No Annabi Iliyaasa wuurdi wakkati rafo
17
1 Iliyaasa wo neɗɗo Tisibi, leydi Galaad. Kanko wi'i Ahabi kaananke Israa'iila:— Mi hunorake Joomiraaɗo, Laamɗo Israa'iila buurɗo mo ɗowtantoomi oon, sikke walaa, ley duuɓi garooji ɗi, ƴoonde toɓataa, saawoore waɗataa si wanaa miin ŋaarii ɗum waɗa.
2 Ndeen konngol Joomiraaɗo wari e makko, wi'i mo:
3 — Dillu ɗo de njahaa faro lettugal, cuuɗoɗaa ɗakkol pogowol Kaarit keedungol lettugal maayo Urdun. 4 Njaraa ndiyam maggol, mi yamirii daawuuje ngaddane neema du.
5 Iliyaasa waɗi ko Joomiraaɗo yamiri ɗuum, yehi jooɗowii ɗakkol pogowol Kaarit lettugal maayo Urdun toon. 6 Fajiri fuu daawuuje na ngaddana mo buuru e teewu, laasara du, wo noon. Imo yara ndiyam pogowol ngool. 7 Ɓooyaay faa'e de pogowol ngool re'i sabo ƴoonde wayri toɓude dow leydi ndiin.
8 Ndeen konngol Joomiraaɗo wari e Iliyaasa, wi'i ɗum:
9 — Ummaa njahaa Sarifat, leydi Sidon, de njooɗoɗaa toon. Mi yamiri debbo gomma mo gorum wuuraa hokke nyaamdu.
10 Iliyaasa ummii yehi Sarifat. E narrude wuro ngoon o hawri e debbo oon na teena leɗɗe. O noddi ɗum o ŋaarii waddana mo ndiyam njareteeɗam seeɗa e jardugel. 11 Nde debbo oon yahannoo faa waddanowa mo ndiyam ɗaam fu, o noddi ɗum katin, o wi'i:
— Sawra, ngaddanaa kam du, tayre buuru.
12 Debbo oon jaabii mo wi'i:
— Miɗo hunoroo Joomiraaɗo, Laamɗo maaɗa buurɗo, mi walaa fuu ko defetee, si wanaa tambannde conndi wootere ley loonde, e nebbam seeɗa ley jollooru. Mi warii faa mi teena leɗɗe seeɗa de mi hoota mi sa'a conndi ndiin maasaare. Miin e ɓiyam gorko min nyaama nde de min maaya rafo.
13 Iliyaasa jaabii mo, wi'i:
— Taa hulu! Naatu suudu maaɗa de ngaɗaa ko mbi'uɗaa ɗuum. Ammaa artoɗaa, ngaɗanaa kam maasayel tafon, de caggal ɗuum, ngaɗanaa hoore ma aan e ɓiya gorko oon. 14 Sabo inan ko Joomiraaɗo, Laamɗo Israa'iila wi'i: «Conndi timmataa ley loonde maaɗa, nebbam du ɓuytataako ley jollooru maaɗa faa nyannde Joomiraaɗo toɓini ƴoonde dow leydi.»
15 Ndelle debbo oon yehi, waɗowi ko Iliyaasa ŋaarii ɗuum. Ɓe mbuurdi e conndi ndiin faa ɓooyi, debbo oon e galle muuɗum e Iliyaasa fuu. 16 Conndi ndiin timmaay ley loonde, nebbam ɗaam du ɓuytaaki ley jollooru hono no Joomiraaɗo wiirunoo e hunnduko Iliyaasa noon.
No Iliyaasa iirtiniri ɓii debbo mo gorum wuura oon
17 Caggal ɗuum, ɓii debbo mo Iliyaasa weerani oon, nyawi nyawu cattungu sanne faa maayi. 18 Ndeen inna suka oon wi'i Iliyaasa:
— Nelaaɗo Laamɗo, ɗume waddondiri en? Yalla a waraanaa ɗo am faa miccintina Laamɗo hakkeeji am, de wara ɓiyam naa?
19 Ndeen Iliyaasa jaabii, wi'i:
— Hokkam suka oon ga.
Iliyaasa jaɓi suka oon e juuɗe makko, de yaari ɗum ley suudu dowuuru to woni toon, fukkini mo dow leeso muuɗum. 20 Ndeen o feekii, o ŋaarii Joomiraaɗo, o wi'i:
— Joomiraaɗo, Laamɗo am, debbo mo gorum maayi oon mbeerammi. Yalla a torran o faa yottoo maayde ɓiyiiko naa?
21 Ndeen Iliyaasa fukkii dow suka oon, naaɗii kile tati, de ŋaarii Joomiraaɗo, wi'i:
— Joomiraaɗo, Laamɗo am, miɗo ŋaare, ngartira yonki suka o!
22 Joomiraaɗo nani ŋaarnde Iliyaasa. Yonki suka oon warti e muuɗum, o iirtii. 23 Iliyaasa hooƴi suka oon, jippodii e muuɗum suudu dowuuru, hokkiti ɗum innam de wi'i:
— Inan! Ɓiya wo buurɗo.
24 Ndeen debbo oon wi'i Iliyaasa:
— Joonin kaa mi annditi wo a nelaaɗo Laamɗo, haala Joomiraaɗo ka kaalata kaan, wo ngoongalaaha.