No Annabi Iliyaasa hawriri e Ahabi
18
1 Caggal nyalaaɗe kewɗe, konngol Joomiraaɗo wari e Iliyaasa ley hitaande rafo tataɓerde de wi'i:— Yahu aan e hoore maaɗa yeeso kaananke Ahabi sabo mi tomnan ƴoonde dow leydi ndi.
2 Iliyaasa yehi faa ɓangina hoore muuɗum to Ahabi. Wakkati oon rafo waɗii faa walaa fuu ko nyaametee ley galluure Samariya. 3 Ahabi noddi Obadiya hooreejo suudu laamordu. Obadiya oon, wo kuloowo Joomiraaɗo sanne. 4 Wakkati Yesabel warannoo annabaaɓe Joomiraaɗo ndeen, Obadiya suuɗii hemre maɓɓe. O suuɗiri ɓe capanɗe njoyo njoyo ley lohi tefaaje, imo hokkara ɓe ko ɓe nyaama e ko ɓe njara. 5 Ahabi haaldi e Obadiya, wi'i:
— En njaha njiiltooɗen ley leydi, ndaarowen ilduɗe ndiyam maa gooruuji to ngoni e leydi ndi fuu. Na hasii en keɓan huɗo seeɗa ko ngaddanen pucci men e araaji men baaneeji. Si wanaa noon fu, sey kirsen daabaaji men ɗiin.
6 Hono nii ɓe cenndiri leydi, mono fuu to rewata. Ahabi rewi gere oo ga, Obadiya du rewi gere oo to. 7 Nde Obadiya yahannoo dow laawol fu, hawri e Iliyaasa, annditi ɗum de hippii e leydi, wi'i:
— Aan wo a Iliyaasa joomam naa?
8 Iliyaasa jaabii mo, wi'i:
— Wo miin. Njahaa kaalanowaa jooma Ahabi miin Iliyaasa, mi warii.
9 Ndeen Obadiya wi'i:
— Hakke oye ngaɗumi de ngattaa kam, miin maccuɗo maaɗa, e juuɗe Ahabi faa wara kam? 10 Mi hunorake Joomiraaɗo buurɗo, Laamɗo maaɗa, kaananke waɗii aɗa filee nokku fuu. Walaa leydi maa laamu to o nelaay piloweɗaa. Katin du, fay si yimɓe leyɗe ɗeen mbi'ii a walaa ley gure muɓɓen, o tilsinan ɓe kunoo ɓe nji'aay ma. 11 De joonin mbi'aa mi yaha mi hollowa kaananke joomam oon, mi wi'a ɗum: «Inan, Iliyaasa warii»! 12 Si mi dillii, mi yoppii ma de Ruuhu Joomiraaɗo adii ma yaarii to mi anndaa, nde ngaddoymi Ahabi de tawaay ma ɗo fu, sikke walaa o waran kam. De miin, mi kuloowo Joomiraaɗo gilla cukaaku am. 13 Joomam, a haalanaaka ko ngaɗumi wakkati Yesabel filinoo warude annabaaɓe Laamɗo naa? Mi suuɗii annabaaɓe hemre, mi suuɗirii ɓe capanɗe njoyo njoyo ley lohi tefaaje, miɗo hokkara ɓe ko ɓe nyaama e ko ɓe njara. 14 De joonin mbi'aa mi yaha mi wi'owa joomam kaananke oon: «Iliyaasa warii!» Sikke walaa, o waran kam!
15 Ndeen Iliyaasa wi'i:
— Mi hunorake Joomiraaɗo buurɗo, Jom Baawɗe, mo ɗowtantoomi, hannden pay mi yottoto Ahabi.
16 Ndeen Obadiya yehi faa hawrowa e Ahabi de holla ɗum ko laatii. Ahabi yehi hawrowi e Iliyaasa. 17 Nde o haccinoo Iliyaasa fu, o wi'i:
— Wo aan gaddoowo bone dow Israa'iila oon naa?
