No Ester laatorii dey kaananke
2
1 Balɗe paltii, ɓernde kaananke feewti. O miccitii deekiiko Wasti, ko waɗi e anniya adaaɗo saabe majjum. 2 Yimɓe wonduɓe e makko mbi'i mo:— Accu pilaneɗaa surbaaɓe ŋarɗuɓe sanne, ɓe anndaa worɓe. 3 Si kaananke yardake fu, waɗa ardiiɓe leyɗe kawrondina surbaaɓe ŋarɗuɓe ɓeen fuu de ngadda ɗum'en suudu rewɓe kaananke ley huɓeere Suus laamorde. Coortaaɗo bi'eteeɗo Hegay ndaaranoowo rewɓe kaananke wallira ɓe ko ɓeydata ŋari. 4 Ɓiɗɗo debbo ɓurɗo welande kaananke fu, oon loomta Wasti de laato dey kaananke.
Kaananke jaɓi tindinoore ndeen, sabo nde welii ɗum.
5 Ley laamordu Suus ɗoon, na woodi Alhuudiyanke bi'eteeɗo Mordakay. Gorko oon wo ɓii Yaa'ir, Yaa'ir ɓii Simi, Simi ɓii Kis, lenyol Benyamin. 6 Yimɓe Mordakay, na tawdanoo ley Urusaliima e yimɓe ɓe Nebukanesar kaananke Baabiila nanngidoyno e Yeohakim kaananke Yahuuda waɗoy maccuɓe. 7 Wakkati oon tawi imo bammbuno ɓii bappaanyo makko debbo na wi'ee Hadassa, ɗum woni Ester mo innam e bammum fuu mbuuraa. Suka debbo oon na ŋarɗi sanne, na muuyni ndaarude. Gaɗa maayde saaraaɓe makko, Mordakay adii mo, na jogorii mo hono ɓiyum pay. 8 Nde kabaaru anniya oon gooynano nder leyɗe fuu, surbaaɓe heewɓe ngadda kawrondina ley huɓeere Suus ɗon. Hegay woni dawranoowo ɓe. Ester du yaarida e surbaaɓe ɓeen ley suudu rewɓe toon, e juuɗe Hegay ndaaranoowo rewɓe kaananke oon. 9 O weli ɓernde Hegay, de kam du ndaardi mo jam. Hegay oon hari e hokkude mo ko ɓeydata ŋari e nyaamdu lobburu. Katin du, hokki mo surbaaɓe suɓaaɓe njeɗɗo gollooɓe ley laamordu faa njooɗodoo e makko ley to ɓuri fuu wooɗude e suudu rewɓe toon. 10 Ester hollaay lenyol muuɗum maa suudu bammum sabo Mordakay sappaniino mo taa o holla toy o ƴuwi maa ɓee ngoni yimɓe makko. 11 Nyannde fuu, Mordakay na fiilto suudu rewɓe nduun faa faama noy Ester worri e no jogora toon.
12 Inan no surbaajo fu segilorante faa yaha yeeso kaananke haddi lebbi sappo e ɗiɗi fodde yamiroore kaananke: lebbi jeegom ɓe boggirte nebbam miiri uurɗam, lebbi jeegom keddiiɗi du, iɓe mbujee nebbam kaaɗɗam e ko ɓeydata ŋari. Caggal ɗuum, iɓe ngaddiree gooto gooto yeeso kaananke Jerjes. 13 Inan no surbaajo fu yottorto to makko: imo hokkee huunde fuu ko o ŋaari wurtodaade suudu rewɓe toon faa o yaada yeeso kaananke ley suudu laamordu. 14 Surbaajo oon yaha to kaananke futuro, si weetii, wittiniree suudu rewɓe wonndu to surbaaɓe kaananke woɓɓe ngoni. Gooto e soortaaɓe kaananke bi'eteeɗo Sa'asgas ndaaranta ɓeen toon. Si surbaajo oon dilli ɗo kaananke nde wootere fu, wartataa katin si wanaa kaananke haaja yi'ude ɗum de yamiri noddee yecco to muuɗum. 15 Nde nyalaande yahugol Ester to kaananke yottinoo fu, ɓii Abihayil bappaanyo Mordakay kaa ɗaɓɓaay faa'e ko yaada to kaananke si wanaa ko Hegay tindini ɗum. Ester heɓi hinney yeeso yi'uɓe ɗum fuu. 16 O yaara yeeso kaananke Jerjes nder suudum laamordu ley lewru Tewet ɗum woni lewru ɗiɗaɓurdu hitaande jeɗɗaɓerde laamu makko. 17 Kaananke yiɗi Ester faa ɓuri rewɓe heddiiɓe fuu. Ester heɓi hinney e saa'a yeeso makko. Kaananke deki hufuneere laamu dow hoore makko de waɗi o deekum, o loomti lunnde Wasti.
18 Kaananke waɗani hooreeɓe laamu muuɗum e gollooɓe muuɗum fuu hiiro manngo, hiiro Ester. Gollooɓe makko e yimɓe tedduɓe wonduɓe e makko fuu, o hokki ɗum'en nyalaande powtiri, o hokki ɓe du dokke mawɗe keewɗe. 19 Nde kaananke hawrondinanteno surbaaɓe ɗiɗaɓerde ndeen, tawi Mordakay na jooɗii dammbugal laamordu. 20 Ester hollaay ƴuwdi muuɗum e lenyol muuɗum hono no Mordakay yamirnoo ɗum noon. Imo heddi imo waɗa huunde fuu ko Mordakay yamiri o waɗa hono nde o wonnoo e juuɗe muuɗum noon.
No Mordakay faamiri woɓɓe na kaajaa warude kaananke
21 Ley balɗe ɗeen, doomooɓe dammbuɗe ɗiɗo, ɗum woni Bigitan e Teres, ɓernani kaananke Jerjes sanne de ndawridi warude ɗum, tawi Mordakay na jooɗi dammbugal laamordu. 22 Kabaaru oon hewtii Mordakay, kam du, holli ɗum Ester. Ester yottiniri kabaaru oon to kaananke e innde Mordakay. 23 Kabaaru oon ndaara faa wooɗi, tawa wo goonga de gollooɓe ɓeen njorfitora ɓoggi faa ɗiɗo fuu maayi. Kabaaru majjum winndaa ley dewtere kabaaruuji laamu yeeso kaananke.