No gollal nyiɓitagol Suudu Dewal Mawndu ngal fuɗɗitiraa
5
1 Ley balɗe ɗeen, annabi Agay e annabi Jakariya ɓii Iddo, ngaɗi annabaaku e innde Laamɗo Israa'iila dow Alhuudiyankooɓe leydi Yahuuda e wonɓe huɓeere Urusaliima. 2 Ndeen Sorobabel ɓii Seyaltiyel e Yesuwa ɓii Yoosadak, ummii naati gollal mahitaade Suudu Dewal Laamɗo ley huɓeere Urusaliima. Annabaaɓe ɓeen njokki gaɗa maɓɓe ina mballa ɓe. 3 Wakkati majjum pay Tatenay, goforneer Fonngo Maayo Efrat e Satar-Bojanaay e gollidiiɓe muɓɓen ngari Urusaliima, njottii to mahitotooɓe suudu nduun ɓeen. Ɓe ƴami ɗum'en:— Moy yamiri on nyiɓitaade Suudu Dewal Mawndu ndu e moƴƴingol kokuuji mayru?
4 Katin ɓe ƴami ɗum'en:
— Noy woni inɗe gollooɓe gollal nyiɓitagol ɓeen?
5 Ammaa baawɗe Laamɗo ina ngondi e hooreeɓe Alhuudiyankooɓe. Saabe ɗuum ɓe kaɗaay ɗum'en gollude gollal nyiɓitagol ngaal faa ɓataaki dow majjum yotti to kaananke Daariyus, faa kam on du, jaabori ɓe ɓataaki. 6 Inan ko winndaa ley ɓataaki ki Tatenay goforneer Fonngo Maayo Efrat e Satar-Bojanaay e gollidiiɓe muɓɓen, ardiiɓe Fonngo Maayo Efrat, neldi kaananke Daariyus:
7 «Daariyus kaananke, min njowtii ma. 8 Miɗen njiɗi anndinde kaananke, min njehii leydi Yahuuda to Suudu Dewal Laamɗo jom teddeengal. Indu nyiɓitoree kaaƴe lobbe cehaaɗe, wooɗi leɗɗe ina ngattee gereeji mayru. Gollal ngaal na golliree no wooɗiri, ingal yara yeeso. 9 Min ƴamii ardiiɓe lenyol ɓeen moy yamiri ɗum'en nyiɓitaade suudu nduun e moƴƴintinde ndu. 10 Katin min ƴamii inɗe ardiiɓe ɓeen faa min mbinndane ɗe, 11 de ɓe njaabii min, ɓe mbi'i: ‹Minen wo min maccuɓe Laamɗo Toowɗo, jom kammu e leydi. Miɗen nyiɓitoo Suudu Dewal Laamɗo mawndu ndu gooto e kaanankooɓe Israa'iila mawɗo nyiɓunoo ley ɗuuɓi keewɗi bittiiɗi. 12 Ammaa saabe maamiraaɓe amin ngaɗiino ko boni, ɓernde Laamɗo Toowɗo metti, de watti ɓe ley juuɗe Nebukanesar Kaldiyanke, laaminooɗo Baabiila. Oon fusi suudu nduun de nanngi yimɓe ɓeen, yaari maccangaaku ley leydi Baabiila. 13 Ammaa ley hitaande go'aɓerde laamu Koores kaananke Baabiila, o yamiri min nyiɓitoo Suudu Dewal Laamɗo nduun. 14 Katin o waɗi le'e kaŋŋe e cardi ɗe Nebukanesar adunoo yaari wattoy ley suudu alla'en muuɗum leydi Baabiila ɗeen, ngartiraa ley Suudu Dewal Mawndu nder huɓeere Urusaliima. O waɗi ɗe kokkaa gorko bi'eteeɗo Sesabasar mo o waɗunoo goforneer, faa yeccina ɗe Urusaliima. 15 Koores kaananke wi'i mo: Adu le'e kaŋŋe e cardi ɗe, njeccinaa ɗe huɓeere Urusaliima, ndesaa ɗe ley Suudu Dewal Laamɗo, de suudu nduun nyiɓitee to wonnoo arande toon. 16 Ndeen Sesabasar yehi fuɗɗi darnude nyimngo mayru ley huɓeere Urusaliima. Gilla ndeen suudu nduun na nyiɓitee faa joonin ndu timminaaka.›
17 «Ndelle si kaananke yardake fu, waɗa yimɓe piloo ley suudu reenirdu dewte wonndu ley Baabiila nduun, ɓe ndaara si goonga kaananke Koores yamiri Suudu Dewal Laamɗo seniindu nduun nyiɓitee Urusaliima naa yamiraay. Ndeen si kaananke yardake fu, nela min kollee ko yamiri min ngaɗa.»