Yahugol Nehemiya Urusaliima
2
1 Hitaande noogayaɓerde laamu Artajerjes, nyannde gomma ley lewru Nisana, cabijam waddaa yeeso kaananke. Ndeen adumi yardude cabijam ɗaam, ciiwammi mo, tawi abada mi waraay yeeso makko miɗo ɓalini si wanaa nyannde ndeen. 2 Ndeen kaananke oon ƴami kam:— Ko saabi de aɗa ɓalini faa yeeso maaɗa welaa ndaarude, yalla a sella naa, naa won ko waanni ma?
— Kaananke, mbuuraa faa abada! Na tilsi mi ɓalino sabo huɓeere nde maamiraaɓe am ufaa ley muuɗum ndeen sankitaama, dammbuɗe mayre du mbulaama.
4 Kaananke jaabii kam wi'i:
— Ndelle ɗume njiɗuɗaa?
— Si aan kaananke a yardake miin maccuɗo maaɗa mi heɓa moƴƴere to maaɗa fu, nela kam leydi Yahuuda, ley huɓeere to maamiraaɓe am ufaa toon, mi nyiɓitoo nde.
6 Wakkati kaananke lamndotonoo kam ndeen, o ƴami kam duuɓi foti ngaɗammi toon, ndeye ngartanmi, tawi deekiiko ina jooɗii ɗakkol makko.
Nde kaananke jaɓunoo mi yaha fu, kaalammi ɗum wakkati mo ngartammi. 7 Ŋaariimi mo, o winndana kam ɗereeji faa mi hokka goforneere'en Fonngo Maayo Efrat heɓa njoppa kam mi falto yaade leydi Yahuuda. 8 Katin ŋaariimi mo, o hokka kam ɓataaki faa mi hokka Asaafu deenoowo leɗɗe kaananke faa o hokka kam leɗɗe ɗe kuurirammi cuuɗi gonɗi dammbuɗe Suudu Dewal Joomiraaɗo e gollitirɗe kokuwol piiliingol huɓeere ɗeen, e ɗe ngaɗirammi suudu ɗo ngonammi. Kaananke hokki kam ko ŋaariimi ɗuum fuu, saabe hinney Laamɗo ina wondi e am. 9 Kaananke waɗi konunkooɓe yahooɓe e koyɗe e waɗɗiiɓe pucci ɗowta kam. Nde njottinoomi to goforneere'en Fonngo Maayo Efrat fu, kokkumi ɓe ɗereeji ɗi Kaananke winndani ɓe ɗiin. 10 Ammaa nde Sanbalat Horoonankeejo e Tobiya maccuɗo Amoninkeejo, nannoo ɗum fu, ɓerɗe maɓɓe metti sanne, ngam ɓe njiɗaa fuu goɗɗo wara walla Israa'iilankooɓe.
No Nehemiya semmbinɗiniri mahooɓe
11 Nde njottinoomi Urusaliima faa waali balɗe tati fu, 12 ummiimi jemma, miin e worɓe seeɗa wonduɓe e am, mi adaay fuu goɗɗum si wanaa araawa nga mbaɗɗiimi. Mi hollaay fay gooto ko Laamɗo am watti ley ɓernde am, faa mi waɗana huɓeere Urusaliima. 13 Ley jemma oon, nde mburtinoomi fu, ndewumi dammbugal Naɗɗol Gorgawol, ƴaɓɓoriimi ildude Kuungal, ƴuurumi dammbugal Birgi. Nji'umi no kokuwol piiliingol huɓeere Urusaliima ngol heliraa e no ommbirɗe dammbuɗe maggol ɗeen mbuliraa. 14 Mbittoriimi yeeso yaade dammbugal Ɓuldude e weendu Kaananke ammaa araawa nga mbaɗɗiimi ngaan heɓaay to wittoro saabe laawol ngol na faaɗi nokku on. 15 Mbittoriimi naɗɗol Kidiron nder jemma oon, miɗo ndaara kokuwol ngool. Gaɗa ɗuum njecciimi dammbugal Naɗɗol Gorgawol, ngartumi ley huɓeere ndeen. 16 Hakkunde mawɓe lenyol ɓeen, walaa annduɗo to njahumi, walaa fuu annduɗo ko ngaɗoymi toon. Mi hollaay ɗum Alhuudiyanke fay gooto, maa almaami'en maa mawɓe lenyol maa du gollooɓe heddiiɓe. 17 Nde ngartunoomi fu, mbiimi ɓe:
— Ndaare torra ka ngonɗen ley mum. Urusaliima waɗaama winnde, dammbuɗe mum du bulaama. Ngaree nyiɓitoɗen kokuwol piiliingol huɓeere Urusaliima ngool, faa keɓen mburtoɗen e torra e semteende.
18 Ndeen kaalammi ɓe moƴƴere nde Laamɗo waɗani kam e ko kaananke wi'i kam fu. Wakkati oon pay ɓe mbi'i kam:
— En ummoo puɗɗen gollal nyiɓitaade kokuwol ngool.
Ndeen ɓe ummii, ɓe cegilanii fuɗɗude ngal. 19 Ammaa nde Sanbalat Horoonankeejo e Tobiya Amoninkeejo e Gesem Laarabuujo nannoo ko min anniyii waɗude fu, jalnorii min, ɓe kuyfini min. Ɓe mbi'i:
— Ɗume anniyiiɗon waɗude? Yalla oɗon anniyii umminande Kaananke muurtere naa?
20 Njaabiimi ɓe, mbiimi:
— Laamɗo Toowɗo hokkan min jaalorgal, minen maccuɓe muuɗum, de min puɗɗa gollal ngaal, mi nyiɓitoo kokuwol ngol. De onon le, on ngala ngeɗu, on ngalaano dabare on ngatta ɗum katin faa abada ley huɓeere Urusaliima ɗo.