No Ahabi e Yoosafat ndawridiri
(2 Kabaaruuji 18:1-34)
22
1 Duuɓi tati jam jooɗorii hakkunde Siiriya e Israa'iila. 2 Ley hitaande tataɓerde ndeen Yoosafat, kaananke Yahuuda, yehi to kaananke Israa'iila. 3 O tawi kam du haaldiino e gollooɓe muuɗum, wi'i:— On paami enen njeyi wuro Ramot-Galaad, de en ngaɗaay faa'e faa teeten ngo e junngo kaananke Siiriya naa!
4 Ndelle o ƴami kaananke Yoosafat, o wi'i:
— Yalla a yaadan e amin faa kaɓden e Ramot-Galaad naa?
Yoosafat jaabii mo, wi'i:
— Miin kaa, en laatake gootum, yimɓe am laatake yimɓe ma, pucci am du laatake pucci maaɗa.
5 Yoosafat ɓeydi wi'i:
— Ƴame muuyɗe Joomiraaɗo tafon.
No Mikaya hollirii maayde Ahabi
6 Kaananke Israa'iila hawrondini annabaaɓe keme nayo. Ndeen o ƴami ɓe yalla o yaha wolde Ramot-Galaad, naa taa o yaha. Ɓe mbi'i mo:
— Yahu kaananke, Joomiraaɗo wattan wuro ngoon e juuɗe maaɗa!
7 Ammaa Yoosafat ƴami:
— Yalla annabaajo Joomiraaɗo fay gooto walaa mo mbaawɗen ƴamude naa?
8 Kaananke Israa'iila jaabii Yoosafat, wi'i:
— Annabaajo Joomiraaɗo gooto tan woni leydi am ɗo mo mbaawɗen ƴamude ammaa miin kaa, miɗo wanyi mo sabo abada o haalaay ko wooɗi dow am. Annabaajo oon na wi'e Mikaya ɓii Yimla.
Yoosafat jaabii, wi'i:
— Aan kaananke, a jeyaa haalude haalaaji hono ɗi.
9 Ndeen kaananke Israa'iila neli gooto e tindinooɓe muuɗum haro waddowa Mikaya. 10 Kaananke Israa'iila e kaananke Yahuuda na ɓornii kaddule kaanankooɓe na njooɗii, mono fuu dow jooɗorgal muuɗum laamu dow njaayri dammbugal Samariya. Annabaaɓe na ngoni yeeso maɓɓe, na kaalda annabaaku. 11 Gooto maɓɓe na wi'e Sidekiya ɓii Kenaana, waɗi luwe jamɗe, de wi'i:
— Joomiraaɗo wi'i: «Njuwiraa Siiriyankooɓe luwe ɗe faa ɗo kalkuɗaa ɓe ley leydi Siiriya.»
12 Annabaaɓe ɓeen fuu na mbi'a hono noon, iɓe mbi'a:
— Njahaa wolde Ramot-Galaad, Joomiraaɗo wattan wuro ngoon e juuɗe maaɗa aan kaananke.
13 Nelaaɗo noddowa Mikaya oon wi'i ɗum:
— Miɗo haalane konngol annabaaɓe, ɓe fuu ɓe ngaɗii hunnduko wooto, ɓe mbi'i kaananke heɓowan wunee ley wolde Ramot-Galaad. Si nii a yehi fu, taa yeddu haala maɓɓe, ndewa ko ɓe mbi'i tan!
14 Ammaa Mikaya jaabii, wi'i:
— Mi hunorake Joomiraaɗo buurɗo, ko Joomiraaɗo wi'i kam tan kaalanammi mo.
15 Nde Mikaya yottinoo toon fu, kaananke ƴami ɗum, wi'i:
— Mikaya, yalla eɗen njeyi yaade wolde Ramot-Galaad ndeen naa en njeya?
Mikaya wi'i mo:
— Kaananke, njahaa wolde ndeen! Joomiraaɗo hokkete wuro ngoon!
16 Kaananke oon wi'i mo:
— Kile foti kuninimmaami taa kaala ko wanaa goonga e Innde Joomiraaɗo!
