndelle ƴiiƴam maɓɓe wartan dow hoore makko, kanko e ƴuwdi makko faa abada. Ammaa Daawda e ƴuwdim e suudum e laamu muuɗum keɓan jam ƴuuruɗo to Joomiraaɗo faa abada.
34 Benaya yehi tappowi Yo'ab, wari ɗum, de uwi ɗum ley suudu muuɗum wonndu ladde toon. 35 Kaananke waɗi Benaya ɓii Yehoyada oon loomta Yo'ab e hawjaade sordaasiiɓe, almaami Sadok du, loomta Abiyatar.
36 Caggal ɗuum kaananke nelani Simi wi'i ɗum:
— Nyiɓa suudu maa ley Urusaliima, njooɗoɗaa ɗoon. Taa njalta njaha nokku goɗɗo. 37 Sabo nyannde mburtiɗaa wuro ngo de peƴƴuɗaa gooruwol Kidiron fu, laamna a maayan. Ƴiiƴam maa wartan dow hoore maaɗa.
38 Simi jaabii kaananke wi'i:
— Ko mbiiɗaa ɗum na wooɗi. Aan joomam kaananke, no njamirɗaa kam fuu, noon ngaɗammi.
Simi jooɗii ley Urusaliima faa ɓooyi. 39 Ammaa caggal duuɓi tati, maccuɓe makko ɗiɗo ndoggi mo, njehi to Aakiisi ɓii Ma'aka kaananke Gaat. Nde Simi humpitanoo ɗum fu, 40 ummii hirkini araawa muuɗum, de yehi leydi Gaat to Aakiisi faa filowoo maccuɓe muuɗum. Nde o yiitoynoo ɓe fu, o wartiri ɓe Urusaliima. 41 Suleymaana faamina Simi wurtakeno Urusaliima yehi Gaat faa warti. 42 Kaananke nelani Simi, wi'i ɗum:
— Wanaa mi waɗiino kunoɗaa yeeso Joomiraaɗo, mi sappaniino ma taa mburtoɗaa wuro ngo, sabo nyannde mburtiɗaa ngo fu, a maayan. Aan du njaabiɗaa kam mbiiɗaa na wooɗi, a faamii. 43 Ko saabi de a ɗowtanaaki hunayeere nde kuninoɗaa yeeso Joomiraaɗo ndeen?
44 Aɗa anndi ley ɓernde maaɗa bonandaaji ɗi ngaɗunoɗaa baaba am Daawda. Ndelle Joomiraaɗo wartiran bonanda oon fuu dow hoore maaɗa. 45 Ammaa miin kaananke, mi heɓan barke to makko, laamu Daawda tabitan yeeso Joomiraaɗo faa abada.
46 Ndeen Kaananke yamiri Benaya, yehi waroyi Simi. Nii laamu tabitiri e junngo Suleymaana.