Ko Nehemiya sakitii moƴƴini
13
1 Ley nyalaande ndeen yimɓe njannganaa Tawreeta Muusaa. Ɓe tawi ina winndaa ley toon taa Amoninke maa Mo'abinke natta ley kawrital yimɓe Laamɗo 2 saabe ɓe kokkaayno yimɓe Israa'iila neema e ndiyam. Yimɓe Mo'ab du, njeeninoo Balaama ceede faa huɗana ɗum'en Israa'iilankooɓe, ammaa Laamɗo amin waylitii kuddi ndiin, ndi laati barke. 3 Nde yimɓe Israa'iila nannoo yamiroore ɗeen, ɓe mburtini jananɓe tawaaɓe ley maɓɓe fuu.4 Arande almaami Eliyaasib laatinoo ndaaranoowo cuuɗi nguurey ley Suudu Dewal Laamɗo. Imo woodunoo esiiwo Amoninke bi'eteeɗo Tobiya. 5 Tawi o hokkiino oon suudu mawndu resirtenoondu sadaka conndi e uurdi mbelndi e kujje gollitirɗe e jakkaaji ley gawri e cabijam kesam e nebbam jaytun e ko Lewinkooɓe e yimooɓe e reenooɓe dammbuɗe njeynoo hokkeede e ngeɗu almaami'en.
6 Nde ɗum waɗanno ndeen, miin Nehemiya mi tawaakanoo ley huɓeere Urusaliima, sabo ley hitaande capanɗe tati e ɗiɗaɓerde laamu Artajerjes kaananke Baabiila, mi yeccakeno to kaananke toon. Caggal ɗuum ŋaariimi kaananke acca mi hoota Urusaliima. 7 Nde ngartunoomi Urusaliima fu, nanumi bone mo Eliyaasib waɗi saabe moƴƴinande Tobiya suudu ley kokuwol Suudu Dewal Laamɗo. 8 Ndeen ɓernde am metti sanne, mburtinmi gineeji Tobiya fuu ley suudu nduun, paɗɗumi ɗi yaasin. 9 Ngaɗumi cuuɗi ɗiin cenee, ngaɗumi kujje gollitirɗe ley Suudu Dewal Laamɗo e sadaka conndi e uurdi mbelndi, ngartira, ngattaa ley toon.
10 Katin nanumi Lewinkooɓe kokkaaka ngeɗu muɓɓen. Saabe majjum kamɓe e yimooɓe fuu ɓe ndilli, mono fu nattoyi golle ngesa muuɗum. 11 Ndeen pelumi hiitotooɓe ɓeen, mbiimi ɓe:
— Ko saabi Suudu Dewal Laamɗo ndu yeeboraa ni?
Kawrondirmi Lewinkooɓe e yimooɓe fuu njeccimmi ɗum'en ley golle muɓɓen. 12 Caggal ɗuum yimɓe Yahuuda fuu ngaddi jakkaaji muɓɓen conndi e cabijam kesam e nebbam jaytun ley cuuɗi nguurey. 13 Njamirmi almaami Salamiya e Sadok jannginoowo Tawreeta e Pedaaya gooto hakkunde Lewinkooɓe ndeena cuuɗi ɗiin sabo wo ɓe hoolniiɓe. Balloowo ɓe woni Hanaan ɓii Jakuura taan Mattaaniya. Kamɓe kokkata sakiraaɓe maɓɓe ko kaani hokkeede.
14 Yaa Laamɗo am, miccitoɗaa kam, taa mooyta golle lobbe ɗe ngaɗirmi e hoolaare saabe Suudu Dewal Laamɗo am e gollal ley mayru.
