Tottitagol Suleymaana yeeso Joomiraaɗo
11
1 Kaananke Suleymaana na yiɗunoo rewɓe jananɓe heewɓe. Baka ɓii Fira'awna mo o dewli oon walaa, o dewlii rewɓe Mo'abinkooɓe e Amoninkooɓe e Edominkooɓe e Sidoninkooɓe e Hittiyankooɓe. 2 Joomiraaɗo haalaniino Israa'iilankooɓe kabaaru lenyi ɗiin nde wi'unoo ɓe:— Taa kawriton e maɓɓe de ɓe mbaylita ɓerɗe mooɗon faa ndewon tooruuji maɓɓe.
Ammaa Suleymaana takkondiri e rewɓe lenyi ɗiin. 3 O dewlii rewɓe 700, ɓiɓɓe laamiiɓe. Imo woodi du rewɓe 300 nattaaɓe. Rewɓe ɓeen oonyi ɓernde makko. 4 Nde kaananke Suleymaana naywunoo fu, rewɓe muuɗum oonyi ɓernde muuɗum faa rewi tooruuji. O yiɗiraay Joomiraaɗo, Laamɗo makko e ɓernde makko fuu hono no baabiiko Daawda noon. 5 Suleymaana rewi tooru Sidoninkooɓe wi'eteendu Astarot, e tooru Amoninkooɓe nyiddiniindu wi'eteendu Milkom. 6 Suleymaana waɗi ko boni yeeso Joomiraaɗo, o ɗowtanaaki Laamɗo e laaɓal hono no babiiko Daawda wa'arunoo noon. 7 Wakkati oon, Suleymaana nyiɓi cuuɗi tooruuji dow waamnde wonnde lettugal Urusaliima. Tooruuji ɗiin ngoni Kemos, tooru Mo'abinkooɓe nyiddiniindu, e Molek, tooru Amoninkooɓe nyiddiniindu. 8 Noon Suleymaana waɗirani rewɓe jananɓe ɓeen fuu, faa ɓe kirsana tooruuji maɓɓe, ɓe mbulana ɗi ure.
9 Joomiraaɗo tikkani mo sabo ɓernde makko tottitake Laamɗo Israa'iila ɓanganɗo mo kile ɗiɗi. 10 Joomiraaɗo sappaniino mo taa o jokka allaaji goɗɗi, ammaa o ɗowtanaaki ko yamirnoo mo ɗuum. 11 Ndeen Joomiraaɗo wi'i Suleymaana:
— Saabe no oonyoriɗaa ni, e ko a ɗowtanaaki amaana am e sariyaaji ɗi njamirmaami ɗiin, mi teetan laamu maaɗa mi hokka ngu golloowo maa. 12 De saabe bammaa Daawda, mi waɗataa ɗum joonin faa haddi nguurndam maaɗa, ammaa ɗum laatoyto. Mi teetan laamu e junngo ɓiya. 13 Ammaa mi teetidataa ngu. Mi yoppidan ɓiya e lenyol gootol saabe maccuɗo am Daawda e saabe Urusaliima, galluure nde cuɓiimi.
Wayɓe Suleymaana
14 Joomiraaɗo umminani Suleymaana ganyo Edominke, mo lenyol kaananke Edom bi'eteeɗo Hadad. 15 Tawi wakkati mo Daawda haɓdanno e Edom ndeen, Yo'ab hooreejo sordaasiiɓe yehino faa mooɓowa Israa'iilankooɓe maayɓe ley wolde ndeen. Wakkati oon Yo'ab wari worɓe leydi Edom fuu. 16 Yo'ab e jamaa Israa'iila keddake ley Edom faa waɗi lebbi jeegom faa ɓe timmina worɓe ɓeen fuu. 17 Ammaa Hadad e maccuɓe bammum Edominkooɓe woɓɓe ndoggiri faa leydi Misira. Tawi Hadad wo suka pamaro wakkati majjum. 18 Ɓe ƴuuri Madiyan, ɓe panti Paran, ɓe mbittodii e worɓe wonɓe toon, de ɓe njaadi e muɓɓen Misira to kaananke Fira'awna. Kam hokki mo suudu e neema e gese. 19 Hadad heɓi moƴƴere yeeso Fira'awna faa hokki mo minyoo deekum o dewla. Oon woni minyoo deekiiko bi'eteeɗo Tahafenes. 20 Minyoo Tahafenes oon rimani Hadad ɓiɗɗo gorko na wi'ee Genubat. Tahafenes du bambi suka oon ley laamordu hakkunde ɓiɓɓe Fira'awna worɓe. Nii Genubat mawnidiri e ɓiɓɓe Fira'awna nder laamordu. 21 Gilla leydi Misira, Hadad nani kabaaru maayde Daawda. O nani Daawda hawritowi e maamiraaɓe muuɗum, kam e Yo'ab hooreejo sordaasiiɓe oon fuu. Ndeen o ŋaarii Fira'awna laawol faa o hoota leydi makko. 22 De Fira'awna ƴami mo wi'i:
— Yalla won ko ŋakki ma ley wuro am ɗo de aɗa muuyi hootude leydi maaɗa naa?
