No kaananke Siiriya haɓdiri e Israa'iila
20
1 Ben-Hadad kaananke Siiriya hawrondini sordaasiiɓe muuɗum fuu. Kaanankooɓe 32 na ngondi e makko, kam'en e pucci muɓɓen e torkooji muɓɓen, na mballa mo. Ɓe njehi ɓe piilowi Samariya de ɓe kaɓdi e muuɗum. 2 O neli yimɓe njaha ley galluure ndeen, de mbi'a Ahabi kaananke Israa'iila:3 — Inan ko Ben-Hadad wi'i: Kaŋŋe ma e cardi maaɗa fuu wo miin jeyi, wooɗi du, rewɓe ma e ɓiɓɓe maaɗa ɓurɓe wooɗude fuu wo miin jeyi.
4 Ndeen kaananke Israa'iila jaabii mo, wi'i:
— Mi jaɓii ko mbiiɗaa, joomam kaananke. Miin e hoore am e ko ngoodumi fuu wo aan jeyi.
5 Nelaaɓe ɓeen njeccii to Ahabi ɗiɗaɓerde, mbi'i ɗum:
— Ben-Hadad wi'i: kokkaa ɗum kaŋŋe ma e cardi maaɗa, e rewɓe ma e sukaaɓe maaɗa fuu. 6 Jaango hono joonin, o nelan maccuɓe makko to maaɗa, ɓe pumpo suudu maaɗa e cuuɗi maccuɓe maaɗa de ɓe kooƴa gineeji mooɗon korsuɗi tiiɗɗi coggu fuu.
7 Ndeen kaananke Israa'iila oon noddi mawɓe leydi fuu, wi'i ɗum'en:
— Paamee, wo toonye mawɗo gorko oon filotoo. Sabo o neli yimɓe ɗo am faa o hooƴa deekiraaɓe am e sukaaɓe am, tawti kaŋŋe am e cardi am, ammaa mi salanaaki mo ɗum.
8 Mawɓe Israa'iila ɓeen e yimɓe tawaaɓe fuu mbi'i mo:
— Taa hettindana mo, wooɗi du taa jaɓu ko o wi'i.
9 Ahabi wi'i nelaaɓe Ben-Hadad ɓeen:
— Kaalanowee joomam kaananke, mbi'on mo: Mi jaɓiino waɗude nelangal makko go'aɓal ngaal, ammaa ko o sakitii o neli ɗuum, mi waawaa waɗude ɗum.
Nelaaɓe ɓeen njeccii kaalanowi kaananke muɓɓen nelal ngaal. 10 Ndeen Ben-Hadad nelani mo katin, wi'i:
— Alla'en njukkoroo kam torra mawɗo si mi yoppidi Samariya fay sollaare waawnde heewude juuɗe konunkooɓe yaadooɓe e am.
11 Kaananke Israa'iila jaabii ɓe wi'i:
— Mbi'on mo: Ɓornotooɗo kaɓitirɗe muuɗum faa yaha konu haanaa mawninde hoore muuɗum hono keɓoyɗo jaalagol de warti na ɓorto.
12 Ben-Hadad humpitaa haala kan, tawi wakkati oon imo yardannoo e kaanankooɓe ley tendeeje huɗo. O wi'i worɓe makko cegilano wolde. Ndeen ɓe cegilanii haɓdude e galluure ndeen.
No Israa'iila jaalorii Siiriya
13 Wakkati oon annabaajo gomma ɓattitii Ahabi kaananke Israa'iila, wi'i ɗum:
— Inan ko Joomiraaɗo wi'i: A yi'ii jamaare mawnde nde naa? Miin Joomiraaɗo, mi wattan nde fuu e juuɗe maaɗa. Ndeen paamata wo miin woni Joomiraaɗo.
14 Ahabi ƴami mo moy waɗata ɗum. O jaabii, o wi'i:
— Inan ko Joomiraaɗo wi'i: E juuɗe jokolɓe ɓe hooreeɓe leydi cuɓii ɓeen.
Ahabi ƴami katin moy fuɗɗata wolde ndeen. O jaabii ɗum, o wi'i:
— Wo aan.
