No Nabot wariraa saabe ngesa muuɗum cabiije
21
1 Caggal ɗuum, gorko bi'eteeɗo Nabot mo wuro Yesre'el na woodunoo ngesa cabiije ɗakkol suudu laamordu Ahabi kaananke Samariya. 2 Ahabi haaldi e makko, wi'i mo:— Kokkaa kam ngesa maaɗa cabiije nga faa mi waɗa sardiŋe am, sabo inga ɓadii ɓaade am. Mi hokkete ngesa cabiije ɓurnga nga woodde. Maa si yoɓeede coggu magga ɓurani maa du, mi yoɓe.
3 Nabot jaabii mo, wi'i:
— Joomiraaɗo haɗam hokkude ma ko ndonumi baabiraaɓe am.
4 Ndeen ɓernde Ahabi metti sanne. O naatowi ley suudu makko, imo sunii saabe haala ka Nabot haali mo kaan. Sabo wi'ii mo: «Mi hokkataa ma ko ndonumi baabiraaɓe am.» 5 Deekiiko Yesabel wari to makko de wi'i mo:
— Ɗume mettini ɓernde maaɗa de a nyaamata?
6 Ahabi jaabii mo, wi'i:
— Mi haaldi e Nabot, mbi'umi ɗum sonnira kam ngesa muuɗum cabiije, maa si na fotani ɗum du, mi hokka ɗum ngesa ngonnga. De o wi'i o hokkataa kam ngesa ngaan.
7 Ndeen Yesabel dey kaananke oon wi'i ɗum:
— Wanaa aan laamii Israa'iila naa? Umma ndelle, nyaama de ceyoɗaa. Wo miin heɓante ngesa Nabot ngaan!
8 Debbo oon winndi ɓataakiiji e innde Ahabi, watti maande muuɗum dow majji, de neldi ɗi mawɓe e hooreeɓe wonɓe Yesre'el galluure Nabot toon. 9 Inan ko o winndi ley ɓataakiiji ɗiin:
«Ngooynee suumayeere waɗee, de njoƴƴinon Nabot yeeso jamaare. 10 Njoƴƴinon worɓe ɗiɗo jayɓe yeeso makko de mbi'on ɓe, ceedanoo mo feloore, mbi'a o bonkake Laamɗo e kaananke. Ndeen mburtinon mo de paɗɗon mo kaaƴe faa o maaya.»
11 Yimɓe galluure Nabot mawɓe e hooreeɓe wonɓe wuro ngoon ngaɗi ko Yesabel winndi ley ɓataakiiji ɗuum. 12 Suumayeere waɗa, de Nabot njoƴƴina yeeso jamaare. 13 Jaasuɓe ɗiɗo ɓeen ngari njooɗii yeeso makko de ceedanii mo feloore yeeso yimɓe wonɓe ɗoon fuu. Ɓe mbi'i:
— Nabot bonkake Laamɗo e kaananke fuu.
Caggal ɗuum, ɓe mburtini mo galluure ndeen de ɓe paɗɗi mo kaaƴe faa o maayi. 14 Ɓe neldi Yesabel kabaaru ko Nabot faɗɗaama kaaƴe faa maayi.
15 Nde Yesabel nannoo ɗum fu, wi'i Ahabi:
— Umma hooƴu ngesa Nabot ngaan, sabo maayi.
16 Wakkati Ahabi nannoo kabaaru maayde Nabot fu, yehi ngesa toon faa jeyta nga.
No Iliyaasa holliri saamugol Ahabi e Yesabel
17 Konngol Joomiraaɗo wari e Iliyaasa mo wuro Tisibi oon, wi'i ɗum:
18 — Ummoɗaa njahaa, kawrowa e Ahabi kaananke Israa'iila gonɗo Samariya oon. Imo woni ley ngesa cabiije Nabot faa o jeyta nga. 19 Kaalda e makko, mbi'aa mo: «Inan ko Joomiraaɗo wi'i: Yalla a warii goɗɗo de katin jeytaa ngesa muuɗum naa?» Mbi'a mo katin: «Inan ko Joomiraaɗo wi'i: to dawaaɗi mettunoo ƴiiƴam Nabot, toon ɗi mettata ƴiiƴam maaɗa, aan du.»
20 Nde Ahabi yi'unoo Iliyaasa fu, wi'i:
— Aan ganyo am, a yiitii kam katin naa?
Iliyaasa jaabii, wi'i:
— Mi yiitii ma sabo a sonnii hoore maaɗa faa ngaɗaa ko boni yeeso Joomiraaɗo. 21 Joomiraaɗo waddan ko boni dow maaɗa, o wuuwan ƴuwdi maaɗa fuu, fay gorko gooto heddataako ley lenyol maaɗa, aan Ahabi, wanaa maccuɗo wanaa dimo. 22 O waɗan suudu maaɗa du hono no waɗunoo saare Yerobaam ɓii Nebat e saare Ba'asa ɓii Ahiya noon. Sabo a tikkinii mo sanne, a wattii Israa'iilankooɓe e hakke.
23 Yesabel du dawaaɗi nyaaman ɗum ley kokuwol Yesre'el. 24 Jeyaaɗo e saare Ahabi maayɗo ley wuro fuu dawaaɗi nyaamata ɗum, maayɗo ley ladde du pooli nyaamata ɗum.
25 Walaa fuu nannduɗo e Ahabi sonnude hoore muuɗum faa golla ko boni yeeso Joomiraaɗo. Ammaa wo deekum Yesabel tuti ɗum. 26 Ahabi golli ko nyiddini sanne ley ko ɗowtanii tooruuji hono no Amorinkooɓe ɓe Joomiraaɗo riiwunoo yeeso yimɓe Israa'iila noon.
27 Nde Ahabi nannoo haalaaji ɗiin fu, seeki kaddule muuɗum, ɓornii bootooji, na suumi. O ɓortataako bootooji ɗiin fay si imo fukko. Imo yaha o cuniiɗo sanne. 28 Ndeen konngol Joomiraaɗo wari e Iliyaasa, wi'i:
29 — Yalla a yi'i no Ahabi leeƴiniri hoore muuɗum yeeso am naa? Saabe o leeƴini hoore makko yeeso am, mi waddataa jukkungo mbonngo ngoon ley balɗe makko. Ammaa ley balɗe ɓiyiiko gorko, ndeen ngaddammi jukkungo ngoon dow saare makko.