No Isira haaltirani Joomiraaɗo hakkeeji Israa'iilankooɓe
9
1 Nde ɗum timmunoo fu, woɓɓe hakkunde ardiiɓe Israa'iilankooɓe ngari mbi'i kam:— Jamaa Israa'iilankooɓe, fay almaami'en e Lewinkooɓe ceedaay e yimɓe leydi ndi, ɓeen ngoni Kanaaninkooɓe e Hittiyankooɓe e Perisinkooɓe e Yebusinkooɓe e Amoninkooɓe e Mo'abinkooɓe e Misirankooɓe e Amorinkooɓe, waɗooɓe ko nyiddini. 2 Ɓe ndewlanii ko'e maɓɓe e ɓiɓɓe maɓɓe surbaaɓe leydi ndi. Ndelle lenyol ceniingol jillonduraama e lenyi leydi ndi. De ko ɓuri bonde e majjum fu, wo ardiiɓe e mawɓe lenyol ngool ɓuri waɗude jamba oon.
3 Nde nannoomi ɗum fu, ceekumi saayo am e forgo am, ɗoofumi ngaasa hoore am, ɓorumi leeɓi waare am, njooɗodiimi e mettorgal ɓernde. 4 Ndeen huluɓe ko haala Laamɗo Israa'iila wi'i fuu kawriti to am saabe jambuuji ɗi ƴuuruɓe e maccangaaku ngarti ngaɗi ɗiin. Njooɗodiimi e mettorgal ɓernde faa wakkati sadaka laasara yottii. 5 Nde wakkati oon yottinoo fu, ummiimi ɗo cuuminoomi ɗoon, miɗo ɓornii saayo am e forgo am mo ceekumi oon. Ndikkiniimi, ƴeptumi juuɗe am faro Laamɗo Joomiraaɗo am, 6 mbi'umi:
Yaa Laamɗo am, semteende nanngii kam faa mi waawaa ƴeptude gite am, mi ndaara faro maaɗa; ngam hakkeeji amin keewii faa ndiwtii ko'e amin; pelooje amin ɗuuɗi yeeso maaɗa. 7 Gilla jamaanu maamiraaɓe amin faa warde hannden, miɗen pelni sanne. Saabe hakkeeji amin de ngattuɗaa min e juuɗe laamiiɓe leydi njananndi, minen e laamiiɓe amin e almaami'en amin. Ɓe mbari woɓɓe amin, ɓe teeti ko min ngoodi, ɓe nanngi min, ɓe njaari min ley maccangaaku nder leydi njananndi. Ɓe torri min, ɓe cemtini min faa warde hannden. 8 Ammaa joonin ley wakkati seeɗa o, aan Laamɗo Joomiraaɗo amin, a waɗanii min moƴƴere ko keddanɗaa min ƴuwdi seeɗa faa min tabita nokku o, ley suudu maaɗa seniindu. A semmbinɗinii ɓerɗe amin, a meeɗinii min ndeenaagu e hinney ley maccangaaku amin. 9 Fay ko min laatii maccuɓe ɗum fu, Laamɗo amin, a seedaay e amin. A waɗii du kaananke Persi waɗanii min ko wooɗi. A semmbiɗinii min faa min nyiɓitoo suudu maaɗa seniindu, min moƴƴintina ndu ɗo ndu fusanoo. A hokkii min to min ɗuwoo nder leydi Yahuuda e huɓeere Urusaliima.
10 Wooɗi joonin, yaa Laamɗo amin, ɗume min mbaawi wi'ude ma? Min njoppii jamirooje maaɗa, 11 ɗe njamirɗaa min e kunnduɗe maccuɓe maaɗa annabaaɓe, de mbi'uɗaa: «Leydi ndi naatoton faa njeyton ndiin, wo leydi tuunundi saabe golle tuunɗe ɗe yimɓe mayri ngaɗata. Ɓe kebbiniri ndi ko nyiddinii e golleeji maɓɓe ɗaayɗi gilla gere oo ɗo faa yaade oo to. 12 Saabe majjum, taa ɓaŋanon sukaaɓe mooɗon worɓe sukaaɓe maɓɓe rewɓe, wooɗi du, taa accon sukaaɓe mooɗon rewɓe ndewlee sukaaɓe maɓɓe worɓe. Taa muuyanee ɓe fuu ko wooɗi faa abada. Si on ngaɗii ko mbiimi on ɗuum fu, on laatoto semmbinɗinɓe, on nyaaman barke leydi ndiin, wooɗi du, ɓiɓɓe mooɗon ndonan ndi, ndi laatoo dongu muɓɓen faa abada.»
13 Fay ko ɗum fuu ɗum hewtii min saabe golle amin bonɗe, e feloore mawnde wonde dow amin, miɗen anndi aan Laamɗo amin, a yurmake min, a torraay min fodde no hakkeeji amin keewiri. A heddanii min ƴuwdi seeɗa. 14 Ndelle, noy min puɗɗitirta wosaade jamirooje maaɗa, min ɓaŋundura e yimɓe gollooɓe ko nyiddinii ɓeen? Si min ngaɗii noon katin fu, ina haani kalkiraa min tikkere maaɗa, taa ƴuwdi amin heddo fay seeda. 15 Yaa Joomiraaɗo, Laamɗo Israa'iila, aan, wo a dartiiɗo sabo a heddanii min ƴuwdi seeɗa. Inan miɗen ndarodii e pelooje amin yeeso maaɗa, fay ko tawaa saabe majje gooto amin fu haanaa daraade yeeso maaɗa.