15 Ahabi hawrondini jokolɓe ɓeen, tawi wo ɓe 232. Caggal ɓeen, o hawrondini konunkooɓe Israa'iila fuu. Ɓeen du, wo 7 000. 16 Hakkunde naange ɓe mburtanii wolde ndeen. Tawi wakkati oon Ben-Hadad na heddii na yara faa suloo ley tenddeeje huɗo toon, kam e kaanankooɓe 32 wallooɓe ɗum ɓeen. 17 Jokolɓe suɓaaɓe ɓeen artii wurtaade. Ben-Hadad neli faa humpito. Ɓe kumpiti mo, ɓe mbi'i:
— Worɓe mburtake Samariya.
18 O wi'i:
— Si wo jam ɓe mburtodii, nanngee ɓe ɓe wuurɓe. Si wo wolde ɓe mburtodii du, nanngon ɓe ɓe wuurɓe. 19 Tawi wo jokolɓe ɓeen ardii, de sordaasiiɓe Israa'iila fuu na njokkii. 20 Mono e maɓɓe fuu wari kaɓdoo muuɗum. Siiriyankooɓe ndoggi, Israa'iilankooɓe na ndiiwa ɓe. Ben-Hadad kaananke Siiriya oon fuunyii waɗɗii puccu, doggidi daɗi ɓe, kam e waɗɗiiɓe pucci woɓɓe. 21 Kaananke Israa'iila wurtii, halki torkooji, wari pucci, jaaltii Siiriyankooɓe jaalagol manngol.
22 Ndeen annabaajo oon ɓattitii kaananke Israa'iila, wi'i ɗum:
— Sanaa cemmbinaa ɓernde maaɗa, miiloɗaa ndaaraa ko kaanuɗa waɗude, sabo mawuuri kaananke Siiriya oon ummintinan wolde katin.
No Siiriya jaaltoraa katin
23 Maccuɓe kaananke Siiriya ɓeen mbi'i ɗum:
— Allaaji Israa'iilankooɓe ɗiin wo allaaji baamle. Ɗum waɗi de iɗi ɓuri en semmbe. Ammaa si en kaɓdi e maɓɓe dow njaayri fu, en njaaltoto ɓe. 24 Sey ittaa kaanankooɓe jokkuɓe ma ɓeen de loomtinaa ɓe woɓɓe. 25 Aan du, kawrondina sordaasiiɓe faa fota e ɓe mursuɗa, puccu loomta puccu, torkooru loomta torkooru. Ndeen, eɗen mbaawi haɓdude e maɓɓe dow njaayri. Sikke walaa, en njaaltoto ɓe.
Ben-Hadad jaɓi tindinoore maɓɓe ndeen, waɗi ko ɓe mbi'i.
26 Hitaande jokkunde ndeen, o hawrondini Siiriyankooɓe de o yaadi e muɓɓen wuro Afek faa ɓe kaɓda e Israa'iila. 27 Israa'iilankooɓe du kawrondina, cegilanaa njooɓaari. Yimɓe Israa'iila ɓeen na njaha na ponndi wayɓe muɓɓen, iɓe nanndi hono coggoy be'i ɗiɗoy. Siiriyankooɓe ɓeen kaa na keewi faa kuuri leydi ndiin fuu. 28 Annabaajo oon ɓattitii kaananke Israa'iila katin wi'i ɗum:
— Inan ko Joomiraaɗo wi'i: Saabe Siiriyankooɓe ɓe mbi'ii Joomiraaɗo wo alla baamle de wanaa alla njaayri, miin Joomiraaɗo mi wattan jamaare mawnde nde fuu e juuɗe maaɗa, ndeen on paaman ko miin woni Joomiraaɗo.
29 Feddeeji sordaasiiɓe ɗiɗi ɗiin na kuccondiri, na njooɗorii noon faa waɗi balɗe jeɗɗi. Nyannde jeɗɗaɓerde wolde ndeen fuɗɗi. Yimɓe Israa'iila mbari sordaasiiɓe Siiriya 100 000 ley nyalaande wootere. 30 Heddiiɓe ndoggiri galluure Afek. Ammaa kokuwol piiliingol galluure ndeen saami dow 27 000 maɓɓe. Ben-Hadad du doggi, naati ley wuro ngoon, suuɗowi ley suudu ɓurndu fuu lonngitaade.
