Isira
No Koores hokkiri laawol Suudu Dewal Joomiraaɗo nyiɓitoree
1
1 Ley hitaande go'aɓerde laamu Koores kaananke Persi, Joomiraaɗo meemi ɓernde makko. Joomiraaɗo waɗii ɗum faa konngol muuɗum ƴuurungol e hunnduko annabi Yeremiya tabitaa. Ɗum saabi de Koores nelani yimɓe leydi ndi laamii ndiin fuu mbi'ee:2 Inan ko miin Koores kaananke Persi mbiimi: Laamɗo Joomiraaɗo Toowɗo, hokkii kam laamuuji adunaaru fuu. O halfinii kam mi nyiɓitanoo mo Suudu Dewal Mawndu nder Urusaliima nder leydi Yahuuda. 3 Neɗɗo fu jeyaaɗo e yimɓe makko hakkunde mooɗon, o barkina ɗum, o wonda e muuɗum. Joonin sanaa joomum yaha huɓeere Urusaliima ley leydi Yahuuda saabe nyiɓitagol Suudu Dewal Joomiraaɗo, Laamɗo Israa'iila nduun, kanko woni Laamɗo gonɗo ley huɓeere Urusaliima. 4 Katin, hakkunde yimɓe makko heddiiɓe na mbuuri ɓeen, wonduɓe e muɓɓen mballira ɗum'en kaŋŋe e cardi e kujje feere feere e daabaaji e dokke yardaamuye saabe Suudu Dewal Laamɗo ley Urusaliima nduun.
5 Ndeen ardiiɓe lenyol Yahuuda e Benyamin e almaami'en e Lewinkooɓe e ɓe Laamɗo meemii ɓernde muɓɓen fu, ummii faa koota nyiɓitowo Suudu Dewal Joomiraaɗo ley huɓeere Urusaliima toon. 6 Wondiiɓe maɓɓe kokki ɓe kujje gaɗiraaɗe kaŋŋe e cardi e kujje feere feere e daabaaji e dokke yardaamuye keewɗe korsuɗe. 7 Ndeen Koores kaananke oon yaltini kujje ɗe Nebukanesar laaminooɗo Baabiila, ittunoo ley Suudu Dewal Joomiraaɗo nder huɓeere Urusaliima, de yaari resowi ley suudu alla'en muuɗum. 8 Koores yamiri Mitreedat ndaaranoowo jawdi suudu laamu, wurtina ɗe, lima ɗe, de hokka ɗe Sesabasar ardiiɗo Yahuuda. 9 Inan adadu majje: Le'e kaŋŋe 30, ɗe cardi 1 000, e laɓe 29, 10 e jarduɗe kaŋŋe 30, e ɗe cardi 410, e kujje feere feere 1 000. 11 Kujje gaɗiraaɗe kaŋŋe e cardi ɗeen fuu wo 5 400. Sesabasar wartiri ɗe fuu nde ɓe ƴuwunoo e maccangaaku ley leydi Baabiila ɓe ngarti huɓeere Urusaliima ndeen.