15 Ley balɗe ɗeen, njiimi yimɓe ina ɓoosa cabiije nyalaande fowteteende ley leydi Yahuuda, woɓɓe du ina ndimnda kaɓɓe alkama, e cabijam e cabiije e ƴibbe e kujje feere feere dow araaji. Iɓe nanna ɗum ley Urusaliima nyannde fowteteende. Ndeen pelumi ɓe saabe sonnugol neema nyannde fowteteende. 16 Katin yimɓe leydi Tirus jooɗiiɓe ley Urusaliima ina ngadda liƴƴi e kujje feere feere conneteeɗe iɓe connira yimɓe Yahuuda ley Urusaliima nyannde fowteteende. 17 Ndeen noddumi mawɓe Yahuuda pelumi ɓe, mbiimi ɓe:
— Ko saabi oɗon ngaɗa ko boni ɗum? On tuuninii nyalaande fowteteende. 18 Ndelle wanaa ɗuum maamiraaɓe mooɗon ngaɗunoo, de Laamɗo meeɗen waddani en halkere nyanngunde, enen e huɓeere meeɗen fuu naa? Jonle ko tuuninɗon nyalaande fowteteende ɗuum, on ɓeydii tikkere Laamɗo dow Israa'iila.
19 Nde finata weeta nyalaande fowteteende ndeen, ngaɗumi dammbuɗe Urusaliima fuu ombaa, mbiimi taa ɗe omtee sanaa nyalaande fowteteende ɗeen falti. Ngaɗumi woɓɓe hakkunde gollanooɓe kam ndeeni dammbuɗe ɗeen, taa woɓɓe nanna dimle ley toon nyannde fowteteende. 20 Nde wootere maa du nde ɗiɗi soodooɓe e sonnooɓe na mbaala yaasin Urusaliima. 21 Tindinmi ɓe, mbiimi:
— Ko saabi mbaaluɗon yaasin? Si on ngaɗi ɗum katin fu, mi nanngan on.
Gilla ndeen ɓe mbayri warude luumo nyannde fowteteende. 22 Caggal ɗuum, mbiimi Lewinkooɓe laɓinaa ko'e muɓɓen, de njaha ndoomowa dammbuɗe faa ndeena nyalaande fowteteende ndeen, de heddoo ɗe seniinde.
Yaa Laamɗo am, miccitoɗaa kam saabe majjum, fodde hinney ma mawɗo!
23 Katin ley balɗe ɗeen, njiimi woɓɓe hakkunde Alhuudiyankooɓe na ndewli rewɓe leydi Asidod, e Amon e Mo'ab. 24 Feccere ɓiɓɓe maɓɓe ina kaala Asidodinkoore e ɗemle janane, de fay gooto e maɓɓe waawaa haalude Ibraninkoore. 25 Ndeen pelumi ɓe, kuɗumi ɓe, piimi woɓɓe maɓɓe, ɗoofumi ngaasa muɓɓen, ngaɗumi ɓe kunii e innde Laamɗo, ɓe kokkataa ɓiɓɓe maɓɓe rewɓe, ndewlee lenyi janani, wooɗi ɓe ndewlantaa ɓiɓɓe maɓɓe worɓe du surbaaɓe ley lenyi janani katin. Kamɓe e ko'e maɓɓe du, ɓe ndewlataa lenyi ɗiin. 26 Mbiimi ɓe:
— Wanaa saabe majjum Suleymaana, kaananke Israa'iila waɗirno hakke naa? Ley lenyi fuu walaano kaananke hono makko. O jiɗaaɗo Laamɗo makko, de waɗi mo kaananke dow Israa'iila fuu. Ammaa fay e noon, rewɓe jananɓe ngatti mo e hakke. 27 Ndelle joonin onon du, nanete oɗon ngaɗa iri bonanda mawɗo hono oon. Oɗon njamboro Laamɗo e dewlugol rewɓe jananɓe naa? 28 Tawi gooto hakkunde ɓiɓɓe Yahooyada ɓii Eliyaasib, mawɗo almaami'en, na dewli ɓii Sanbalat, Horoonanke. Ndiiwumi o, mburtinmi o Urusaliima.
29 Yaa Laamɗo am, miccitoɗaa ɓe sabo ɓe tuunini amaana almaami'en e mo Lewinkooɓe.
30 Ndeen laaɓinmi ɓe e ko laatii jananum fuu, puɗɗintinmi almaami'en e Lewinkooɓe golle muɓɓen. 31 Njamirmi dokke leɗɗe duppirɗe e dokke ley ko arti ɓenndude ley gese ngaɗee fodde wakkatiiji muɓɓen.
Yaa Laamɗo am, miccitoraɗaa kam saabe mbooɗirka maaɗa.