Fuɗɗitingol golleeji teddinooji Joomiraaɗo
3
1 Nde lewru jeɗɗaɓurdu darinoo, Israa'iilankooɓe wartuɓe njooɗii ley gure muɓɓen ɓeen fuu kawriti ley huɓeere Urusaliima. 2 Ndeen Yesuwa ɓii Yoosadak e sakiraaɓe muuɗum almaami'en e Sorobabel ɓii Seyaltiyel e sakiraaɓe muuɗum, ummii nyiɓani Laamɗo Israa'iila hirsirde to sadaka buleteeɗo waɗetee hono no winndiraa ley Tawreeta Muusaa maccuɗo Laamɗo noon. 3 Fay ko ɓe kuli yimɓe jooɗiiɓe ley leydi ndiin ɗuum fu, ɓe nyiɓitake hirsirde ndeen to wonnoo arande toon. Ndeen ɓe puɗɗi sakkande Joomiraaɗo subaka e laasara. 4 Ɓe ngaɗi Iidi Hukumuuji hono no winndira, ɓe ngaɗi sadaka nyannde fuu hono no jeyi waɗireede. 5 Caggal ɗuum ɓe keddii e waɗude sadaka buleteeɗo nyannde fuu, e sadaka gaɗeteeɗo saabe iidi daragol lewru e iri iidiiji ɗi Joomiraaɗo haani waɗaneede fuu. Katin, ɓe kokki dokke yardaamuye ɗe yimɓe ngaddanta Joomiraaɗo. 6 Gilla nyannde go'aɓerde lewru jeɗɗaɓurdu ɓe puɗɗi waɗande Joomiraaɗo sadaka buleteeɗo, tawi fay darnugol joƴƴinirɗe Suudu Dewal Mawndu nduun fuɗɗaaka tafon.Puɗɗam nyiɓitagol Suudu Dewal Mawndu
7 Wartuɓe ɓeen kokki njobdi mahooɓe e sehooɓe. Katin, ɓe kokki yimɓe Sidon e Tirus neema e cabijam e nebbam jaytun faa ittowa leɗɗe seddere gilla leydi Liban, njokka maayo, de ngadda ɗe huɓeere Joffe, hono no kaananke Koores yamiri noon. 8 Ley ndunngu ɗiɗaɓu caggal ko ɓe ngarti Suudu Dewal Laamɗo nder Urusaliima, ɗiɗi lewru, Sorobabel ɓii Seyaltiyel e Yesuwa ɓii Yoosadak e sakiraaɓe muɓɓen almaami'en e Lewinkooɓe, e yimɓe heddiiɓe yoofaaɓe ngarti Urusaliima fuu puɗɗi gollude. Ɓe cuɓii Lewinkooɓe, gilla mo duuɓi noogay faa yaade ɓurɓe noon, ɓe ngaɗi ɗum'en ndaaranooɓe gollal nyiɓitagol Suudu nduun. 9 Ndeen Yesuwa e ɓiɓɓe muuɗum e sakiraaɓe mum, e Kadamiyel e ɓiɓɓe mum e ɓiɓɓe Yahuuda, katin e ɓiɓɓe Henaadad e taaniraaɓe muuɗum e sakiraaɓe muɓɓen Lewinkooɓe ndaarani gollal suudu nduun. 10 Nde nyiɓooɓe ɓeen puɗɗunoo joƴƴinde maadi suudu nduun fu, almaami'en du ɓornii kolte gollal muɓɓen, ina njogii luwe puufeteeɗe. Hono noon Lewinkooɓe ɓiɓɓe Asaafu du fuu njogorii jamɗe cenƴinteeɗe na ndarii, na mana Joomiraaɗo hono no Daawda kaananke Israa'iila wiirunoo noon. 11 Ɓe njimi ɓe teddini Joomiraaɗo, ɓe njetti ɗum, ɓe mbi'i:
Joomiraaɗo wo lobbo. Yidde nde yiɗi Israa'iilankooɓe ndeen timmataa!
Ndeen yimɓe fuu ƴeewnii, mani Joomiraaɗo saabe joƴƴingol maadi Suudu Dewal Mawndu nduun. 12 Ammaa nayeeɓe heewɓe ley almaami'en e Lewinkooɓe e ardiiɓe cuuɗi feere feere annduɓe no suudu nduun wa'unoo arande, mboyi e semmbe muɓɓen nde njiinoo joƴƴingol maadi mayru. Woɓɓe du njimiri e semmbe saabe seyo. 13 Yimɓe mbaawaay senndude daaɗe yimooɓe e woyooɓe, sabo ɓe peekake sanne faa duko koon nanaa to woɗɗi.