Ardiiɓe cuuɗi ƴuuruɓe e maccangaaku ngarti
8
1 Inan inɗe ardiiɓe cuuɗi Israa'iilankooɓe ɓe ƴuuridimmi maccangaaku leydi Baabiila, ley jamaanu Artajerjes kaananke Persi.2-3 Ley suudu Pinehas wo Geresom,
ley suudu Itamar wo Daniyiila,
ley suudu Daawda wo Haatus ɓii Sekaniya.
Ley suudu Paroos wo Jakariya. O limidaa e worɓe 150 fodde maamiraaɓe maɓɓe.
4 Ley suudu Pahat-Mo'ab wo Elihoyeenay ɓii Jaraahiya woni ardiiɗo. O wartidi e worɓe 200.
5 Ley suudu Jattu wo Sekaniya ɓii Yahajiyel. O wartidi e worɓe 300.
6 Ley suudu Aadin wo Ebed ɓii Yonatan. O wartidi e worɓe 50.
7 Ley suudu Elam wo Yesaya ɓii Ataliya. O wartidi e worɓe 70.
8 Ley suudu Safatiya wo Jebadiya ɓii Miikayel. O wartidi e worɓe 80.
9 Ley suudu Yo'ab wo Obadiya ɓii Yahiyel. O wartidi e worɓe 218.
10 Ley suudu Baanii wo Seloomit ɓii Yoosifiya. O wartidi e worɓe 160.
11 Ley suudu Bebay wo Jakariya ɓii Bebay. O wartidi e worɓe 28.
12 Ley suudu Asgeda wo Yohanan ɓii Hakkataan. O wartidi e worɓe 110.
13 Ley suudu Adoniikam wo Elifelet e Yaa'iyel e Semaya, kamɓe ngoni sakitiiɓe. Ɓe ngartidi e worɓe 60.
14 Ley suudu Bigway wo Uutay e Jakuura. Ɓe ngartidi e worɓe 70.
No Isira heɓiri Lewinkooɓe gollooɓe gollal Suudu Dewal Mawndu
15 Ndeen kawrondirmi yimɓe ɓeen fuu daande gooruwol iloowol yaade huɓeere Ahawa. Min koɗiri toon balɗe tati. Ndaarumi ley yimɓe ɓeen e ley almaami'en, de mi yi'aay Lewinkooɓe hakkunde maɓɓe. 16 Ndeen ngaɗumi Eliyajar e Aariyel e Semaya e Elnatan e Yaarib e Elnatan e Natan e Jakariya e Meesullam nodduwaa. Kamɓe ngoni ardiiɓe. Ngaɗumi Yooyarib e Elnatan ekintinooɓe ɓeen du nodduwaa. 17 Ndeen nelumi ɓe to Iddo ardiiɗo huɓeere Kaasifiya. Kollumi ɓe ko ɓe mbi'ata ɗum, kam e sakiraaɓe muuɗum gollooɓe gollal Suudu Dewal Joomiraaɗo wonɓe toon. Mbi'imi ɓe mbi'a Iddo oon e sakiraaɓe muuɗum nelda min gollooɓe faa ngolla ley Suudu Dewal Laamɗo amin seniindu. 18 Saabe hinney Laamɗo amin na wondi e amin, ɓe neldi min Seraabiya baawɗo gollal ƴuuruɗo e suudu Makli ɓii Lewi, taan Yaakuuba. O wardi e ɓiɓɓe makko e sakiraaɓe makko. Ɓe fuu wo ɓe 18. 19 Katin ɓe neldi min Hasaabiya e Yesaya ƴuuruɗo e suudu Merari e sakiraaɓe muuɗum e ɓiɓɓe muɓɓen. Ɓe fuu wo ɓe 20. 20 Katin ina woodi gollooɓe 220 Suudu Dewal Mawndu toon, iri ɓe kaananke Daawda e mawɓe wallooɓe ɗum cuɓinoo faa mballa Lewinkooɓe e golle muɓɓen. Inɗe maɓɓe mbinndaa.
