No Haman anniyorii halkirde Alhuudiyankooɓe
3
1 Caggal ɗuum, kaananke waɗi Haman ɓii Hammedata Agaagiyanke laati mawɗo yimɓe muuɗum ɓurɓe teddude fuu. 2 Gollooɓe kaananke e rewooɓe dammbugal laamordu fuu, na kofoo yeeso Haman oon sabo kaananke Jerjes yamirii o teddiniree noon. Ammaa Mordakay kaa, jaɓaay hofaade yeeso makko. 3 Gollidooɓe muuɗum doomooɓe dammbugal laamordu ƴami ɗum ko saabi de ina lutta yamiroore kaananke. 4 Iɓe cappanannoo mo weeti fu, ammaa kanko Mordakay oon o hettindantaako ɓe. Ɓe njottini kabaaru oon Haman faa ɓe ndaara yalla Mordakay wattitan needi muuɗum, sabo o holliino ɓe wo o Alhuudiyanke. 5 Nde Haman faamunoo Mordakay teddintaa ɗum fu, ɓernde muuɗum metti sanne. 6 O faamina du, Mordakay wo Alhuudiyanke. O adi anniya halkude Alhuudiyankooɓe tawaaɓe ley leyɗe ɗe Jerjes laami ɗeen fuu, gam ittude yonki Mordakay tan heƴanaay mo. 7 Lewru go'aɓurdu, ɗum woni Nisana, hitaande sappo e ɗiɗaɓerde laamu Jerjes, cumnal waɗaa faa faame wakkati mo Haman heɓata daliili waɗude ko anniyii ɗuum. Ɗum hawri e lewru sappo e ɗiɗaɓurdu, lewru Adarb. 8 Haman wi'i kaananke Jerjes:— Na woodi lenyol feerewol ngol yimɓe muuɗum cankiti ley leyɗe laamu maaɗa fuu. Finaatawaa maɓɓe na seedi e heddiiɓe fuu. Wooɗi du, ɓe njaɓataa waɗude ko aan kaananke njamirɗaa. A haanaa accude ɓe ɓe njooɗoo e jam. 9 Ndelle si nii kaananke yardake, winnda hokka laawol ɓe fuu ɓe kalkee. Ndeen, mi hokkan goforneere'en talantiiji cardi 10 000 (ɗum wo kilooji 340 000) faa ngatta ɗum nder keesuwal kaananke.
10 Ndeen, kaananke Jerjes itti hootonnde honndu muuɗum, hokki Haman ɓii Hammedata Agaagiyanke ganyo Alhuudiyankooɓe oon. 11 O wi'i Haman:
— Lenyol ngool e ceede ɗeen fuu, mi yoppidii ma, ngaɗaa ko kaajaɗaa. 12 Nyalaande sappo e tataɓerde lewru go'aɓurdu, winndooɓe fuu, noddaa to kaananke. Ɓe mbinndi ɓataakiiji hono no Haman yamiri ɓe mbinndira, ɓe neldi ɗi dawrooɓe e goforneere'en leyɗe e ardiiɓe lenyi feere feere. Ɓataakiiji ɗiin, mbinndiraa e siiji binndi leyɗe fuu e ɗemle lenyi fuu. Ɗi mbinndaa e innde kaananke Jerjes, wooɗi du, ɗi maandiniraa hootonnde honndu muuɗum. 13 Yaarooɓe kabaaruuji cuɓaa faa njaara ɓataakiiji ɗiin leyɗe laamu makko fuu. Iɗi kolla yamiroore nde:
— Alhuudiyankooɓe, suka e mawɗo, debbo e gorko fuu mbaree. Halkere maɓɓe ndeen du, waɗee nyannde sappo e tati lewru sappo e ɗiɗaɓurdu, ɗum woni lewru Adar, de jawdi maɓɓe fuu ɓoɓtee. 14 Kabaaru binndaaɗo ley ɓataakiiji oon gooyna nder leyɗe fuu, faa yimɓe fuu keɓa cegilanoo nyalaande ndeen faa wooɗa. 15 Yaarooɓe kabaaruuji mburtodii e ɓataakiiji ɗiin ley laamordu e haraare, ngoynii ley huɓeere Suus mawnde ndeen fuu. Wakkati majjum kaananke e Haman na njooɗodii na njara cabijam, tawi huɓeere ndeen fuu na wemmbi.