No Suleymaana ŋaarorii Joomiraaɗo hakkillo
(2 Kabaaruuji 1:3-13)
3
1 Kaananke Suleymaana esondiri e Fira'awna kaananke Misira. Dewgal ngaal laati amaana hakkunde maɓɓe. O hooƴi ɓii Fira'awna debbo oon, o yaari ɗum Urusaliima ley Galluure Daawda fadde makko e timminde suudu makko laamordu e suudu Joomiraaɗo e kokuwol piiliingol Urusaliima. 2 Wakkati oon tawi ɓe nyiɓanaayno Innde Joomiraaɗo suudu tafon. Ndelle yimɓe na kirsanno kirsamaaji muɓɓen dow kirsirɗe feere feere. 3 Suleymaana na yiɗi Joomiraaɗo na jokkii jamirooje bammum Daawda, ammaa wo dow nokkuuje toowɗe o wulananno Joomiraaɗo kirsamaaji e ure. 4 Kaananke Suleymaana yehi Gibiyon faa waɗa kirsamaaji sabo toon wonnoo hirsirde toownde teddunde. Dow hirsirde ndeen o sakki kirsamaaji buleteeɗi ujunere. 5 Joomiraaɗo ɓangani mo ley koyɗol jemma Gibiyon toon. Laamɗo wi'i mo:— Ŋaaram ko njiɗɗaa, faa mi hokke.
6 Suleymaana jaabii wi'i:
— A hollii maccuɗo maaɗa baaba am Daawda njinngu koolniingu manngu sabo o ɗowtanake ma e hoolaare e fonnditaare e laaɓal ɓernde. A reenanii mo njinngu koolniingu ko kokkuɗaa mo ɓiɗɗo loomtuɗo mo dow jooɗorgal laamu makko, iɗum laatorii noon hannden. 7 Joonin du, wo aan Joomiraaɗo Laamɗo am waɗi ko miin, maccuɗo maaɗa, suka pamaro mo anndaa no dabiirta tafon, loomtumi laamu baaba am Daawda. 8 Inan maccuɗo maaɗa hakkunde yimɓe ɓe cuɓiɗaa, jamaare mawnde nde waawataake limideede. 9 Ndelle miɗo ŋaare kokkaraa kam, miin maccuɗo maaɗa, ɓernde hakkilnde faa mi laamoro yimɓe maaɗa, mi waawa senndude ko wooɗi e ko boni. Si wanaa noon, moy waawi laamaade yimɓe maaɗa tedduɓe ɓe?
— A ŋaaraaki juutal balɗe, a ŋaaraaki jawdi, maa du maayde wayɓe ma, ammaa hakkillo tan ŋaariɗaa faa laamoroɗaa fonnditaare! 12 Ndelle, mi hokkete ko ŋaariɗaa. Inan, mi hokkete ɓernde hakkilnde wondunde e caral faa laatoo hono maaɗa waɗaayno yeeso maaɗa, waɗataa caggal maaɗa du. 13 Mi hokkete fay ko a ŋaaraaki kam. Mi hokkete jawdi e teddeengal faa kaananke fay gooto waawaa hewtaade ma e teddeengal faa haddi balɗe maaɗa. 14 Si nii a jokkii laabi am, si a ɗowtanake sariyaaji am e jamirooje am, hono no bammaa Daawda waɗirno noon, mi juunnan balɗe maaɗa.
15 Nde Suleymaana finunoo fu, faami wo ɗum koyɗol. O yeccii Urusaliima o darowii yeeso Keesuwal Amaana Joomiraaɗo. Ɗoon o sakkani Laamɗo kirsamaaji buleteeɗi e kirsamaaji jeɗeteeɗi. De sakitii o waɗani gollooɓe makko weltaare mawnde.
No Suleymaana sarorii hakkunde rewɓe ɗiɗo
16 Nyannde gomma, woykuruuɓe ɗiɗo ngari to kaananke Suleymaana, ndarii yeeso muuɗum. 17 Gooto maɓɓe wi'i:
— Joomam, accanaa kam hakke, miin e debbo oo mbaaldata ley suudu wooturu. Wakkati ndimu am hewtunoo, tawi miɗen ngondi ley suudu wooturu. 18 Caggal balɗe tati kanko du o rimi. Minen ɗiɗo tan ngoni ley suudu nduun wakkati oon, fay gooto tawdaaka e amin. 19 Jemma gooto, debbo oo nyoƴƴii ɓinngel muuɗum gorel ley ɗoyngol faa maayi. 20 Ley jemma oon, tawi miin korɗo maaɗa miɗo ɗaanii de o adi ɓinngel am ngel kuufunoomi ngeel o fukkinowi ɗakkol makko. O adi ɓinngel makko maayngel ngeel, o fukkini ɗakkol am. 21 Subaka majjum ummiimi faa mi hokka suka am enndu, de tawumi inan ɓiɗɗo maayɗo! Nde weetunoo faa laaɓi fu, ndaarumi faa wooɗi tawumi wanaa ɓinngel ngel ndimumi ngeel.
22 Wakkati oon, debbo ɗiɗaɓo oon wi'i:
— Wanaa noon! Miin jeyi ɓiɗɗo buurɗo o, maayngel ngeel njeyɗaa.
Ooto du wi'i:
— Fewre! Ɓiya woni maayɗo. Buurɗo o, wo miin jeyi!
— Mono e mooɗon fuu wi'i: «Miin jeyi ɓiɗɗo buurɗo de ooto jeyi maayɗo oon!» 24 Ndelle ngaddanee kam kaafaahi.
— Peccee ɓinngel ngeel pecce ɗiɗi, kokkon ɓe mono fuu fecco wooto.
26 Inna suka buurɗo oon heewi yurmeende suka muuɗum de wi'i kaananke:
— Joomam kaananke, accaa hakke, sawra, taa waru ngel. Hokku ngel debbo ooto.
Ammaa debbo oonton wi'i:
— Peccee ngel pecce ɗiɗi, taa ngel laatanoo fay gooto amin.
27 Kaananke jaabii, wi'i:
— Kokkitee ɓinngel ngeel debbo arano o, taa mbaree ngel, sabo kanko woni inniigel.
28 Israa'iilankooɓe fuu nani kabaaru no Suleymaana taƴiri sariya oon. Ɓe fuu ɓe teddiniri mo kulol, sabo ɓe annditi imo saroroo hakkillo ƴuurungo to Laamɗo.