Ester 4

No Ester filorii hisinde Alhuudiyankooɓe

1 Nde Mordakay faamunoo anniya oon fuu, seeki kaddule muuɗum, ɓornii bootooru, joori ndoondi dow hoore muuɗum de naati ley galluure ina woya bojji cattuɗi. 2 Nde o yottinoo dammbugal laamordu fuu, o darii yaasin sabo fay gooto walaa laawol naatidinde e kaddule bootooji ley toon. 3 Leyɗe to kabaaru oon hewtii fuu, Alhuudiyankooɓe na tawda e suno manngo. Iɓe cuumoo, iɓe mbulla iɓe mboyto. Iɓe ɓornoo bootooji, iɓe pukkoo dow ndoondi. 4 Nde gollanooɓe Ester rewɓe e worɓe kumpitinnoo ɗum Ester fu, wemmbii sanne. O neldi Mordakay kaddule faa ɓortoo tekke bootooji ɗeen ammaa salake ko o neldi ɗum ɗuum. 5 Ndeen Ester noddi Hetak, gooto e worɓe kaananke golloowo muuɗum de neli ɗum to Mordakay faa faama ɗume hewtii ɗum de ina waɗa nii. 6 Hetak wurtii tawoy Mordakay na darii dow njaayri dammbugal laamordu. 7 Mordakay fillanii mo ko waɗi, e buuɗi ɗi Haman anniyii wattude nder keesuwal kaananke faa heɓa halka Alhuudiyankooɓe to tawa fuu. 8 O hokki Hetak ɓataaki anniya halkere lenyol makko goynaaɗo nder huɓeere Suus. O ŋaari ɗum haalana Ester ko winndaa nder ɓataaki kiin fuu. Katin, o wi'i ɗum holla Ester yaha to kaananke de ŋaaro ɗum yurmoo lenyol maɓɓe. 9 Hetak yecci warti, yottini Ester ko Mordakay yamiri ɗum fuu. 10 Kanko Ester oon du, o neliti Hetak to Mordakay, wi'a ɗum:

11 — Yimɓe fuu na anndi, gilla gollanooɓe kaananke faa hewti yimɓe leyɗe feere feere, ko gorko maa debbo, naatuɗo faa yotti to kaananke fuu, huunde wootere tan woodani ɗum: si wanaa kaananke ɓantani joomum sawru kaŋŋe fu, maayan. Wooɗi du, nii woni balɗe 30, mi noddaaka to kaananke.

12 Nde Mordakay yottinanoo haalaaji Ester ɗiin fuu, 13 neliti Ester oon wi'e:

— Taa miila saabe aɗa wuuri ley suudu kaananke, de aan tan a hisan ko Alhuudiyankooɓe fuu podanaa ɗuum. 14 Si nii, a waɗaay faa'e wakkati o, ɓe keɓiran mballa gere goɗɗo de ɓe kisa. Ammaa aan, a maayan, ɗum laato kante suudu bamma. De, moy anndi! Na hasi saabe hono ɗum e banndum waɗi, de laatiɗaa dey kaananke.

15 Ndeen Ester neldi haala ka to Mordakay:

16 — Yahu hawrondinoy Alhuudiyankooɓe wonɓe ley huɓeere Suus fuu, de cuumano ɗon kam. Balɗe tati, taa nyaamon, taa njaron. Miin e gollanooɓe kam rewɓe du, min ngaɗiran noon. Caggal ɗuum, mi yahan to kaananke fay si iɗum laati mboɗaa. Fay si tawi mi maayan sey mi maaya.

17 Mordakay, yehi waɗowi ko Ester yamiri waɗa ɗuum.