No Iliyaasa doggiri faa danna yonki muuɗum
19
1 Ahabi holli deekum Yesabel ko Iliyaasa waɗi e no wardi annabaaɓe Ba'al ɓeen fuu e kaafaahi. 2 Ndeen Yesabel neli nelaaɗo to Iliyaasa, na wi'a:— Alla'en njukkoroo kam torra mawɗo, si jaango hono joonin mi waɗaay yonki maa hono no ngaɗɗaa yonkiiji annabaaɓe Ba'al noon.
3 Ndeen Iliyaasa huli sanne. O doggi faa o hisina yonki makko. O yottii wuro Beerseba wonngo ley jeyal Yahuuda. Toon o yoppi golloowo makko.
4 Ndeen o yehi haddi yaadu nyalooma muɓɓo nder ladde de o yottii ley lekki. O sori, o jooɗii ley makki. Ɗoon o du'ii, o ŋaarii maayde, o wi'i:
— Joonin kaa Joomiraaɗo, torra o heƴii kam. Adu yonki am, sabo mi ɓuraa artiiɓe kam maayi ɓeen. 5 Ley lekki kiin o fukkii o ɗaanii. Ndeen maleyka wari meemi mo, wi'i:
— Umma nyaamu.
6 Iliyaasa ndaari, yi'i maasaare duppaande ɗakkol muuɗum dow kaaƴe bulɗe. O yi'i loonde heewnde ndiyam du. O nyaami o yari de o fukkii katin. 7 Maleyka Joomiraaɗo wari to makko ɗiɗaɓerde, meemi mo, wi'i:
— Umma nyaam, sabo tampiri jahaangal ma ngaal na ɓuri semmbe maaɗa.
8 Iliyaasa ummii nyaami, yari. O heɓi semmbe saabe nyaamndu nduun faa o yehii jahaangal balɗe 40 jemma e nyalooma de o yottii waamnde Laamɗo wi'eteende Sinayi.
No Joomiraaɗo haaldiri e Iliyaasa dow Sinayi
9 Toon o naati ley loho, o waali. Ndeen konngol Joomiraaɗo wari e makko ley loho toon, wi'i mo:
— Ɗume ngaɗataa ɗo Iliyaasa?
10 Iliyaasa jaabii wi'i:
— Miɗo njingana innde maaɗa e ɓernde am fuu, aan Laamɗo Joomiraaɗo Jom Baawɗe, ammaa yimɓe Israa'iila njoppii amaana maaɗa. Ɓe pusii kirsirɗe maaɗa, ɓe mbardii annabaaɓe maaɗa kaafaaje. Miin tan heddii, de iɓe piloo ittude yonki am miin du.
11 Ndeen Joomiraaɗo wi'i:
— Wurta ɗo! Njahaa dow waamnde, ndaroɗaa yeeso am.
Inan no Joomiraaɗo faltorto: Henndu ndu semmbe wifi, ndu seeki baamle, ndu heli kaaƴe yeeso Joomiraaɗo. Ammaa Joomiraaɗo tawaaka ley mayru. Caggal henndu nduun, dimbaago leydi manngo waɗi, ammaa Joomiraaɗo walaa nder maggo. 12 Caggal dimbaago leydi ngoon, yiite jokkii, ammaa Joomiraaɗo tawaaka ley magge. Caggal yiite ngeen, sonnyo sownaango leeƴungo rewti. 13 Wakkati Iliyaasa nannoo sonnyo ngoon fu, suddiri yeeso muuɗum e tonndu saayo muuɗum, de ummii wurtii darii hunnduko loho koon. Wakkati oon daande haaldi e makko, wi'i:
— Ɗume ngaɗataa ɗo Iliyaasa?
14 Iliyaasa jaabii, wi'i:
— Miɗo njinngana innde maaɗa e ɓernde am fuu, aan Laamɗo Joomiraaɗo Jom Baawɗe, ammaa yimɓe Israa'iila njoppii amaana maaɗa. Ɓe pusii kirsirɗe maaɗa, ɓe mbardii annabaaɓe maaɗa kaafaaje. Miin tan heddii, de iɓe piloo ittude yonki am miin du.
15 Ndeen Joomiraaɗo wi'i mo:
— Yahu, njeccoroɗaa laawol dewoowol nder ladde. Njahaa faa Damas de njooraa nebbam dow hoore Hajayel faa laatoo kaananke Siiriya. 16 Katin du, njooraa nebbam dow hoore Yeehu ɓii Nimsi faa laatoo kaananke Israa'iila. Ngaɗiraa noon du e Elisey ɓii Safata mo Abel-Mihola faa laatoo annabaajo loomtoowo ma. 17 Inan ko laatoto: Kisuɗo kaafaahi Hajayel fuu, Yeehu warata ɗum. Kisuɗo kaafaahi Yeehu du, Elisey warata ɗum. 18 Ammaa mi heddan worɓe 7 000 ley Israa'iila. Kawtal yimɓe ɓe kofanaaki Ba'al, ɓe muccoraaki tooru nduun kunnduɗe muɓɓen.
No Elisey suboraa
19 Iliyaasa dilli toon, o tawoyi Elisey ɓii Safata na rema. Imo remira ga'i noogay e nay (ɗiɗi ɗiɗi), imo wonnoo gaɗa ɗiɗi cakitiiɗi ɗiin. Iliyaasa rewi ɗakkol Elisey de deki saayo muuɗum dow makko. 20 Ndeen Elisey yoppi ga'i ɗiin fuu de jokkii Iliyaasa. Elisey wi'i mo:
— Accu mi waynowo saaraaɓe am tafon de mi jokke.
Iliyaasa wi'i mo:
— Yecca, yahu. Walaa ko hilli kam.
21 Nde Elisey yeccinoo fu, nanngi ga'i ɗiɗi, hirsi, de duppiri ɗi leggal ngal ɗi kaɓɓiranoo. Ndeen o yeɗi teewu majji yimɓe wonɓe ɗoon, ɓe nyaami. Sakitii Elisey ummii jokki Iliyaasa. Nii o laatorii golloowo muuɗum.