18 Iliyaasa jaabii mo wi'i:
— Mi wanaa gaddoowo bone dow Israa'iila. Wo aan e saare bamma pay ngoni bonnooɓe leydi ndi, sabo on luttii jamirooje Joomiraaɗo, on ndewii tooruuji Ba'al. 19 Ndelle joonin kawrondina Israa'iilankooɓe fuu dow waamnde Karmel, kamɓe e annabaaɓe Ba'al 450, tawti annabaaɓe tooru Asira 400 ɓe deeka Yesabel nyaamdata ley wuro muuɗum ɓeen.
No Annabi Iliyaasa jaaltori annabaaɓe Ba'al
20 Kaananke Ahabi nelani Israa'iilankooɓe fuu, de hawrondini annabaaɓe ɓeen dow waamnde Karmel. 21 Iliyaasa ɓattii yimɓe ɓeen fuu de wi'i:
— Faa ndeye celoton sikkitirde hakkunde laabi ɗiɗi? Si nii Joomiraaɗo woni Laamɗo fu, njokkee ɗum! Si wo Ba'al du, njokkon ɗum!
— Hakkunde annabaaɓe Joomiraaɗo fuu, miin tan woni keddiiɗo, de annabaaɓe Ba'al wo 450. 23 Ngaddanee min ga'i ɗiɗi. Annabaaɓe Ba'al ɓeen cuɓoo ngootiri, ɓe taƴa ndi, de ɓe ndeka teewu mayri dow leɗɗe duppiirɗe. Ammaa taa ɓe kuɓɓa yiite. Miin du, mi adan keddiindi ndiin mi taƴa ndi, de mi deka teewu mayri dow leɗɗe. Ammaa mi huɓɓataa yiite. 24 Ndeen noddon innde Ba'al, alla mooɗon, miin du, mi nodda Innde Joomiraaɗo. Deweteeɗo jaaboriiɗo du'aare ndeen e yiite fu, wo kam woni Laamɗo.
Yimɓe fuu mbi'i:
— Haala ka na fotani min.
25 Ndeen Iliyaasa wi'i annabaaɓe Ba'al:
— Cuɓee ngaari hakkunde ga'i ɗiɗi ɗiin de artoɗon moƴƴinon ndi sabo onon ɓuri ɗuuɗude. De noddon innde alla mooɗon, ammaa taa kuɓɓon yiite.
26 Ɓe kooƴi ngaari ndi ɓe kokkaa ndiin, ɓe moƴƴini, de ɓe noddi innde tooru Ba'al. Iɓe nodda, iɓe nodda, gilla beetee faa hakkunde naange, iɓe mbi'a «Ohoo Ba'al! Jaaba min!» Ammaa daande fu nanaaka, fay gooto jaabaaki. Iɓe pitta, iɓe mbama, iɓe piiloo hirsirde ndeen. 27 Nde hakkunde naange hewtunoo fu, Iliyaasa jalnorii ɓe, ina wi'a:
— Ɓeydee noddude! Toownee daaɗe mooɗon sabo no laatii o alla ni, tawan wo o miiloto tafon, maa du, ladde o yehi, maa du jahaangal o yehi, maa du o ɗaani, sanaa o finndinee!
28 Annabaaɓe Ba'al ɓeen peekori e semmbe, ceekiri ɓalli muɓɓen kaafaaje e laɓe faa ƴiiƴam wubbi fodde al'aada muɓɓen. 29 Caggal hakkunde naange iɓe keddi iɓe kaalira annabaaku faa wakkati waɗugol sadaka caamal naange. Ammaa daande fuu nanaaka, fay gooto nootaaki, fay gootum laataaki.
30 Ndeen Iliyaasa wi'i jamaare ndeen:
— Ɓattee kam.
