Nehemiya 9

No yimɓe kaaltiri hakkeeji muɓɓen

1 Nyannde 24 lewru nduun, Israa'iilankooɓe kawriti, cuumii. Iɓe ɓornii bootooji, iɓe njoora leydi dow ko'e maɓɓe. Ɗum na holla mettorgal ɓerɗe maɓɓe. 2 Israa'iilankooɓe fuu cenndi ko'e muɓɓen e jananɓe. Ndeen ɓe ndarii, ɓe kaalti hakkeeji maɓɓe e ɗi maamiraaɓe maɓɓe. 3 Ɓe ummii, ɓe ndarii, ɓe ngaɗi fodde leeruuji tati iɓe jannganee dewtere Tawreeta Laamɗo Joomiraaɗo maɓɓe. Katin, ɓe ngaɗi fodde leeruuji tati iɓe kaalta hakkeeji maɓɓe, iɓe kofii e leydi, yeeso Laamɗo Joomiraaɗo maɓɓe. 4 Ndeen Yesuwa e Baanii e Kadamiyel e Sabaniiya e Bunnii e Seraabiya e Baanii e Kenaani, ndarii dow nokkuure toownde to Lewinkooɓe ndarotoo de ɓe mbullitii Laamɗo Joomiraaɗo maɓɓe e daande toownde ley du'aare. 5 Lewinkooɓe: Yesuwa e Kadamiyel e Baanii e Haasibuneya e Seraabiya e Hoodiya e Sabaniiya e Petahiya mbi'i Israa'iila'en:

— Ummee! Mannee Laamɗo Joomiraaɗo mooɗon faa abadaa!

— Innde ma manee, aan mo teddeengal mum ɓuri miilooji tagaaɗo! 6 Yaa Joomiraaɗo, aan tan woni Joomiraaɗo, aan tagi kammuuli e koode, e njaayri ngondi dow e ko woni nder mayri. Taguɗaa leydi e maayo e ko woni e muɓɓen fuu. Kokkuɗaa ɗum fuu yonki, de ndeenuɗaa ɗum. Ko woni dow kammu fuu hofake yeeso maaɗa. 7 Aan woni Laamɗo Joomiraaɗo, aan suɓii Abram, mburtinɗa mo huɓeere Uur ley leydi Kaldiya'en, mbayluɗaa innde makko, nde laatii Ibrahiima. 8 Tawuɗaa imo hoolii ma, de ngaɗanɗaa mo amaana, a hokkan mo, kanko e ɓiɓɓe makko, leydi Kanaaninkooɓe e Hittiyankooɓe e Amorinkooɓe e Perisinkooɓe e Yebusinkooɓe e Girgasinkooɓe faa ndi laatoo dongu maɓɓe. Saabe aan, a dartiiɗo, a hiɓɓinii amaana maaɗa oon.

9 A yi'ii no maamiraaɓe amin torriraa ley leydi Misira. Nanuɗaa bojji maɓɓe daande maayo Maaliya. 10 Ngaɗuɗaa maandeeji kaayniiɗi dow Fira'awna e gollanooɓe ɗum e yimɓe leydi muuɗum fuu, sabo aɗa anndi no ɓe njawiri yimɓe maaɗa. A waɗii innde ma teddinee faa warde hannden. 11 Peccuɗaa maayo Maaliya yeeso maɓɓe, ngaɗuɗaa ɓe ndewi hakkunde maggo dow leydi njoorndi, de kalkuɗaa riwooɓe ɓe ɓeen ley to ɓuri fuu luggude nder maggo, ngo moɗi ɓe hono hayre teddunde faɗɗaande ley ndiyam. 12 Nyalooma, ardoriɗaa ɓe ruulde nanndunde e bimmbeere, jemma du, ruulde yiite nanndunde e bimmbeere na holla ɓe laawol.

13 Jippiɗa dow waamnde Sinayi, kaalduɗaa e maɓɓe, kokkuɗaa ɓe jamirooje dartiiɗe e ekitingol goongalawol e sariya lobbo. 14 Kaalanɗaa ɓe nyalaande maaɗa seniinde, ɗum woni nyalaande fowteteende. Kokkuɗaa Muusaa maccuɗo maaɗa jamirooje e ekitingol, faa janngina ɓe. 15 Nde ɓe ndafanoo, a hokkii ɓe neema ƴuuruɗo dow. Nde ɓe ɗomɗunoo du, kokkuɗaa ɓe ndiyam ley tefaare. Mbiiɗaa ɓe teeta leydi ndi kuniɗaa a hokkan ɓe ndiin.

16 Ammaa maamiraaɓe amin koyfinii ma, ɓe njoornii ɓerɗe maɓɓe, ɓe calake jokkude jamirooje maaɗa. 17-18 Ɓe ɗowtanaaki ma, ɓe njeggiti maandeeji kaayniiɗi ɗi ngaɗanɗaa ɓe, ɓe cattini ɓerɗe maɓɓe. Ley muurtere maɓɓe, ɓe cuɓanii ko'e maɓɓe ardotooɗo ɓe, faa ɓe yecco ley maccangaaku nder leydi Misira. Ammaa aan, wo a Laamɗo jaafotooɗo, a jom yidde e yurmeende e munyal e moƴƴere. Fay nde ɓe ngaɗannoo ko'e maɓɓe ngaari kaŋŋe de ɓe mbi'i kayri woni alla maɓɓe burtinɗo ɓe leydi Misira, maa du, nde ɓe ngaɗunoo golle bonɗe, a yoppaay ɓe kamɓe tan. 19 Ley yurmeende maaɗa, a yoppaay ɓe ley ladde yoornde. A ittaay ruulde e jayngol kolloowol ɓe laawol jemma e nyalooma. 20 A hokkii ɓe ruuhu maaɗa lobbo, faa ekintina ɓe jokkaade ko haani waɗeede. A salanaaki ɓe neema bi'eteeɗo manna, nde ɓe ɗomɗunoo duu, kokkuɗaa ɓe ndiyam. 21 Duuɓi 40 ley ladde yoornde aɗa wondi e maɓɓe, walaa ko jacci ɓe, kaddule maɓɓe kalkaay, koyɗe maɓɓe du ɓuutaay.

