Nyiɓitaade kokuwol piiliingol huɓeere Urusaliima
3
1 Eliyaasib almaami mawɗo e banndiraaɓe muuɗum almaami'en heddiiɓe puɗɗi nyiɓitaade dammbugal Baali, ɓe ceni ngal, ɓe ngaɗani ngal ommbirɗe. Ɓe nyiɓitii kokuwol ngool faa yottii cuuɗi toowɗi inndirteeɗi Hemre e Hananel. 2 Yimɓe Yeriko nyiɓitii njokkini njaari yeeso. Jakuura ɓii Imiira nyiɓitii jokkini yaari yeeso. 3 Ɓiɓɓe Haasenaya nyiɓitii dammbugal Liƴƴi. Ɓe kuuriri ngal leɗɗe, ɓe ngaɗani ngal ommbirɗe e palal faa ngal ommbiree. 4 Ɗakkol maɓɓe, Merimoot ɓii Uriyahu taan Koos nyiɓitii jokkini yaari yeeso. Ɗakkol makko, Meesullam ɓii Barakiya taan Mesijabeel nyiɓitii jokkini yaari yeeso. Ɗakkol oon, Sadok ɓii Ba'ana nyiɓitii jokkini yaari yeeso. 5 Ɗakkol muuɗum, yimɓe Tekowa nyiɓitii njokkini njaari yeeso, de mawɓe maɓɓe calii leeƴinde ko'e muɓɓen faa natta e gollal ngaal. 6 Yooyad ɓii Paaseha e Meesullam ɓii Besoodiya nyiɓitii dammbugal Yesaana. Ɓe kuuriri ngal leɗɗe, ɓe ngaɗani ngal ommbirɗe e palal faa ngal ommbiree. 7 Ɗakkol maɓɓe, Melaatiya Gibiyankeejo e Yaadon Meronotankeejo e yimɓe huɓeere Gibiyon e yimɓe huɓeere Misifa tawaaɓe ley laamu goforneer Fonngo Maayo Efrat nyiɓitii njokkini njaari yeeso. 8 Ɗakkol maɓɓe, Ujjuyel ɓii Haarihaya tafoowo kaŋŋe nyiɓitii jokkini yaari yeeso. Ɗakkol makko, Hananiya gooto nder waɗooɓe uurdi, nyiɓitii jokkini yaari yeeso. Ɓe nyiɓitii huɓeere Urusaliima faa hewti Kokuwol jaajungol. 9 Ɗakkol maɓɓe, Refaaya ɓii Huur kaananke feccere huɓeere Urusaliima nyiɓitii jokkini yaari yeeso. 10 Ɗakkol makko, Yedaya ɓii Haruumafa nyiɓitii ɗakkol ɓaade muuɗum jokkini yaari yeeso. Ɗakkol makko, Haatus ɓii Haasibuneya nyiɓitii jokkini yaari yeeso. 11 Ndeen Malkiya ɓii Haarim e Haasubu ɓii Pahat-Mo'ab nyiɓitii gere goɗɗo njaari yeeso, faa hewti suudu toowndu Duppirdu Buuruuje. 12 Ɗakkol maɓɓe Sallum ɓii Halohes kaananke feccere huɓeere Urusaliima kam e ɓiɓɓe muuɗum rewɓe nyiɓitii njokkini njaari yeeso. 13 Hanuun e jooɗiiɓe huɓeere Sanowah nyiɓitii dammbugal Naɗɗol Gorgawol. O waɗani ngal ommbirɗe e palal faa ngal ommbiree. Katin ɓe nyiɓitii hirsirde juutunde waɗoore piyanɗe 1 000, faa hewti dammbugal Birgi. 14 Malkiya ɓii Rekaab kaananke huɓeere Bayti-Hakirim nyiɓitii dammbugal Birgi. O waɗani ngal ommbirɗe e palal faa ngal ommbiree. 15 Ndeen Sallum ɓii Kal-Hooje kaananke huɓeere Misifa nyiɓitii dammbugal Ɓuldude. O waɗani ngal ommbirɗe e palal faa ngal ommbiree. Katin o nyiɓitii kokuwol piiliingol weendu Silowam to sardiŋe Kaananke faa yottii jipporde huɓeere Daawda. 16 Yeeso makko, Nehemiya ɓii Aajabuk kaananke feccere huɓeere Bayti-Suura, nyiɓitii gilla yeeso caabeeje Daawda faa hewti weendu wasaandu ɗakkol wuro Konunkooɓe mawɓe. 17 Yeeso oon, Lewinkooɓe nyiɓitiiɓe wo: Rehum ɓii Baanii oon arti, caggal makko Hasaabiya kaananke feccere huɓeere Keyila nyiɓitii jokkini yaari yeeso. O nyiɓitani yimɓe huɓeere makko. 