No Laamiiɗo Seba weerdani Suleymaana
(2 Kabaaruuji 9:1-12)
10
1 Laamiiɗo Seba debbo nani kabaaru mangaaku innde Suleymaana saabe barke Joomiraaɗo. O wari to muuɗum faa o ndaartinoro ɗum e ƴamɗe tiiɗɗe. 2 Laamiiɗo debbo oon wardi Urusaliima e jamaa ɗuuɗɗo, e geelooɗi dimndaaɗi urdiiji belnooji neema e kaŋŋe ɗuuɗɗo e kaaƴe dime korsuɗe ɗuuɗɗe. Nde o yottinoo to Suleymaana fu, o haalani ɗum ko woni ley ɓernde makko fuu. 3 Suleymaana laaɓinani mo ko o ƴami ɗuum fuu, walaa fuu ko kaananke hungi jaabaade. 4 Laamiiɗo debbo oon hori anndal Suleymaana manngal ngaal, no nyiɓiri suudu muuɗum laamordu, 5 e neemaaji dekiiɗi dow taabawal e cuuɗi howruuɓe laamu lobbi, e no gollooɓe muuɗum ɓornorii kaddule lobbe na ndarii, e hokkooɓe njaram, wooɗi du e kirsamaaji buleteeɗi ɗi o waɗata ley suudu Joomiraaɗo. Ɗum fuu ɗum haayni debbo oon faa wembaa. 6 Ndeen o wi'i kaananke:— Ndelle ko nannoomi kabaaru dow maaɗa e hakkilantaaku e anndal maaɗa ɗum fuu wo goonga! 7 Mi jaɓaayno ɗum sanaa ko ngarumi njiirumi ɗum e gite am. Goonga du, sifa mo nannoomi oon hewtaay fay feccere ko tawumi. Anndal maa e jawdi maaɗa fuu na ɓuri ko nanumi. 8 Rewɓe maaɗa e gollooɓe darotooɓe ɗakkol maaɗa, heɓooɓe hetinaade hakkilantaaku maaɗa wakkati fuu ɓee, wo welɓe ko'e. 9 Yettoore woodanii Joomiraaɗo, Laamɗo maaɗa ceyortooɗo ma de joƴƴini ma dow jooɗorgal laamu Israa'iila. Saabe njinngu ngu Laamɗo woodanii Israa'iila nguun, saabii de o waɗi ma kaananke faa caroroɗaa laaɓal e fonnditaare.
10 Ndeen o hokki kaananke Suleymaana talantiiji kaŋŋe 120 (ɗum woni kilooji 4 000), tawti urdiiji e kaaƴe korsuɗe ɗuuɗɗe tiiɗɗe coggu! Caggal ɗuum, fay gooto waddaay hono ɗi urdiiji ley Israa'iila faa warde hannden.
11 Laanaaji ndiyam ɗi kaananke Hiram dondinooɗi kaŋŋe Ofir, ngartidi e leɗɗe bi'eteeɗe «almug» e kaaƴe korsuɗe ɗuuɗɗe. 12 Leɗɗe ɗeen kaananke waɗiri pale Suudu Dewal Joomiraaɗo Mawndu e suudu laamordu e kolli e munkaruuji yimooɓe fuu. Caggal ɗuum hono ɗeen leɗɗe nji'aaka leydi Israa'iila faa warde hannden. 13 Kaananke Suleymaana du, hokki kaananke debbo oon ko muuyi e ko ŋaarii fuu, tawti e dokke yardamuye ɗe o resannoo ɗum. Ndeen debbo oon e jamaare muuɗum fuu kooti leydi muɓɓen.
Jawdi kaananke Suleymaana
(2 Kabaaruuji 9:13-28)
14 Hitaande fuu Suleymaana na heɓa talantiiji kaŋŋe 666 (ɗum wo kilooji 23 000). 15 Ɓeydi ko luumotooɓe e sonnooɓe njoɓata mo. Imo heɓa katin e lampooji kaanankooɓe Arabiya e dawrooɓe dow leyɗe Israa'iila. 16 Kaananke Suleymaana waɗiri bawaaɗe 200 kaŋŋe tappaaɗo. Wawaade fuu waɗiraa buuɗi kaŋŋe 600. 17 O waɗi du bawaaɗe pamare 300. Gootel fuu waɗira minaaji tati (ɗum wo hono kilooji kaŋŋe ɗiɗi). O watti ɗe ley suudu wi'eteendnu «Cukkuri Liban». 18 Kaananke waɗiri jooɗorgal laamu manngal e nyiiƴe nyiibi. O mooytiri ngal kaŋŋe ɓurɗo fuu laaɓude. 19 Jooɗorgal ngaal na woodi ƴeeŋirgal ngal jaaɓirɗe jeegom. Ingal waɗana ɓaarorgal tulɓala gaɗa maggal. Ngal waɗana powtinorɗe juuɗe nano e nyaamo fuu. Katin, ngal waɗana alhaali dawaaɗi ladde na ndarii senngo nyaamo e nano fuu. 20 Dow jaaɓirɗe jeegom ɗeen fuu, dawaaɗi ladde na ndarii nano e nyaamo dow yaaɓirde fuu. Ɗum woni alhaali dawaaɗi ladde sappo e ɗiɗi. Abada hono majjum waɗaayno e laamuuji.
21 Njardukoy kaananke Suleymaana fuu kaŋŋe ngaɗiraa. Gineeji gonɗi ley «Cukkuri Liban» fuu kaŋŋe ɓurɗo laaɓude ngaɗiraa. Ginewol fay gootol waɗiraaka cardi sabo ley jamaanu Suleymaana cardi teddinaakano. 22 Kaananke na wooduno laanaaji doggooji dow maayo bi'eteeɗi laanaaji Tarsis. Iɗi ngondi e laanaaji kaananke Hiram. Duuɓi tati fuu iɗi ngaartida kaŋŋe e cardi e nyiiƴe nyiibi e siiji baaɗi.
23 Kaananke Suleymaana laatake ɓurɗo kaanankooɓe adunaaru fuu jawdi e hakkillo. 24 Yimɓe na ƴuura tatteeji adunaaru fuu, na piloo yi'ude mo faa kettindoo anndal ngal Laamɗo watti e makko. 25 Garoowo fuu na warda e dokkal muuɗum: gineeji cardi e kaŋŋe, kaddule, kaɓitirɗe, urdiiji feere feere, pucci e araaji baneeji. Hitaande fuu wo noon.
(2 Kabaaruuji 1:14-17, 9:25-28)
26 Suleymaana hawrondini torkooji pucci konu e dogginooɓe ɗi. Imo woodi torkooji pucci 1 400 e dogginooɓe ɗi 12 000. O joƴƴini woɓɓe ley gure to torkooji ɗiin ndesaa toon, woɓɓe du keddi Urusaliima ɗakkol makko. 27 Kaananke hebbini cardi ley Urusaliima faa nanndi e kaaƴe dow leydi. O hebbini leɗɗe seddere du faa foti e leɗɗe ƴibbe laddeeje puɗooje e leydi leeƴundi. 28 Pucci kaananke wo leydi Misira e leydi Silisi coodoyte. Luumotooɓe makko na coodiraɗi fodde coggu majji. 29 Torkooru Misira fuu wo buuɗi cardi 600 soodete. Puccu du fu, buuɗi cardi 150 soodete. Luumotooɓe kaananke na cottirowa ɗi e kaanankooɓe Hittiyankooɓe fuu tawti kaanankooɓe Siiriya.