No Isira e yimɓe muuɗum njottorii Urusaliima
7
1 Duuɓi keewɗi caggal ɗuum, ley laamu Artajerjes kaananke Persi, Isira warti Urusaliima. Inan maamiraaɓe makko: Isira ɓii Saraaya, Saraaya ɓii Ajariya, Ajariya ɓii Hilkiya, 2 Hilkiya ɓii Sallum, Sallum ɓii Sadook, Sadook ɓii Aahitub, 3 Aahitub ɓii Amaariya, Amaariya ɓii Ajariya, Ajariya ɓii Maraayot, 4 Maraayot ɓii Jaraahiya, Jaraahiya ɓii Ujji, Ujji ɓii Bukki, 5 Bukki ɓii Abiisuwa, Abiisuwa ɓii Pinehas, Pinehas ɓii Elasar, Elasar ɓii Haaruuna almaami mawɗo.6 Isira oon ƴuuri leydi Baabiila wari, wo o jannguɗo gooduɗo andal manngal dow Tawreeta mo Laamɗo Joomiraaɗo Israa'iila hokkunoo annabi Muusaa. Laamiiɗo hokki Isira ko ŋaarii fuu. Hinney Laamɗo Joomiraaɗo na wondi e makko.
7 Hitaande jeɗɗaɓerde laamu Artajerjes, Isira e woɓɓe ley Israa'iilankooɓe e almaami'en e Lewinkooɓe e yimooɓe e reenooɓe dammbuɗe e gollooɓe ley Suudu Dewal Mawndu mburtii leydi Baabiila ngarti huɓeere Urusaliima. 8 Ɓe njottii Urusaliima hitaande jeɗɗaɓerde laamu Artajerjes ley lewru joyaɓurdu. 9-10 Go'o lewru go'aɓurdu o fuɗɗi segilaade wurtaade leydi Baabiila. O yottii huɓeere Urusaliima go'o lewru joyaɓurdu, imo watti e hakkillo makko janngugol jamirooje Joomiraaɗo e ɗowtanaade ɗe, faa o ekintina ɗe lenyol Israa'iila. Hinney Laamɗo na wondi e makko.
Ɓataaki ki Laamiiɗo hokki Isira
11 Inan ɓataaki ki Artajerjes kaananke neldi almaami Isira, jannginoowo, jom anndal dow ekintingol e dow jamirooje ɗe Joomiraaɗo hokki lenyol Israa'iila:
12 «Miin Artajerjes kaananke laamiiɓe winndani ma, aan almaami Isira, jom anndal Tawreeta Laamɗo Toowɗo. Jam wonnda e maaɗa. 13 Mi hokkii yamiroore mbiimi Israa'iilankooɓe, fay almaami'en e Lewinkooɓe tawaaɓe ley leydi am, yiɗuɓe yeccaade Urusaliima fu, njokke. 14 Miin e tinndinooɓe am njeɗɗo, min nelii ma njahaa ndaarowa no yimɓe leydi Yahuuda e huɓeere Urusaliima njogorii jamirooje Tawreeta Laamɗo maaɗa, ɗe kalfinaɗaa ɗeen. 15 Wooɗi du, njaara kaŋŋe e cardi e ko kaananke e tinndinooɓe muuɗum kokki faa laatoo sadaka saabe Laamɗo Israa'iila, jooɗiiɗo ley Urusaliima oon. 16 Katin adaa kaŋŋe e cardi e ko keɓuɗaa ley leydi Baabiila fuu, e dokkal ngal Israa'iilankooɓe e almaami'en muɓɓen ngaɗiri yardaamuye saabe Suudu Dewal Laamɗo muɓɓen seniindu wondu Urusaliima ɗuun. 17 Tinnoɗaa coodiraa ceede ɗeen nga'i e jawɗi mawɗi e pamari e alkama e cabijam, de cakkaa ɗum dow hirsirde Suudu Dewal Laamɗo mooɗon toon. 18 Ndeen ko heddii e cardi e kaŋŋe ɗuum, ngolliron ɗum, aan e gollidiiɓe maaɗa fodde ko tawɗon na haani, hono no Laamɗo mooɗon yiɗiri. 19 Ngaddaa le'e gollitirɗe ɗe kokkaɗaa ɗeen ley Suudu Dewal Joomiraaɗo; pukkinaa ɗe yeeso Laamɗo Urusaliima. 20 Ittaa ley ndesaari kaananke, ceede goɗɗe kewtuɗe gollude gollal ley Suudu Dewal Laamɗo maaɗa seniindu. 21 Miin, kaananke Artajerjes, miɗo yamira on, onon resooɓe ceede leydi Fonngo Maayo Efrat, kokkon almaami Isira oon ko haajaa fuu. Wooɗi du, taa kanndon mo. 22 Kokkon mo cardi kilooji 3 400 e bootooji alkama 220 e cabijam liitereeji 44 000 e nebbam jaytun paali 600 e lamɗam fodde no o haajora. 23 Huunde ko Laamɗo Toowɗo yamirii waɗee saabe suudu muuɗum fu, ɗum waɗiree no haaniri pay, taa kaananke e laamu muuɗum e ɓiɓɓe muuɗum pooɗanee tikkere Laamɗo. 24 Katin du, ceede lampo, maa ceede doonyugol maa ceede laawol, taa jaɓee to almaami'en maa to Lewinkooɓe maa to yimooɓe maa to reenooɓe dammbuɗe maa to gollooɓe ley Suudu Dewal Laamɗo heddiiɓe fuu.
25 Aan Isira du, ngolliraa hakkillo ngo Laamɗo maaɗa hokki ma, cuɓoɗaa hiitotooɓe annduɓe jamirooje Laamɗo maaɗa waawɓe ekintinde ɗe ɓe anndaa ɗe ɓeen. Ɓe keddoo iɓe ngolla gollal hiitaade yimɓe Fonngo Maayo Efrat. 26 Neɗɗo caliiɗo ɗowtanaade jamirooje Laamɗo maaɗa e jamirooje am, min kaananke fu, joomum hiitorte jamirooje. Joomum waree, maa wurtinee ley leydi, maa torree, maa ko woodi fu teetee, maa du joomum kasee.»
No Isira maniri Laamɗo
27 Ndeen Isira yimi, wi'i:
Jettooje ngoodani Laamɗo Joomiraaɗo mo maamiraaɓe meeɗen,
meemuɗo ɓernde kaananke de waɗi o teddini Suudu Dewal Joomiraaɗo wonndu Urusaliima.
28 Kanko waɗi keɓumi hinney to kaananke,
e to tindinooɓe muuɗum,
e to ardiiɓe konunkooɓe muuɗum.
Miin e hoore am, mi heɓii semmbinɗineede,
juuɗe Joomiraaɗo na ngoni dow am
saabe ɗum de keɓumi ardiiɓe cuuɗi Israa'iilankooɓe njaadumi.