No Isira ardorii yimɓe ley suumayeere e du'aare
21 Ɗakkol gooruwol Ahawa toon, njamirmi lenyol ngool fuu suumoo faa min leeƴina ko'e amin yeeso Laamɗo heɓa o walla min, o reena min ley jahaangal ngal min njahata, minen e ɓiɓɓe amin e ko min ngoodi fuu. 22 Mi yamiri ɗum sabo miɗo semta ŋaaraade kaananke hokka min sordaasiiɓe yahooɓe e koyɗe e waɗɗiiɓe pucci faa ɗowta min taa wayɓe amin paloo min dow laawol, sabo min mbi'iino mo ko baawɗe Laamɗo amin na ngonndi e kooliiɗo ɗum fu, tikkere muuɗum nyanngunde du, na woni dow saliiɓe jokkude ɗum. 23 Saabe majjum min cuumii, min ŋaarii Laamɗo amin reena min. Kam du, nani du'aare amin, de jaabii min.
Dokke saabe nyiɓugol Suudu Dewal Mawndu
24 Caggal ɗuum, cuɓiimi hooreeɓe almaami'en sappo e ɗiɗo. Ɓeen ngoni: Seraabiya e Hasaabiya e sakiraaɓe muɓɓen sappo. 25 Ponndumi yeeso maɓɓe cardi e kaŋŋe e kujje ɗe kaananke e tinndinooɓe muuɗum e hooreeɓe leydi muuɗum e ko Israa'iilankooɓe wonɓe toon ɓeen kokki saabe Suudu Dewal Laamɗo amin seniindu. 26 Inan ko ponndumi kokkumi almaami'en ɓeen faa ndaarana ɗum:
Talantiiji cardi 650 (ɗum wo kilooji 22 100),
kujje gaɗiraaɗe cardi talantiiji 100 (ɗum wo kilooji 3 400),
talantiiji kaŋŋe 100,
27 le'e kaŋŋe 20 ɗe coggu muɓɓen laatii buuɗi kaŋŋe 1 000,
e le'e njamndi mboɗeeri ɗiɗi ɗelkooje sanne korsuɗe hono kaŋŋe.
28 Ndeen mbiimi ɓe: Wo on seniiɓe saabe Joomiraaɗo; hono noon, le'e cardi e ɗe kaŋŋe ɗe du laatorii ko senii, kanjum hokkiraa yardaamuye saabe Joomiraaɗo, Laamɗo maamiraaɓe mooɗon. 29 Ndeenee ɗum faa wooɗa faa nde njottinɗon ɗum Urusaliima, ponnduɗon ɗum yeeso almaami'en e Lewinkooɓe e ardiiɓe lenyol Israa'iila ley Suudu Dewal Joomiraaɗo. 30 Ndeen almaami'en e Lewinkooɓe njaɓi dolle cardi e kaŋŋe e le'e kaŋŋe ɗeen faa njaara ɗe Urusaliima ley Suudu Dewal Laamɗo toon.
31 Ley sappo e ɗiɗi lewru go'aɓurdu, min ummii daande gooruwol Ahawa yaade Urusaliima, juuɗe Laamɗo amin ina ndeeni min, o danni min e juuɗe wayɓe amin e taƴotooɓe laabi. 32 Min njottii Urusaliima, min powtiri balɗe tati. 33 Ley nyalaande nayaɓerde, cardi ndiin e kaŋŋe oon e le'e ɗeen fuu ponndaa ley Suudu Dewal Laamɗo amin, de kokkaa almaami Merimoot ɓii Uriyahu e Eliyajar ɓii Pinehas e Lewinkooɓe ɗiɗo wonduɓe e maɓɓe, ɓeen ngoni Yoojabad ɓii Yesuwa e No'aadiya ɓii Binuuyi. 34 Kulle ɗeen fuu ponndaa, limaa, de teddeefi muɓɓen winndaa.
35 Ƴuuruɓe e maccangaaku ngarti ɓeen cakkani Laamɗo Israa'iila sadaka buleteeɗo. Ɓe cakki nga'i 12 saabe Israa'iilankooɓe fuu, e jawɗi 96 e njawkoy 77, e damɗi 12 saabe suddugol hakkeeji. Ɗum fuu ɗum laatii sadaka bulanteeɗo Joomiraaɗo. 36 Ɓe kokki battaa'en kaananke e goforneere'en Fonngo Maayo Efrat ɓataaki ki Artajerjes kaananke Persi winndi kiin. Ndeen wallooɓe kaananke ɓeen e goforneere'en kokki Israa'iilankooɓe ballal e ko haanani Suudu Dewal Laamɗo nduun fu.