4
1 Ɓernde Sanbalat e Tobiya e Laarabuuɓe e Amoninkooɓe e yimɓe Asidod metti sanne nde nannoo gollal nyiɓitagol kokuwol piiliingol huɓeere Urusaliima na yaara yeeso, nokkuuje maggol caamunoode fuu na moƴƴintinee. 2 Ndeen ɓe kawriti ɓe ndawridi faa ɓe ngara ɓe ummina hakkillooji yimɓe fuu, de ɓe kona huɓeere Urusaliima. 3 Saabe majjum, min ngaɗi du'aare, min ŋaarii Laamɗo amin, wooɗi du, min ngaɗi reenooɓe na ndeena min jemma e nyalooma. 4 Yimɓe Yahuuda njimi jimol mbi'i:Kelte kaaƴe keewi
Semmbe gollooɓe timmi
Minen tan du,
Yalla miɗen mbaawi nyiɓitaade ngol?
5 Wayɓe amin mbi'i:
— Fadde maɓɓe e faamude ko waɗata, faa ɓe nji'a en fu, tawan en naatii ley maɓɓe wakkati gooto, mbaren ɓe, gollal ngaal daro.
6 Kile keewɗe Alhuudiyankooɓe jooɗiiɓe ɗakkol wayɓe amin ɓeen na cappana min dow maɓɓe, iɓe mbi'a min:
— Ngartee to amin.
7 Ndeen ngaɗumi yimɓe ndarii gaɗa kokuwol ngool faro to ngol ɓuri leeƴirde. Ɓe ndarii dow nokkuuje jaajuɗe. Peccumi ɓe fodde cuuɗi maɓɓe, iɓe njogii kaafaaje e labbe e kure. 8 Nde ndaarunoomi ɗum fuu, ummiimi kaaldumi e ardiiɓe e mawɓe e yimɓe heddiiɓe mbiimi:
— Taa kulon wayɓe mon, miccitee Joomiraaɗo wo mawɗo, wo kulɓiniiɗo. Ndelle konee saabe sakiraaɓe mooɗon e ɓiɓɓe mon worɓe e rewɓe, e deekiraaɓe mon e gure mooɗon!
9 Nde wayɓe amin paamunoo min nanii ko cegilii waɗude fu, Joomiraaɗo sankiti anniya maɓɓe bonɗo oon. Ndeen min njeccii e gollal mahitaade kokuwol ngool, neɗɗo fuu fuɗɗiti gollal muuɗum. 10 Gilla nyannde ndeen yimɓe am woɓɓe ina ngolla woɓɓe du ina njogii konirɗi, ɗum woni labbe e bawaaɗe e kure e saayooji njamndi. Mawɓe ardiiɓe ɓeen du, ina ndaarana yimɓe Yahuuda fuu, 11 dow gollal nyiɓitaade kokuwol ngool. Golloowo fuu na tiigori junngo wooto konirgal, na gollitoro heddingo. 12 Mahoowo fuu, na haɓɓii kaafaahi muuɗum nde gollata ndeen. Puufoowo luwal wolde na darii ɗakkol am. 13 Ndeen mbiimi mawɓe ɓeen e ardiiɓe e yimɓe heddiiɓe ɓeen fu:
— Gollal ngaal na heewi, na yaaji sanne. Wooɗi eɗen mboɗɗondiri ley maggal. 14 Ndelle, wakkati nanɗon fuufaango luwal fu, kawriton to am, ɗo fuufaango ɗoon. Laamɗo men honanan en!
15 Noon min njaari yeeso e gollal nyiɓitaade kokuwol ngaal, feccere amin ina golla, feccere du ina jogii kaafaaje gilla fajiri faa futuro. 16 Ley balɗe ɗeen mbiimi ɓe:
— Neɗɗo fuu heddodoo e golloowo mum, ɓe mbaala ley huɓeere Urusaliima, faa ɓe ndeena nde jemma. Si weeti, ɓe njahara yeeso e gollal ngaal. 17 Saabe ɗuum, miin e hoore am e sakiraaɓe am e gollanooɓe kam e reenooɓe wonduɓe e am, jemma e nyalooma fuu na min ɓadi kaɓitirɗe amin. Neɗɗo fuu ina tiigii ɗe e junngom.