Hadad jaabii, wi'i:
— Fay gootum ŋakkaay kam, ammaa, accu mi hoota.
23 Joomiraaɗo umminani Suleymaana ganyo goɗɗo bi'eteeɗo Riijon ɓii Eliyaada. Riijon oon, wo gorko dogguɗo joomum Hadaadijer kaananke Sobah. 24 Nde Daawda warunoo worɓe Hadaadijer ndeen, Riijon hawrondinani hoore muuɗum yimɓe bonɓe de yaadi e muɓɓen Damas. O laatii kaananke leydi ndiin. 25 Wo o ganyo Israa'iila haddi nguurndam Suleymaana fuu. Riijon oon golli ko boni hono Hadad, o laami leydi Siiriya. O wanyi Israa'iila nganyaandi mawndi.
No Yerobaam murtirani Suleymaana
26 Yerobaam ɓii Nebat mo Efrayim, wuro Sareeda wo gollanoowo Suleymaana. Inniiko wo Seruwa, debbo mo gorum wuura. O muurtani kaananke Suleymaana. 27 Inan no o muurtirani kaananke: Suleymaana na nyiɓannoo ko wi'ete Milo, ɗum woni ko hiɓɓini kokuwol piiliingol galluure bamum Daawda. 28 Yerobaam oon, wo jokolle karwuɗo. Nde Suleymaana yi'unoo no o gollirta fu, suɓii mo faa o dawrana golleeji tilsanɗi yimɓe lenyol Yuusufi. 29 Wakkati oon, tawi Yerobaam na wurtonoo galluure Urusaliima. Annabi Ahiya mo wuro Silo hawri e makko dow laawol. Ahiya na ɓornii kaddungal kesal. Kamɓe ɗiɗo tan ngoni ley ladde. 30 Ndeen Ahiya nanngi saayo manngo ngo ɓornii ngoon, seeki ngo pecce sappo e ɗiɗi, 31 de wi'i Yerobaam:
— Adu pecce sappo ɗe, wo aan jeyi; sabo inan ko Joomiraaɗo Laamɗo Israa'iila wi'i: «Mi teetan laamu e junngo Suleymaana de mi hokke lenyi sappo. 32 Ammaa mi yoppidan mo lenyol gootol saabe suka am Daawda e saabe Urusaliima, galluure nde cuɓiimi hakkunde lenyi Israa'iila fuu. 33 Noon ngaɗirammi sabo yimɓe ɓeen njoppii kam, de ɓe cujidani Astarot tooru Sidoninkooɓe e Kemos tooru Mo'abinkooɓe, e Milkom tooru Amoninkooɓe. Ɓe ndewaay laabi am, ɓe ngaɗataa ko fonnditii yeeso am, ɓe ɗowtantaako jamirooje am e sariyaaji am hono no Daawda baaba Suleymaana waɗannoo noon. 34 Ammaa mi teetataa laamu nguun e nguurndam makko. Mi accidan mo e baawɗe faa timmoode balɗe makko saabe maccuɗo am Daawda mo cuɓiimi, jokkuɗo jamirooje am e sariyaaji am. 35 Mi ittan laamu e juuɗe ɓii Suleymaana, de mi hokke aan Yerobaam laamoɗaa dow lenyi sappo. 36 Mi hokkan ɓii Suleymaana lenyol gootol faa jayngol maccuɗo am Daawda heddoo yeeso am faa abada ley Urusaliima galluure nde cuɓiimi faa mi tabintina Innde am. 37 Aan Yerobaam, mi waɗete kaananke dow Israa'iila. Laamoroɗaa no kaajoraɗa dow lenyi Israa'iila sappo ɗiin. 38 Hettinda huunde fuu ko njamirammaami, njokka laabi am, ngaɗaa ko wooɗi yeeso am, ɗowtanoɗaa sariyaaji am e jamirooje am hono no maccuɗo am Daawda waɗanno noon. Si a waɗii noon, mi wondan e maaɗa, mi tabintinan laamu maaɗa hono no ngaɗirmi e Daawda, mi hokkete Israa'iila. 39 Noon leeƴinirammi ƴuwdi Daawda, ammaa ɗum heddortaako noon faa abada.»
40 Caggal ɗuum, Suleymaana fili ittude yonki Yerobaam. Yerobaam doggiri Misira to kaananke Siisak. Toon o heddii faa maayde Suleymaana.
41 Kabaaru golle Suleymaana keddiiɗo e ko waɗi, e hakkillo muuɗum fuu winndaama ley dewtere Kabaaruuji Suleymaana. 42 Duuɓi 40 Suleymaana laamorii dow Israa'iila ley Urusaliima. 43 Ndeen Suleymaana maayi, hawritowi e maamiraaɓe muuɗum. Ɓe mooɓi mo ley galluure baabiiko Daawda. Ɓiyiiko Rehabaam loomti mo laamii.