Jamaare fuu ɓattii mo. Iliyaasa moƴƴini hirsirde nde Joomiraaɗo liɓanoonde ndeen. 31 O adi kaaƴe sappo e ɗiɗi fodde limgal ɓiɓɓe Yaakuuba mo Joomiraaɗo wi'unoo: «Joonin Israa'iila laatoto innde maaɗa.» 32 Kaaƴe ɗeen Iliyaasa nyiɓitorani Innde Joomiraaɗo hirsirde. O wasi ngayka mbaawka hooƴude hono liitereeji 15, o fiilni hirsirde ndeen. 33 O yowi leɗɗe dow mayre. O taƴi teewu ngaari ndiin, o deki dow leɗɗe ɗeen. Ndeen Iliyaasa wi'i:
— Kebbinee looɗe nay ndiyam, de ndufon dow teewu ngu e leɗɗe ɗe.
— Ɓeydee ndiyam ɗam katin.
Ɓe ɓeydi. O wi'i katin:
— Ɓeydee ɗam tataɓerde.
Ɓe ɓeydi. 35 Ndiyam ɗaam fiili hirsirde ndeen fuu faa ɗam wubbi, ɗam heewi ngaykaare fiiliinde hirsirde ndeen.
36 Nde wakkati waɗeede sadaka futuro yottinoo fu, annabi Iliyaasa ɓattii hirsirde ndeen, wi'i:
— Joomiraaɗo, Laamɗo Ibrahiima e Isiyaaka e Israa'iila, hannden, hollu wo aan woni Laamɗo Israa'iila. Kollaa du, miin, wo mi golloowo maaɗa, ko ngaɗumi du fuu, mi waɗiri ɗum fodde yamiroore maaɗa. 37 Jaabam Joomiraaɗo, jaabam faa yimɓe ɓe paama aan Joomiraaɗo woni Laamɗo, aan du wartirta ɓerɗe maɓɓe to maaɗa.
38 Ndeen Joomiraaɗo jippini yiite dow kirsamaari ndiin, nge wuli ndi, kayri e leɗɗe mayri e kaaƴe mayri e leydi ndiin fuu. Yiite ngeen yoorni leydi ɗo ndiyam piiliiɗam hirsirde ɗaam heewunoo ɗoon fuu. 39 Nde jamaa oon yi'unoo ɗum fu, ɓe fuu ɓe kippii, iɓe mbi'a:
— Joomiraaɗo kam woni Laamɗo! Joomiraaɗo kam woni Laamɗo!
40 Ndeen Iliyaasa wi'i ɓe:
— Nanngee annabaaɓe Ba'al ɓeen fuu. Fay gooto maɓɓe haanaa daɗude.
Yimɓe ɓeen nanngi ɓe. Iliyaasa waɗi ɓe njaara faa ɗakkol gooruwol Kison, de ɓe kirsa toon.
No Joomiraaɗo tomniri ƴoonde dow leydi
41 Caggal ɗuum Iliyaasa wi'i kaananke Ahabi:
— Umma, yahu nyaamoy de njaraa, sabo miɗo nana riggaango.
42 Ahabi ummii yehi, nyaamoy, yari. Wakkati oon Iliyaasa ƴeenyi waamnde Karmel. Toon o turii, o watti yeeso makko hakkunde koppi makko. 43 O wi'i golloowo makko:
— Ƴeenyu faa dow de ndaaraa faro maayo manngo.
Golloowo oon yehi ndaarowi, warti, wi'i mo:
— Mi yi'aay faa'e.
Kile jeɗɗi Iliyaasa wi'i golloowo oon yaha ndaarowa faro maayo toon. 44 Jeɗɗaɓerde ndeen, golloowo oon wi'i:
— Mi yi'i duulel nanndungel e newre junngo na ummoo dow maayo toon.
Iliyaasa wi'i:
— Njaha mbi'owaa kaananke Ahabi tinnoo segilanoo torkooji pucci muuɗum de jippoo taa ƴoonde faddoo ɗum ɗo.