16
1 Konngol Joomiraaɗo wari to Yeehu ɓii Hanaani wi'i ɗum yottina ngol Ba'asa. Inan ko ngol wi'i:2 — Mi ittii ma e sollaare leydi faa mi waɗe hooreejo yimɓe am Israa'iila. De a jokkii laawol Yerobaam, a nanni yimɓe am Israa'iilankooɓe ley hakke faa mi tikkanii ɓe. 3 Ndaar, mi halkete aan e ƴuwdi maaɗa fuu, mi waɗan ƴuwdi maa hono ƴuwdi Yerobaam ɓii Nebat. 4 Koreeji maa maayɗo ley wuro fuu, dawaaɗi nyaamata ɗum, maayɗo ley ladde du, pooli nyaamata ɗum.
5 Kabaaru Ba'asa keddiiɗo e baawɗe muuɗum e ko waɗi fuu na winndaa ley dewtere Kabaaruuji Kaanankooɓe Israa'iila. 6 Ndeen Ba'asa maayi, hawritowi e maamiraaɓe muuɗum. O mooɓaa wuro Tirisa. Ndeen ɓiyiiko Ela loomti mo laamii.
7 Katin e hunnduko annabi Yeehu ɓii Hanaani, konngol Joomiraaɗo yottorinoo dow Ba'asa e suudu muuɗum saabe bonanda mawɗo mo o waɗunoo yeeso Joomiraaɗo faa ummini tikkere muuɗum hono no Yerobaam waɗirnoo noon. Wooɗi du saabe o halkiinoo ƴuwdi Yerobaam.
No Ela laamorii dow Israa'iila
8 Ela ɓii Ba'asa oon laamii dow Israa'iila ley wuro Tirisa, hitaande noogay e jeegaɓerde laamu Asa kaananke Yahuuda. Ela laamorii duuɓi ɗiɗi. 9 Ammaa golloowo makko Simiri, hooreejo feccere torkooji pucci makko, dabi warude mo. Wakkati oon Ela na wonnoo wuro Tirisa, imo sulii saabe o yarii doro ley suudu Arsa. Arsa oon wo hooreejo laamordu makko ley wuro ngoon. 10 Simiri naati, tappi mo faa o maayi. Ndeen Simiri oon loomti mo laamii. Ɗum fuu ɗum waɗii ley hitaande noogay e jeɗɗaɓerde laamu Asa kaananke Yahuuda.
11 Nde Simiri jooɗinoo dow jooɗorgal laamu fu, wari ƴuwdi Ba'asa fuu, yoppaay fay gorko gooto wanaa suka wanaa mawɗo hakkunde koreeji makko e banndiraaɓe makko fuu. 12 Noon Simiri halkiri ƴuwdi Ba'asa fuu, o tabintini ko Joomiraaɗo wi'unoo dow Ba'asa e hunnduko annabi Yeehu. 13 Hakkeeji Ba'asa e ɓiyum Ela ɗiin ngaddi jukkungo ngoon. Ɓe ngatti yimɓe Israa'iila du e hakke, ɓe tikkiniri Joomiraaɗo, Laamɗo Israa'iila e tooruuji maɓɓe ɓoli. 14 Kabaaru Ela keddiiɗo e ko waɗi fuu, na winndaa ley dewtere Kabaaruuji Kaanankooɓe Israa'iila.
No Simiri laamorii dow Israa'iila
15 Ley hitaande noogay e jeɗɗaɓerde laamu Asa kaananke Yahuuda, Simiri laamorii balɗe jeɗɗi ley Tirisa. Tawi sordaasiiɓe na ngoni ɗakkol wuro Gibeton faa kaɓda e wuro ngoon, ingo jeyaa e gure Filistiyankooɓe. 16 Sordaasiiɓe ɓeen nani kabaaru Simiri waɗii dabare faa warii kaananke. Nyannde ndeen Israa'iilankooɓe fuu paamiri ley hoɗorde muɓɓen de ngaɗi Omiri, hooreejo sordaasiiɓe oon kaananke. 17 Ndeen Omiri e Israa'iilankooɓe fuu ndilli Gibeton. Ɓe njehi ɓe piilowi wuro Tirisa ngoon. 18 Nde Simiri yi'unoo sordaasiiɓe na piilii wuro ngoon fu, naati ley suudu reenirdu wonndu nder suudu laamordu de wuli ndu dow muuɗum faa maayi. 19 Ɗum fuu ɗum hewtake mo saabe hakkeeji makko e bonanda mo o waɗi yeeso Joomiraaɗo. Imo jokkunoo laawol Yerobaam, imo waɗannoo hakke, imo wattannoo Israa'iilankooɓe du, ley hakke. 20 Kabaaru Simiri keddiiɗo e dabare muuɗum bonde fuu na winndaa ley dewtere Kabaaruuji Kaanankooɓe Israa'iila.
