No yimɓe leydi ndiin pilorii haɗude nyiɓitagol Suudu Dewal Mawndu nduun.
4
1 Nde wayɓe Yahuuda e Benyamin nannoo ƴuuruɓe ley maccangaaku ngarti ɓeen na nyiɓana Laamɗo Joomiraaɗo Israa'iila Suudu Dewal Mawndu fu, 2 njehi to Sorobabel e to mawɓe lenyol, mbi'i ɗum'en:— Accee kawten ngollen gollal maadi Suudu Dewal Joomiraaɗo ngaal sabo minen du, miɗen ɗowtanoo Laamɗo mooɗon. Wooɗi du, min mbooyidii e sakkande mo kirsamaaji, gilla jamaanu Esara-Hadon kaananke Asuura gaddunooɗo min ɗo.
3 Ndeen Sorobabel e Yesuwa e mawɓe ardiiɓe lenyol Israa'iila ɓeen njaabii ɓe, mbi'i:
— Walaa fu ko hawti en dow nyiɓangol Laamɗo amin Suudu Dewal Mawndu. Minen tan njeyi nyiɓande Laamɗo Joomiraaɗo Israa'iila suudu nduun, hono no Koores kaananke Persi wi'iri min noon.
4 Ndeen ɓe puɗɗi hulɓinde e mettinde ɓerɗe yimɓe Yahuuda faa ndarna gollal ngaal. 5 Ɓe njeeni tinndinooɓe kaananke Persi ceede, de ɓeen kaɗi yimɓe Yahuuda nyiɓude Suudu Dewal Mawndu nduun gilla e laamu Koores kaananke Persi faa yottii laamu Daariyus.
6 Ley puɗɗam laamu Jerjes,a yimɓe ɓeen mbinndi ɓataaki peli yimɓe Yahuuda e yimɓe Urusaliima. 7 Wooɗi, e ley laamu Artajerjesb kaananke Persi du, Bisilam e Mitreedat e Tabe'el e yigiraaɓe muɓɓen mbinndani ɗum ɓataaki e Araminkoore de ki nantinaa e haala muuɗum. 8 Rehum ardiiɗo konunkooɓe e Simsaay binndoowo, mbinndi ɓataaki kiin, peli yimɓe Urusaliima to kaananke Artajerjes. Inan ko ɓe mbinndi:
9 «Ɓataaki ki, to amin ƴuuri miin Rehum ardiiɗo konunkooɓe e Simsaay binndoowo e gollidiiɓe amin e yimɓe Din e Afarsatak e Tarpel e Persi e Ereka e Baabiila e yimɓe Susa ɓeen ngoni Elaminkooɓe, 10 e lenyi goɗɗi ɗi Osnapaar kaananke inndirteeɗo Mawɗo Tedduɗo nangoynoo waddi yoppi ley gure leydi Samariya e leyɗe keddiiɗe gonɗe Fonngo Maayo Efrat. 11 Laamɗo reene, aan Artajerjes, kaananke mawɗo! Minen maccuɓe maaɗa wonɓe Fonngo Maayo Efrat, min njowtii ma. 12 Miɗen njiɗi kaananke faama Alhuudiyankooɓe ƴuwɓe to muuɗum ɓeen njottake huɓeere Urusaliima faa puɗɗii nyiɓitaade nde, kayre laatiinde huɓeere bonde, muurtoore. Ɓe ɓadake timminde nyiɓitagol kokuwol piiliingol nde ngool. Ɓe puɗɗii moƴƴinde joƴƴinirɗe maadi mayre. 13 Ndelle, Laamiiɗo na haani annda faa laaɓa, si yimɓe ɓeen mbaawii njottini gollal nyiɓitagol huɓeere ndeen e kokuwol piiliingol nde ngool fu, ɓe njoɓataa ceede leydi katin, ɗum woni ceede lampo e ceede doonyugol e ceede laawol. Ndeen walaa ceede ƴuurooje to maɓɓe de naata ley leydi maaɗa katin. 14 De saabe ko min keɓi nafaa laamu maaɗa ɗuum, haanaa min acce, aan kaananke, njaweɗa. Ɗum saabi, miɗen mbinndane dow majjum. Laamɗo reene! 15 Sanaa piloɗaa ley ɗereeji ɗi maamiraaɓe maaɗa mbinndunoo, a yi'an ley toon kabaaru huɓeere ndeen; wo nde huɓeere muurtoore. Wooɗi du, inde laatanii laamiiɓe e goforneere'en tooke. Rafi nanɗe mayre mettinii ɓerɗe laamiiɓe heewɓe. Kanjum saabi de nde helanoo. 16 Saabe ɗum de, miɗen mbi'e, aan kaananke, si huɓeere ndeen e kokuwol piiliingol nde ngool nyiɓitaama fu, a waasan ngeɗu kujje Fonngo Maayo Efrat keewɗe.»
17 Laamiiɗo neldi jaabagol muuɗum, wi'i:
«Miɗo jowta Rehum ardiiɗo konunkooɓe e Simsaay binndoowo e gollidiiɓe muɓɓen wonɓe Fonngo Maayo Efrat: yimɓe huɓeere Samariya e gure keddiiɗe.
18 Ɓataaki ki nelduɗon kam kiin nantinaama, de njannganaami ki. 19 Mi waɗii yimɓe ndaarii tawii gilla jamaanu paltiiɗo, huɓeere ndeen salake waɗude ko laamiiɓe mbi'i. Wo nde muurtoore, haɓeteende. 20 Laamiiɓe mawɓe laamake huɓeere ndeen. Ɓe ndawrani gure gonɗe Fonngo Maayo Efrat fuu. Yimɓe gure ɗeen na njoɓannoo ceede lampo e ceede doonyugol e ceede laawol. 21 Ndelle njamiree yimɓe ɓeen ndarna gollal nyiɓitagol huɓeere ndeen, si wanaa miin yamiri ɗum. 22 Kakkilee wooɗa, ɗowtanoɗon ɗum law, taa bonanda hewta laamu am.»
23 Nde Rehum e Simsaay binndoowo e gollidiiɓe muɓɓen njanngananoo ɓataaki ki kaananke Artajerjes neldi kiin fu, wakkati oon pay, ɓe ndilliri huɓeere Urusaliima to Alhuudiyankooɓe toon e haraare. Ɓe ndoolɗi ɗum'en ndarna gollal nyiɓitagol ngaal. 24 Noon gollal Suudu Dewal Laamɗo ngaal darorii ley Urusaliima faa hitaande ɗiɗaɓerde laamu Daariyus kaananke Persi.