18 Caggal ɗuum sakiraaɓe maɓɓe, Binuyi ɓii Henaadad kaananke feccere huɓeere Keyila heddiinde ndeen, 19 e Ejer ɓii Yesuwa kaananke huɓeere Misifa nyiɓitii njokkini njaari yeeso, faa hewti resirde kaɓitirɗe konunkooɓe to bimmbeere kokuwol toon. 20 Yeeso makko, Baaruki ɓii Jabbay nyiɓitii gere goɗɗo, gilla to bimmbeere ndeen faa hewti dammbugal wuro Eliyaasib almaami mawɗo. 21 Ɗakkol makko, Merimoot ɓii Uriyahu, taan Koos, nyiɓitii gilla dammbugal wuro Eliyaasib faa hewti timmoode wuro ngoon. 22 Caggal makko, almaami'en jooɗiiɓe seraaji huɓeere nyiɓitii njokkini njaari yeeso. 23 Ɗakkol maɓɓe, Benyamin e Haasubu nyiɓitii ɗakkol wuro muɓɓen. Ɗakkol ɓeen, Ajariya ɓii Maaseya, taan Anaaniya, nyiɓitii ɗakkol wuro muuɗum jokkini yaari yeeso. 24 Ɗakkol makko, Binuuyi ɓii Henaadad nyiɓitii gilla wuro Ajariya faa falti bimmbeere, hewtini soɓɓundu kokuwol ngool. 25 Ɗakkol makko, Palal ɓii Ujay nyiɓitii gilla soɓɓundu kokuwol ngool faa hewti suudu reenirdu hawritoyndu e wuro laamiiɗo, ɗakkol galle suudu kasu. Caggal makko, Pedaaya ɓii Paroos nyiɓitii jokkini yaari yeeso. 26 Ndeen gollooɓe ley Suudu Dewal Joomiraaɗo wonɓe waamnde Ofel ɓeen du nyiɓitii gilla lettugal dammbugal Ndiyam faa hewti suudu toowndu tekkindu kokuwol nduun. 27 Caggal maɓɓe, yimɓe huɓeere Tekowa nyiɓitii gilla suudu toowndu nduun faa hewti kokuwol waamnde Ofel. 28 Gilla dammbugal Pucci, almaami fuu nyiɓitii ɗakkol wuro muuɗum yaari yeeso. 29 Ɗakkol maɓɓe, Sadok ɓii Imeer nyiɓitii gilla ɗakkol wuro muuɗum jokkini yaari yeeso. Ɗakkol makko, Semaya ɓii Sekaniya, deenoowo dammbugal Lettugawal nyiɓitii jokkini yaari yeeso. 30 Ɗakkol makko, Hananiya ɓii Salamiya e Hanuun ɓii Salaaf jeegaɓo, nyiɓitii njokkini njaari yeeso, Meesullam ɓii Barakiya nyiɓitii gilla yeeso suudu muuɗum jokkini yaari yeeso. 31 Ɗakkol makko, Malkiya, gooto ley siiwooɓe kaŋŋe nyiɓitii faa hewti wuro gollooɓe Suudu Dewal Mawndu e wuro sonnooɓe, yeeso dammbugal Kawrital, yottaade suudu toowndu, soɓɓundu kokuwol. 32 Ndeen siiwooɓe kaŋŋe e sonnooɓe nyiɓitii gilla suudu nduun faa hewti dammbugal Baali.
Wayɓe Nehemiya
33 Nde Sanbalat nannoo miɗen nyiɓitoo kokuwol ngool fu, ɓernde makko metti sanne. Ndeen o jalnorii Alhuudiyankooɓe. 34 O haaldi e sakiraaɓe makko e sordaasiiɓe Samariya, o wi'i:
— Ɗume Alhuudiyankohoy lokkahoy koy ngaɗata ni? Yalla koy miilii koy nyiɓitoto kokuwol ngool naa? Yalla koy ngaɗan kirsamaaji toon naa? Yalla koy mbaawi timminde nyimngo ngoon nyalaande wootere naa? Yalla koy ngaɗan kaaƴe ittaaɗe e kusaaw, bulaaɗe faa ɓawli ɗeen mbuura katin naa?
35 Tobiya Amoninkeejo tawaaɗo ɗakkol makko oon du wi'i:
— Kokuwol kaaƴe ngol ɓe nyiɓata ngool, fay si waagaaru ƴeenyi dow maggol, ngol helan!
36 Ndeen, ngaɗumi du'aare mbiimi:
— Yaa Laamɗo amin, hettindana min, sabo wo min yawaaɓe. Waɗu jennooje maɓɓe ɗeen caama dow ko'e maɓɓe. Ngaɗa wayɓe maɓɓe nannga ɓe, njaara ɓe maccangaaku. 37 Taa yaafoɗa hakkeeji maɓɓe, taa hakkeeji maɓɓe ɗiin ƴuwa yeeso maaɗa, sabo ɓe toonyake ma yeeso nyiɓooɓe ɓeen.
38 Lenyol ngol na tinnii gollirde e ɓernde mum fuu. Min nyiɓitake kokuwol ngool, min moƴƴintini ngol faa hewti hakkunde tooweefi maggol.