No kaananke Siiriya hisiri
31 Maccuɓe makko mbi'i mo:
— Hettinda, min nani kaanankooɓe Israa'iila wo jom'en yurmeende. Ndelle accu min ɓornoo bootooji, min piila ko'e amin ɓoggi faa min kolla mettorgal ɓerɗe amin de min njottowo to kaananke Israa'iila oon. Na hasii ndeen o yoppante yonki maaɗa.
32 Ɓe ɓornii bootooji, ɓe piili ko'e maɓɓe ɓoggi de ɓe njehi to kaananke Israa'iila toon, ɓe mbi'i ɗum:
— Maccuɗo maaɗa Ben-Hadad oon na ŋaare accaa ɗum wuura.
Ahabi ƴami ɓe, wi'i:
— Yalla imo wuuri faa hannden naa? Kanko woni sakiike am.
33 Nelaaɓe Ben-Hadad ɓeen ndaardi haalaaji Ahabi ɗiin hono maande lobbere, njaabii law, mbi'i:
— Ayyo Ben-Hadad, sakiike maa oon pay.
Ahabi wi'i ɓe njaha ɓe ngaddowa mo. Ben-Hadad wurtii wari to Ahabi de Ahabi waɗɗini mo torkooru muuɗum. 34 Ben-Hadad wi'i mo:
— Mi hokkitete galluuje ɗe baaba am teetunoo bammaa, mi hokkete du nokkuuje luumorɗe ley Damas hono no baaba am waɗunoo ley Samariya noon.
Ahabi jaabii, wi'i:
— Si ko mbiiɗaa ɗum tabitii fu, mi rimɗinte.
Ahabi waddi amaana e Ben-Hadad de yoppi ɗum.
No annabaajo feliri Ahabi
35 Annabaajo gomma haaldi e jaado muuɗum e konngol Joomiraaɗo, wi'i: «Fiyam!» Ammaa jaado makko oon salii fiyude mo. 36 Ndeen o wi'i ɗum:
— Saabe a ɗowtanaaki konngol Joomiraaɗo, nde ndilluɗaa ɗo am joonin fuu, rawaandu ladde warete.
Jaadiiko oon dilli, rawaandu ladde hawri e muuɗum, wari ɗum. 37 Annabaajo oon hawri e gorko goɗɗo katin, wi'i ɗum: «Fiyam!» Gorko oon fiyi mo faa o nawni. 38 Ndeen annabaajo oon yehi, darowi dow laawol faa hawra e kaananke, na fiili lefol e gite muuɗum faa annditintaake. 39 Nde kaananke faltotonoo fuu, o feekii, o wi'i:
— Miin maccuɗo maaɗa, mi yehi faa hakkunde wolde, de sordaasiijo ɓattitii kam, waddi gorko to am de wi'i mi reena ɗum. O wi'i si gorko oon teetake fu, maa mi waraama, maa mi yoɓii cardi talanti gooto (kilooji 34). 40 Ammaa miin maccuɗo maaɗa, wakkati ngonnoomi e golleeji feere-feere ndeen, gorko oon teetii.
Kaananke Israa'iila jaabii annabaajo oon, wi'i:
— Noon taƴirɗa sariya maaɗa kaan, aan e hoore maaɗa.
41 Ndeen annabaajo oon itti lefol ngool e gite muuɗum, de kaananke Israa'iila annditi wo o gooto hakkunde annabaaɓe. 42 O wi'i kaananke:
— Inan ko Joomiraaɗo wi'i: Saabe a yoppii gorko gonnooɗo e junngo maaɗa, mo anniyiimi halkude oon, a yoɓiran yonki makko yonki maaɗa, yonkiiji yimɓe maaɗa du laatoto njobdi yonkiiji yimɓe makko.
43 Ndeen kaananke hooti suudu muuɗum Samariya, wo tikkuɗo, ɓernde muuɗum na metti sanne.