17 Mikaya jaabii mo wi'i:
— Miin, mi yi'ii Israa'iilankooɓe na cankitii dow baamle hono baali ɗi ngalaa duroowo. Joomiraaɗo wi'i: «Israa'iilankooɓe ngalaa hooreejo, ndelle mono e maɓɓe fuu yecco wuro muuɗum e jam.»
18 Kaananke Israa'iila wi'i Yoosafat:
— Mi haalanaayno ma, abada annabi Mikaya haalaay kam lobba, wakkati fuu ko boni tan o wi'ata kam?
19 Mikaya wi'i mo:
— Hettinda konngol Joomiraaɗo. Miin Mikaya mi yi'ii Joomiraaɗo na jooɗii dow jooɗorgal muuɗum laamu, maleyka'en na ndarii nano e nyaamo fuu. 20 Joomiraaɗo ƴami ɓe: «Moy hiilata Ahabi faa yaha wolde Ramot-Galaad?» Oo ga na wi'a ni, oo too du na wi'a ni. 21 Ndeen alhaali bonɗo gomma wari, darii yeeso Joomiraaɗo, de wi'i:
— Miin hiilata Ahabi.
22 Joomiraaɗo ƴami mo, noy kiildataa mo?
Ruuhu oon jaabii, wi'i:
— Mi wattan fewre ley kunnduɗe annabaaɓe makko.
Joomiraaɗo wi'i mo:
— A gaynan ɗum. Njahaa ndelle, kiilaa o.
23 Ndeen Mikaya ɓeydi wi'i:
— Joomiraaɗo wattii ley kunnduɗe annabaaɓe maaɗa ɓee fuu ruuhu penoowo. Paamaa Joomiraaɗo na fodanii ma halkere.
24 Ammaa Sidekiya fenyi Mikaya de wi'i:
— Toy ruuhu Joomiraaɗo wurtorii e am faa haalda e maaɗa?
25 Mikaya jaabii mo, wi'i:
— A faaman nyannde naatuɗaa to ɓuri fuu longitaade ley suudu faa cuuɗoɗaa.
26 Kaananke Israa'iila wi'i Mikaya nanngee, yaaree to Amon hooreejo wuro, e to Yo'as ɓii kaananke. 27 O wi'i Amon e Yo'as ɓeen mbi'ee:
— Wo miin kaananke Israa'iila wi'i: Nannon Mikaya ley kasu, de oɗon kokka mo buuru e ndiyam seeɗa, faa ɗo ngartumi e jam.
28 Mikaya wi'i mo:
— Kaananke, si nii a warti e jam fu, ɗuum na holla wanaa Joomiraaɗo haaliri e hunnduko am.
O ɓeydi o wi'i:
— On fuu, kettindee ko kaalammi joonin ɗum.
Maayde Ahabi
29 Ndeen kaananke Israa'iila e Yoosafat kaananke Yahuuda ndilliri Ramot-Galaad. 30 Kaananke Israa'iila wi'i Yoosafat:
— Miin kaa, mi wattinkinto hono sordaasiijo de mi naata wolde, ammaa aan Yoosafat, keddodoɗaa e kaddule maaɗa.
Ndelle kaananke Israa'iila wattinkinori kaddule goɗɗe de naati wolde ndeen. 31 Tawi kaananke Siiriya yamiriino hooreeɓe torkooji pucci muuɗum 32 taa piloo sordaasiiɓe famarɓe maa mawɓe, ammaa piloo kaananke Israa'iila tan. 32 Nde worɓe Siiriya nji'unoo Yoosafat fu, mbi'i:
— Sikke walaa, wo o woni kaananke Israa'iila.
Ndeen ɓe kucciti mo, faa ɓe nannga mo. De Yoosafat fiyi nyonaango. 33 Nde ɓe paamunoo wanaa kanko woni kaananke Israa'iila fu, ɓe acci mo. 34 Ley wolde ndeen, goɗɗo fiɗi kural yaare de ngal yanowi e kaananke Israa'iila faa ngal siititi hakkunde jamɗe saayo muuɗum. Ndeen kaananke oon wi'i dorbotooɗo torkooru muuɗum:
— Oonca mburtinaa kam ley wolde ɗo, sabo mi nawnake.
