No yimɓe ngaɗiri amaana
10
1 Saabe ko waɗi ɗuum, min ngaɗi amaana ley ɓataaki. Maande mawɓe amin e Lewinkooɓe e almaami'en waɗaa dow ɓataaki kiin. 2 Artiiɓe ngaɗi maande dow ɓataaki amaana ɓeen, wo Nehemiya ɓii Haakaliya goforneer e almaami'en: Sidikiya 3 e Saraaya e Ajariya e Yeremiya, 4 e Pasahuura e Amaariya e Malkiya 5 e Haatus e Sabaniiya e Maaluk 6 e Haarim e Merimoot e Obadiya 7 e Daniyiila e Gineton e Baaruki 8 e Meesullam e Abiya e Miyamin 9 e Ma'aajiya e Bilgay e Semaya.10 Ndeen Lewinkooɓe: Yesuwa ɓii Ajaniya, e Binuuyi jeyaaɗo e suudu Henaadad, e Kadamiyel. 11 Sakiraaɓe maɓɓe: Sabaniiya e Hoodiya e Keliita e Pilaaya e Hanaan 12 e Miika e Rehoob e Hasaabiya 13 e Jakuura e Seraabiya e Sabaniiya 14 e Hoodiya e Baanii e Beniinu.
15 Ndeen ardiiɓe yimɓe: Paroos e Pahat-Mo'ab e Elam e Jattu e Baanii 16 e Bunnii e Asgeda e Bebay 17 e Adoniya e Bigway e Aadin 18 e Aater e Hejekiya e Aajur 19 e Hoodiya e Haasum e Betsaay 20 e Haarifu e Anatot e Nebaaya 21 e Magpiyaas e Meesullam e Heejir 22 e Mesijabeel e Sadok e Yadduwa 23 e Pelaatiya e Hanaan e Anaaya 24 e Hooseya e Hananiya e Haasubu 25 e Halohes e Piliiha e Soobek 26 e Rehum e Hasaabina e Maaseya 27 e Ahiya e Hanaan e Aanan 28 e Maaluk e Haarim e Ba'ana.
Amaana mo ɓe ngaɗi
29 Yimɓe heddiiɓe fuu: almaami'en e Lewinkooɓe e reenooɓe dammbuɗe e yimooɓe e gollooɓe ley Suudu Dewal Joomiraaɗo e sennduɓe ko'e muɓɓen e lenyi janani jooɗiiɗi ley leydi ndiin faa njokka jamirooje Laamɗo; kamɓe e rewɓe maɓɓe e ɓiɓɓe maɓɓe worɓe e rewɓe, e nanuɓe de paami ko janngaa ɓeen fuu, 30 kawriti e sakiraaɓe muɓɓen tedduɓe hunnduko wooto, kunii, mbi'i njokkan jamirooje Laamɗo ɗe hokki Muusaa maccuɗo muuɗum faa njogoo ɗe, de njokka sariyaaji Joomiraaɗo e tindinooje muuɗum.
31 Min anniyake sukaaɓe amin rewɓe ndewlataake lenyi janani jooɗiiɗi ley leydi ndi, wooɗi min ndewlantaa sukaaɓe amin worɓe surbaaɓe lenyi ɗiin. 32 Si ɓe ngaddii kujje conneteeɗe nyannde fowteteende maa nyalaande seniinde wonnde, si ɗum alkama maa goɗɗum feere, min coodataa. Ley hitaande jeɗɗaɓerde fuu, min njoppan gese amin, min ndemataa ɗe. Katin du, min njaafanto mo min njokkataa nyamaande ley hitaande ndeen.
33 Min anniyake ley hitaande fuu, neɗɗo amin fuu waddan buuɗi cardi seeɗa saabe gollal seniindu. 34 Nyannde fuu min ngaɗan buuru ceniiɗo e conndi cakketeendi e sadaka buleteeɗo, e ko haani waɗeede ley nyalaande fowteteende e darorɗe lewru, e waɗugol iidiiji fuu, e senugol ko'e amin, e waɗugol sadaka saabe hakkeeji amin, e waɗugol golleeji gaɗeteeɗi ley Suudu Dewal Laamɗo. 35 Na winndaa ley Tawreeta, hitaande fuu si wakkati majjum hewti, na tilsi leɗɗe duppirde ngaddee hirsirde ley Suudu Dewal Laamɗo amin. Saabe ɗum de minen e almaami'en e Lewinkooɓe e yimɓe heddiiɓe fuu, miɗen ngaɗa cumnal faa min cuɓoo suudu jeyndu waddude dokkal leɗɗe ɗeen. 36 Katin min adi amaana waddande Suudu Dewal Joomiraaɗo, ley hitaande fu, ko arti ɓenndude ley gese e siyiiji ɓiɓɓe leɗɗe amin fuu. 37 Min ngaddanan almaami'en gollooɓe ley Suudu Dewal Laamɗo, afo'en amin worɓe e dikkorɗi daabaaji amin, hono no winndiraa ley Tawreeta noon. 38 Min ngattanan ɓe du, ko ɓuri wooɗude ley conndi alkama, e ɓiɓɓe leɗɗe feere feere e cabijam kesam, e nebbam jaytun nder cuuɗi nguurey gonɗi ley Suudu Dewal Laamɗo. Katin min ngaddanan Lewinkooɓe jakka ko ƴuuri e gese amin fu. Ɓe ittan jakka ley kuɓeeje to min ngollataa fuu. 39 Almaami jeyaaɗo e lenyol Haaruuna yaadan e Lewinkooɓe nde ɓe ittataa jakka ndeen. Lewinkooɓe jaɓooɓe jakka ɓeen du, sanaa itta jakka muɓɓen ley jakka mo kokka oon, de ngadda ɗum ley cuuɗi desirɗi nder Suudu Dewal Mawndu. 40 Ley toon Almaami'en e reenooɓe dammbuɗe e yimooɓe fuu ngoni. Katin du, ley toon Israa'iilankooɓe e Lewinkooɓe ngaddata dokke muɓɓen alkama e cabijam kesam e nebbam jaytun e kujje gollitirɗe.
Saabe ɗum, abada min njeebataako Suudu Dewal Laamɗo amin!