No Omiri laamorii dow Israa'iila
21 Caggal ɗuum, leydi Israa'iila fecci pecce ɗiɗi. Woɓɓe maɓɓe njinngani Tibini ɓii Ginat faa ngaɗa ɗum kaananke, heddiiɓe du ndewi Omiri. 22 Ammaa yimɓe jokkuɓe Omiri ɓeen njaalii ɓe Tibini. Tibini maayi, de Omiri laamii. 23 Ley hitaande capanɗe tati e go'aɓerde laamu Asa kaananke Yahuuda, Omiri laati kaananke Israa'iila. O laamorii duuɓi 12 dow Israa'iila. O jooɗorii duuɓi jeegom ley huɓeere Tirisa. 24 O soodiri waamnde Samariya e junngo Semer, talantiiji cardi ɗiɗi (ɗum na hawra e kilooji 70). O nyiɓii wuro dow waamnde ndeen, o inndiri ngo Samariya, innde Semer jeynooɗo nde oon.
25 Omiri waɗi ko boni yeeso Joomiraaɗo. Hakke makko oon ɓurii hakkeeji kaanankooɓe artiiɓe mo fuu. 26 O jokkii laawol Yerobaam ɓii Nebat, imo waɗa hakkeeji, imo luttina yimɓe Israa'iila du. O tikkiniri Joomiraaɗo, Laamɗo Israa'iila e tooruuji makko meereeji. 27 Kabaaru Omiri keddiiɗo e golleeji muuɗum mawɗi e ko waɗi fuu, na winndaa ley dewtere Kabaaruuji Kaanankooɓe Israa'iila. 28 Ndeen Omiri maayi, hawritowi e maamiraaɓe muuɗum. O mooɓaa ley Samariya. Ɓiyiiko Ahabi loomti mo laamii.
No Ahabi laamorii Israa'iila
29 Ley hitaande capanɗe tati e jeetataɓerde laamu Asa kaananke Yahuuda, Ahabi ɓii Omiri oon laamii dow Israa'iila. O laamorii duuɓi 22 ley galluure Samariya. 30 Ahabi oon waɗi ko boni yeeso Joomiraaɗo. Bonanda makko faltake bonanda kaanankooɓe artiiɓe mo fuu. 31 Ko o jokki hakkeeji Yerobaam ɗuum, heƴaay mo. O ɓeydi hakke katin, o dewli Yesabel ɓii Etba'al kaananke Sidoninkooɓe. O yehi o ɗowtanowi tooru Ba'al, o sujidani ndu. 32 O nyiɓani tooru Ba'al nduun hirsirde ley suudu ndu o nyiɓannoo ɗum ley Samariya nduun. 33 Ahabi waɗani tooru Asira bimmbeere. O tikkini Joomiraaɗo, Laamɗo Israa'iila. O ɓernini ɗum faa ɓuri kaanankooɓe Israa'iila artiiɓe mo fuu. 34 Wakkati oon gorko bi'eteeɗo Hiyel mo Baytila nyiɓitii galluure Yeriko. Nde o joƴƴinnoo maadi mayre fu, hammadiijo makko Abiram maayi. Katin du, nde o darnunoo dammbuɗe kokuwol galluure ndeen fu, koddaajo makko Seguba maayi. Noon ɗum tabintiniri konngol ngol Joomiraaɗo haaldunoo e hunnduko Yoosuwa ɓii Nuuna ngool.