No ɓataaki ki kaananke Koores winndunoo kiin yiitiraa
6
1 Kaananke Daariyus yamiri yimɓe pilii ley suudu reenirdu dewte Baabiila to ɗereeji kabaaru Suudu Dewal Mawndu nduun ndesaa. 2 De ley huɓeere Aahimeta, huɓeere mawnde wonnde nder leydi Mediya ɓe njiiti ɓataaki kiin. Inan ko winndaa ley makki:3 «Ley hitaande go'aɓerde laamu Koores, o yamiri yimɓe puɗɗita nyiɓitagol Suudu Dewal Laamɗo nder Urusaliima. Ɓe nyiɓitoo ndu nokkuure to kirsamaaji ngaɗetee, ndu nyibitee dow darorɗe mayru arandeeje. Tooweefi mayru waɗa piyanɗe 60. Njaajeefi mayru du fota noon. 4 Inan no maadi ndiin waɗirtee: Guurti kaaƴe cehaaɗe tati e guurtol leɗɗe cehaaɗe ɗe ngolliraakano tafon. Ceede gollal ngaal ittee ley ndesaari kaananke, de gollooɓe ɓeen njoɓee. 5 Ndeen le'e ɗe kaananke Nebukanesar adunoo ley Suudu Dewal Laamɗo, nder huɓeere Urusaliima, de yaari resowi Baabiila ɗeen fuu, njeccinee to ngonnoo ley suudu toon. 6 Joonin aan Tatenay goforneer Fonngo Maayo Efrat e Satar-Bojanaay e gollidiiɓe mooɗon e mawɓe Fonngo Maayo Efrat, on fuu mboɗɗoɗon ɓe. 7 Itton kunnduɗe mooɗon e haala gollal nyiɓitagol suudu nduun ngaal faa ngal yaha yeeso. Njoppee goforneere'en e Alhuudiyankooɓe e mawɓe muɓɓen nyiɓitoo Suudu Dewal Laamɗo nduun to wonnoo arande toon. 8 Miɗo yamira on ngaɗon huunde fuu ko mbaawɗon faa mballon mawɓe Alhuudiyankooɓe ɓeen, faa ɓe puɗɗita nyiɓitaade Suudu nduun. Katin itton ley ceede leydi ɗe yimɓe Fonngo Maayo Efrat njoɓi ɗeen, njoɓon gollooɓe ɓeen taa gollal ngaal daroo. 9 Kokkon ɓe ko ɓe kaajaa nyannde fuu. Ko ɓe kaajaa hono nga'i maa jawɗi maa damɗi faa ɓe ngaɗa sadaka buleteeɗo, maa alkama maa lamɗam maa cabijam maa nebbam jaytun, kokkon ɓe ɗum faa ɓe cakkana Laamɗo Toowɗo. 10 Ɓe cakkana mo, sadaka belnoowo ɓernde makko de ɓe ngaɗana kaananke e ɓiɓɓe muuɗum du'aare faa keɓa barke. 11 Mi hokkii konngol, mbiimi: bosiiɗo ko mbiimi ngaɗon ɗuum, maa du baylitinɗo ɗum fu, yimɓe naata ley ɓaade muuɗum, ɗoofa leggal, de ɗisa ɗum e maggal. Katin ɓe pusa ɓaade joomum faa nde laato joorde tuundi. 12 Laamɗo tabintinɗo innde muuɗum ley Suudu Dewal Mawndu wonndu Urusaliima oon, sankita laamu leydi maa kaananke fuu jiɗuɗo halkude ndu. Miin Daariyus kaananke, mi waɗii ɗum yamiroore. Na tilsi neɗɗo fuu reena nde faa wooɗa.»
Iidi timmingol gollal e senugol Suudu Dewal Laamɗo
13 Tatenay goforneer Fonngo Maayo Efrat e Satar-Bojanaay e gollidiiɓe muɓɓen ngaɗi ko kaananke Daariyus yamiri ɗuum fuu. 14 Mawɓe Alhuudiyankooɓe njehi yeeso e gollal ngaal. Annabi Agay e annabi Jakariya ɓii Iddo cemmbinɗini ɓe, de kamɓe du ɓe njehi yeeso e gollal ngaal, faa ɓe timmini maadi ndiin hono no Laamɗo Israa'iila wi'iri noon, e fodde ko Koores e Daariyus e Artajerjes laamiiɓe Persi njamiri. 15 Ɓe timmini nyiɓitaade suudu nduun tati lewru Adar, ley hitaande jeegoɓerde laamu Daariyus.a 16 Ndeen yimɓe Israa'iila e almaami'en e Lewinkooɓe e yimɓe heddiiɓe ƴuuruɓe e maccangaaku ngarti fuu, ceyii, ngaɗi iidi senugol Suudu Dewal Laamɗo nduun. 17 Nyannde iidi oon, ɓe cakki nga'i kalahali 100 e jawɗi baali 200 e ɓiɓɓe baali 400. Katin e damɗi be'i 12 saabe suddugol hakkeeji cuuɗi Israa'iilankooɓe sappo e ɗiɗi ɗiin. 18 Ndeen ɓe kalfini almaami'en golle muɓɓen, waaldeere fu e golla mum. Lewinkooɓe du kalfinaa golle muɓɓen, waaldeere fu e gollal mum faa ngaɗa gollal Laamɗo ley Urusaliima hono no winndiraa ley Tawreeta Muusaa noon.
No Iidi Faltagol waɗiraa
19 Ƴuuruɓe e maccangaaku ngarti ɓeen ngaɗi iidi Faltagol nyannde sappo e nay lewru go'aɓurdu. 20 Almaami'en e Lewinkooɓe laaɓinii ko'e muɓɓen, ɓe fuu ɓe laati laaɓuɓe. Ndeen ɓe ngaɗi sadaka iidi Faltagol saabe ƴuuruɓe e maccangaaku ngarti ɓeen, e saabe almaami'en woɓɓe, e saabe kamɓe e ko'e maɓɓe. 21 Israa'iilankooɓe ƴuuruɓe e maccangaaku ngarti ɓeen nyaami nyaamdu seniindu. Ɓe nyaami kamɓe e yimɓe hawtuɓe e maɓɓe e seniinde ko'e muɓɓen e ko diina haɗi fuu, ko lenyi e leyɗe goɗɗe ngaɗata. Ɓe ngaɗi noon faa ɓe ɗowtanoo Laamɗo Joomiraaɗo Israa'iila. Ɓe nyaami teewu sadaka iidi Faltagol. 22 Katin du, ɓe ngaɗi Iidi buuru mo wattaaka rabilla faa hewti balɗe jeɗɗi ley seyo, sabo Joomiraaɗo hokkii ɓe seyo nde meemunoo ɓernde Koores kaananke Asuura de walli ɓe dow nyiɓitaade Suudu Dewal Laamɗo Israa'iila.