No Isira jangirani yimɓe Tawreeta
8
1 Yimɓe fuu kawriti ley njaayri ngondi yeeso dammbugal Ndiyam, ɓe mbi'i Isira jannginoowo Tawreeta oon wadda dewtere Tawreeta Muusaa nde Joomiraaɗo hokki Israa'iilankooɓe ndeen. 2 Nyannde go'o lewru jeɗɗaɓurdua, almaami Isira waddi dewtere Tawreeta ndeen yeeso kawrital worɓe e rewɓe e waawɓe nanude de paama ko winndaa ley mayre fuu. 3 O dari yeeso maɓɓe dow njaayri dammbugal Ndiyam, o janngani ɓe dewtere ndeen. Yimɓe fuu na kettinii jannde Tawreeta ndeen gilla fajiri faa hewti hakkunde naange. 4 Isira na dari dow nokkuure toownde waɗiraande leɗɗe saabe kawrital ngaal. Mattiitiya e Sema e Anaaya e Uriyahu e Hilkiya e Maaseya na ndarii junngo makko nyaamo. Pedaaya e Misayel e Malkiya e Haasum e Haasibadana e Jakariya e Meesullam du, na ndarii junngo makko nano. 5 O omti dewtere ndeen yeeso yimɓe ɓeen, mono fuu na yi'a ngam imo darii dow to toowi. 6 Isira mani Joomiraaɗo, Laamɗo jom teddeengal, yimɓe fuu ɓanti juuɗe muɓɓen, njaabii mbi'i: «Aamiina! Aamiina!» Ɓe turii, ɓe kippi geese maɓɓe e leydi, ɓe teddini Joomiraaɗo. 7 Lewinkooɓe: Yesuwa e Baanii e Seraabiya e Yaamin e Aakubu e Sabetaay e Hoodiya e Maaseya e Keliita e Ajariya e Yoojabad e Hanaan e Pilaaya keddii ina piirtana ɓe maanaa jamirooje ɗeen. 8 Ɓe njangana dewtere Tawreeta Laamɗo, ɓe piirtana maanaa jamirooje ɗeen faa laaɓini ɓe.No hakkillooji Israa'iilankooɓe mbaaltinira
9 Nehemiya goforneer e almaami Isira, jannginoowo Tawreeta e Lewinkooɓe piirtani yimɓe ɓeen maanaa jamirooje ɗeen. Nde ɓe paamitinoo ɗum fuu ɓe puɗɗii woyude. Ndeen Nehemiya wi'i ɓe:
— Hannden wo nyalaande Laamɗo Joomiraaɗo meeɗen seniinde. Taa ɓerɗe mooɗon metta, taa mboye.
10 O wi'i ɓe katin:
— Njehee nyaamowe nyaamndu lobburu, njaron cabijam mbelɗam. Mo walaa ko defa fuu, neldon ɗum nyaamdu ngam hannden wo nyalaande Joomiraaɗo meeɗen seniinde. Taa mettinon ɓerɗe mooɗon. Mbeltoree seyo saabe Joomiraaɗo woni semmbe mooɗon.
11 Lewinkooɓe du, na cawrina yimɓe ɓeen na mbi'a ɓe:
— Ndeƴƴinee, ndeƴƴinee, celee bojji sabo nyalaande nde wo seniinde, taa mettinee ɓerɗe mooɗon.
12 Ndeen yimɓe ɓeen fuu njehii nyaamowi, njari, de ittani ɓe ngalaa ɓeen ngeɗu. Ɓe ceyii ngam ɓe paamitake ko ɓe njanngana ɗuum.
Iidi Hukumuuji
13 Nyalaande ɗiɗaɓerde, ardiiɓe cuuɗi e almaami'en e Lewinkooɓe kawriti to Isira jannginoowo faa ɓe ndaara ko dewtere Tawreeta wi'i. 14 Ɓe tawi na winndaa ley toon: wakkati iidi lewru jeɗɗaɓurdu, na tilsi Israa'iilankooɓe njooɗoo ley hukumuuji. 15 Saabe ɗuum, ɓe nelani ley gure maɓɓe e ley Urusaliima fuu, yimɓe mbi'ee:
— Mburtee njehee dow tile, coppon licce jaytun e licce tamorooje e iri leɗɗe feere feere gooduɗe haako faa hukumuuji ndarnee, hono no winndiraa noon.
16 Ndeen ɓe njehii, ɓe ngaddi licce ɗeen, ɓe ndarnani ko'e maɓɓe hukumuuji. Mono fu e nokkuure mum, woɓɓe dow cuuɗi muɓɓen, woɓɓe e njaayri gure muɓɓen, woɓɓe e njaayri Suudu Dewal Laamɗo, woɓɓe e njaayri dammbugal Ndiyam, woɓɓe e njaayri dammbugal Efrayim. 17 Yimɓe ƴuuruɓe e maccangaaku ngarti ɓeen fuu ndarnani ko'e muɓɓen hukumuuji, ɓe njooɗii ley majji faa iidi oon timmi. Ɓooyiino iidi hukumuuji waɗaaka, gilla e jamaanu Yoosuwa ɓii Nuun. Yimɓe ceyii sanne. 18 Isira janngi dewtere Tawreeta Laamɗo ley nyalaaɗe iidi ɗeen fuu, gilla go'aɓerde faa sakitiinde. Ɓe ngaɗiri iidi oon balɗe jeɗɗi. Ley nyalaande jeeɗaɓerde, ɓe ngaɗi iidi mawɗo fodde no winndiraa.