No Suleymaana nyiɓiri suudu muuɗum laamordu.
7
1 Suleymaana nyiɓiri ɓaade muuɗum duuɓi sappo e tati de timmini. 2 O nyiɓi suudu wi'eteendu «Cukkuri Liban». Njuuteefi mayru wo piyanɗe 100, njaajeefi mayru wo piyanɗe 50, tooweefi mayru wo piyanɗe 30. Indu woodi guurti bimmbeeje nay tiigorɗe kippudi gaɗiraaɗe leɗɗe seddere. Leɗɗe seddere goɗɗe du na palaa dow bimmbeeje ɗeen faa tiigo kippudi ndiin. 3 Kippudi ndiin du, leɗɗe seddere nyiɓiraa. Na woodi pale 45 tiigiiɗe ndi, gaɗaaɗe guurti tati, guurtol fuu pale 15. 4 Suudu nduun waɗanaa guurti feneetereeji tati. Feneetereeji ɗiin na kuccondiri. 5 Dammbuɗe e feneetereeji mayru fuu na ngoodi coɓɓuli nay, dammbuɗe mayru tati tati na kuccondiri. 6 Suleymaana waɗi tenddeere wi'eteende «Cuural Bimmbeeje». Njuuteefi mayre wo piyanɗe 50, njaajeefi mayre du wo piyanɗe 30. O dobi danki ki kippudi njaajundi yeeso mayre.7 O nyiɓani jooɗorgal laamu makko suudu wi'eteendu «Suudu Sariya». Ley nduun o saroto. O uddiri maadi mayru fuu leɗɗe seddere, gilla ley faa yottii kippudi.
8 Suudu Suleymaana waaldudu na woni feere gaɗa «Suudu Sariya» nduun. Nyimngo majji fuu wo gootum. Katin du o nyiɓani ɓii Fira'awna debbo mo o dewli oon suudu nanndundu e majji.
9 Cuuɗi ɗiin ley muɓɓen e yaasin muɓɓen fuu, wo kaaƴe mawɗe, cehaaɗe tiiɗɗe coggu nyiɓiraa. Kaaƴe ɗeen cehaa gereeji ɗiɗi fuu, de ndekondiraa gilla ley faa yottii kippudi majji ɗi fuu. Nyimngo ngoon wo gootum gilla taliyaare suudu Joomiraaɗo faa yottii taliyaare mawnde. 10 Joƴƴinirɗe cuuɗi ɗeen ngaɗiraama kaaƴe mawɗe tiiɗɗe coggu. Iɗe ngaɗa piyanɗe jeetati e piyanɗe sappo. 11 Dow majje du, na woodi kaaƴe tiiɗɗe coggu, ponndaaɗe de cehaa, tawti leɗɗe seddere. 12 Taliyaare mawnde ndeen du fiiliraa guurti kaaƴe cehaaɗe tati e guurtol leɗɗe seddere gootol. Kokuwol hono ngool du nyiɓaama ley taliyaare wonnde ley suudu Dewal Joomiraaɗo e to tenddeere naatirde suudu nduun.
No Hiram waɗiri kujje Suudu Dewal Mawndu
(2 Kabaaruuji 2:10-13, 3:15-5:1)
13 Kaananke Suleymaana neli waddane gorko bi'eteeɗo Hiram mo Tirus. 14 Baabiiko wuuraa, inniiko wo jeyaaɗo e lenyol Naftali. Baabiiko du, wo neɗɗo Tirus gollannooɗo gollal njamndi mboɗeeri. Hiram wo neɗɗo keewɗo hakkillo e nyeenyal e anndal golle njamndi mboɗeeri. O wari to Suleymaana, o gollanii ɗum golle ɗeen fuu.