35 Wolde ndeen nyaaɗi sanne nyannde ndeen. Kaananke Israa'iila na darnaa ley torkooru muuɗum yeeso Siiriyankooɓe, faa laasara de maayi. Ƴiiƴam makko ɗaam rufi ley torkooru nduun. 36 Wakkati caamal naange, feekaango waɗi hakkunde wolde toon, wi'i:
— Mono e mooɗon fuu jaaƴowo wuro muuɗum e leydi muuɗum!
37 Ɓe njaari kaananke maayɗo oon Samariya, ɓe mooɓowi ɗum. 38 Ndeen ɓe looti ƴiiƴam makko ngonnooɗam ley torkooru ɗaam ley feto Samariya. Dawaaɗi ina ngoni ɗoon, na metta ɗam. Woykuruuɓe du na lootonoo ley maggo. Ɗum fuu ɗum waɗiri hono no Joomiraaɗo wiirunoo noon.
39 Kabaaru kaananke Ahabi keddiiɗo fuu na winndaa ley dewtere Kabaaruuji Kaanankooɓe Israa'iila. Ley toon na holla ko o waɗi ley nguurndam makko, no o nyiɓiri suudu nyiiƴe nyiibi e gure ɗe o nyiɓi fuu.
40 Ahabi maayi hawritowi e maamiraaɓe muuɗum. Ɓiyiiko Ahajiya, loomti mo laamii.
No Yoosafat laamorii dow Yahuuda
(2 Kabaaruuji 20:31-21:1)
41 Yoosafat ɓii Asa laamake Yahuuda ley hitaande nayaɓerde laamu Ahabi kaananke Israa'iila. 42 Yoosafat na wondi e duuɓi 35 wakkati laamotono ndeen. O laamorake duuɓi 25 ley Urusaliima. Inniiko na wi'e Ajuuba ɓii Silihi. 43 O rewi laawol baabiiko Asa, golle makko fuu wo dartiiɗe yeeso Joomiraaɗo. 44 Ammaa cuuɗi tooruuji ɗiin kalkaaka. Yimɓe na keddii na ngaɗa kirsamaaji na ngatta urdiiji ley cuuɗi ɗiin. 45 Yoosafat waɗi jam hakkunde muuɗum e kaananke Israa'iila.
46 Kabaaru kaananke Yoosafat keddiiɗo, e golleeji muuɗum ɗi semmbe, e woldeeji ɗi waɗuno fu winndaama ley Dewtere Kabaaruuji Nyalaaɗe Kaanankooɓe Yahuuda. 47 Yoosafat halkii laatiiɓe woykuruuɓe saabe tooruuji muɓɓen, heddinooɓe ley leydi ndiin gilla wakkati bammum Asa.
48 Kaananke walaano wuro Edom ammaa kalfinaaɗo laamu na wonno toon. 49 Yoosafat waddi laanaaji ndiyam bi'eteeɗi laanaaji Tarsis faa njaha Ofir, pilowoo kaŋŋe. Ammaa jahaangal ngaal heɓaay waɗeede sabo laanaaji ɗiin kelii ley wuro Esiyon-Geber.
50 Ndeen Ahajiya ɓii Ahabi haaldi e Yoosafat wi'i:
— Accu gollooɓe am njaada e gollooɓe maaɗa ley laanaaji ɗiin.
Ammaa Yoosafat jaɓaay. 51 Yoosafat maayi, mooɓa hakkunde maamiraaɓe muuɗum ley galluure bammum Daawda. Ndeen ɓiyiiko Yoram loomti mo laamii.
No Ahajiya laamorii dow Israa'iila
52 Ley hitaande sappo e jeɗɗaɓerde laamu Yoosafat kaananke Yahuuda, Ahajiya ɓii Ahabi laamii dow Israa'iila ley wuro Samariya. Duuɓi ɗiɗi o laamorii Israa'iila. 53 Ahajiya ummini tikkere Joomiraaɗo. O rewii laawol baabiiko e inniiko e laawol Yerobaam ɓii Nebat ngattunooɗo Israa'iilankooɓe e hakke oon. 54 O ɗowtanii Ba'al, o sujidani ɗum, o tikkini Joomiraaɗo, Laamɗo Israa'iila hono no baabiiko waɗirno noon.