22 A hokkii ɓe jaalorgal dow kaanankooɓe e lenyi goɗɗi, kokkuɗaa ɓe leyɗe laatoo dongu maɓɓe. Ɓe teetii leydi Sihon, kaananke Hesbon e leydi Ogga, kaananke Baasan. 23 A ɗuuɗini ɓiɓɓe maɓɓe hono koode. A nyottinɗaa ɓe nder leydi ndi mbiiɗaa maamiraaɓe maɓɓe njaha teetowa de laatoo dongu muɓɓen. 24 Ɓiɓɓe maɓɓe naati, teeti leydi ndiin, ndi laatii dongu muɓɓen. Leeƴinɗaa Kanaaninkooɓe yeeso maɓɓe, ngattuɗaa ɓe, kamɓe e kaanankooɓe maɓɓe e leydi maɓɓe fuu e juuɗe ɓiɓɓe Israa'iila, faa ngaɗa ɓe ko kaajaa. 25 Ɓe teeti kuɓeeje cemmbinɗiniraaɗe kokuuji e leydi lobbiri e gure keewɗe ɗe kujje lobbe e gayɗe ndiyam e gese cabiije e jaytun e leɗɗe feere feere dimooje ɓiɓɓe ɗuuɗɗe. Ɓe nyaami, ɓe kaari, ɓe payi, ɓe ceyorii ko kokkuɗaa ɓe. 26 Ammaa ɓe muurtanii ma, ɓe njoppii jamirooje maaɗa. Ɓe mbari annabaaɓe maaɗa sellinɓe ɓerɗe maɓɓe de mbi'i ɓe ngarta dow laawol maaɗa. Ɓe kuyfinii innde maaɗa. 27 Saabe majjum de ngattuɗaa ɓe e juuɗe wayɓe maɓɓe de torri ɓe. Ley torra oon, ɓe mbullitii ma faa mballaa ɓe, aan du, nanuɗaa bojji maɓɓe. Saabe yurmeende maaɗa mawnde, a hokki ɓe hisinooɓe ɓe e wayɓe maɓɓe. 28 Ammaa caggal ko ɓe keɓi jam ɗuum, ɓe njeccake e waɗude hakke. Ndeen accuɗaa wayɓe maɓɓe torri ɓe torra mawɗo. Nde ɓe mbullitinoo ma, ɓe ŋaarii mballaa ɓe, a nanii bojji maɓɓe, a hisinirii ɓe e yurmeende maaɗa kile keewɗe. 29 Tindinɗaa ɓe, ɓe njeccoo e jamirooje maaɗa, de ɓe njoorni ko'e maɓɓe, ɓe calii jokkude ɗe, ɓe ngaɗi hakke, ɓe kuyfinii konngol maaɗa kokkoowol yonki. Ɓe muurti, ɓe njoorni ko'e maɓɓe, ɓe calii jokkude ko mbiiɗaa. 30 Munyanɗaa ɓe duuɓi keewɗi, ngaɗuɗaa ruuhu maaɗa tindinii ɓe laawol annabaaɓe maaɗa, ammaa ɓe cukki noppi maɓɓe. Saabe ɗuum, ngattuɗaa ɓe e juuɗe wayɓe maɓɓe jooɗiiɓe ley leyɗe goɗɗe. 31 Ɗum fuu, saabe yurmeende maaɗa, a halkaay ɓe, a yeggitaay ɓe sabo aan Laamɗo, a jom moƴƴere e yurmeende mawnde.

32 Laamɗo amin, a mawɗo, a jom teddeengal, a kulɓiniiɗo, a tiigoriiɗo amaana maaɗa e hoolaare. Taa yawu torraaji ɓurɗi min semmbe, caamuɗi dow amin, minen e laamiiɓe amin e mawɓe amin e almaami'en amin e annabaaɓe amin e maamiraaɓe amin e yimɓe maaɗa fuu, gilla jamaanu kaananke Asuura faa hewti hannden. 33 Sikke walaa, a waɗii ko haani faa ndartinaa min. Aan, a goongaajo, a gaɗoowo ko wooɗi. Minen du, min ngaɗii ko boni. 34 Sabo laamiiɓe amin e mawɓe amin e almaami'en amin e maamiraaɓe amin njokkaay jamirooje maaɗa. Ɓe kettindaaki ko mbiiɗaa, ɓe njaɓaay tindinooje maaɗa. 35 Fay ko ɓe ceyorii barkeeji ɗuuɗɗi ɗi kokkuɗaa ɓe, e leydi njaajundi lobbiri ndi ngattuɗaa ɓe ley muuɗum ndiin, ɓe mbanyi jokkude ma, ɓe njoppaay laawol bonde maɓɓe. 36 Inan min hannden, min maccuɓe ley leydi ndi kokkuɗaa maamiraaɓe amin nyaama nafaa muuɗum de ceyoo ndiin. Sikke walaa, wo min maccuɓe ley mayri. 37 Barke mo leydi ndiin hokkata fuu ina yecco e juuɗe laamiiɓe ɓe njowuɗaa dow amin saabe hakkeeji amin. Iɓe ngaɗa min ko ɓe njiɗi, minen e daabaaji amin. Miɗen mbuuri ley torra mawɗo.