15 O tafi bimmbeeje ɗiɗi gaɗiraaɗe njamndi mboɗeeri. Tooweefi majje wo piyanɗe 18. Ɓoggol ngol piyanɗe 12 fiilata wootere majje fuu. 16 O tafi du iri kufuneeje ɗiɗi gaɗiraaɗe njamndi mboɗeeri, o yowi dow ko'e bimmbeeje ɗeen. Hufuneere wootere fuu, tooweefi muuɗum wo piyanɗe joy. 17 Katin o waɗani kufuneeje ɗeen callali njamndi mboɗeeri na moorondiraa na ndekaa dow ko'e majje. Dow hoore bimmbeere fuu na fiilaa moorli callali jeɗɗi. 18 O tafi du njamndi mboɗeeri o waɗi alhaali ɓiɓɓe rummaneeje, o fiili guurti ɗiɗi dow hoore bimmbeere fuu. 19 Hoore bimmbeere fuu waɗaama alhaali kuttukurutol, tooweefi muuɗum wo piyanɗe nay. 20 Dow majjum katin, ɗakkol callali ɗiin dow ɗo kufuneeje ɗeen ɓuri yaajirde ɗoon, na fiilaa guurti ɓiɓɓe rummaneeje 200. 21 O darni bimmbeeje ɗeen dammbugal Suudu Dewal Mawndu. Wootere darna gere nyaamo, o inndiri nde Yaakin (ɗum na fiirta: imo semmbinɗina). Heddiinde du darna gere nano, o inndiri ndeen Bo'as (ɗum na fiirta: semmbe e makko woni).
22 Ko'e bimmbeeje ɗeen na nanndi e kuttukuruuti. Ndelle noon gollal bimmbeeje ɗeen timminiraa.
23 Ndeen Hiram tafiri taasawal manngal mbi'eteengal Maayo e njamndi mboɗeeri. Senngo yaade senngo na waɗa piyanɗe sappo. Tooweefi majjum du, na waɗa piyanɗe joy. Ɓoggol ngol piyanɗe 30 fiilata ɗum. 24 O tafi alhaali jollooji de o fiilni e majjum kile ɗiɗi, fiyande fuu na woodi jollooji sappo. Jollooji ɗiin tafidaama e majjum. 25 Taasawal ngaal dekaa dow alhaali ga'i 12 tottondirɗi. Tati majji na kucciti soɓɓiire, tati gorgal, tati horɗoore, tati lettugal. Taasawal ngaal na dekii dow majji. 26 Tekkeefi toni maggal na waɗa njuuteefi kolli junngo. Toni maggal na ngaɗaa hono pinndi kuttukuruutol. Ingal waawi hooƴude liitereeji 44 000.
27 Caggal ɗuum Hiram waɗiri hono tallirkoy sappo tafiraakoy njamndi mboɗeeri. Gootel fuu njuuteefim e njaajeefim wo piyanɗe nay, tooweefim du piyanɗe tati. 28 Inan no ɓe ngaɗiri tallirkoy koy: ikoy ngoodi hono alluuje njamndi mboɗeeri, na gattaa hakkunde tiigorɗe. 29 Alluuje ɗeen na ŋenyira alhaali dawaaɗi ladde e ga'i e keruba'en. Dow kujje ɗeen e ley majje fuu na woodi hono pinndiiji piiltinaaɗi. 30 Tallirkoy koy fuu na ngoodi cabbi njamndi mboɗeeri nay tiigiiɗi taare muɓɓen. Coɓɓuli nay ɗiin du na ngondi cabbi tiigotooɗi taasawal ngaal. Alhaali pinndiiji ŋarɗuɗi na ngoni dow becce majji. 31 Hoore tallirgel fuu na waɗana ko nanndi e taarde mawnde na towtidiri ɗum fiyande wootere. Njaajeefi taarde ndeen wo fiyande e feccere. Iɗum sehaa faa ŋarɗinee. (Tallirkoy koy na ngaɗira alluuje ɗe coɓɓuli nay nay.) 32 Taare ɗeen na ceŋira cabbi njamndi ley tallirkoy koy. Njaajeefi taarde wootere fuu wo fiyande e feccere. 33 Taare ɗeen na ngaɗira hono taare torkooru. Wooɗi du, cabbi tiigotooɗi taarde mawnde e taaroy e renyooji fuu njamndi mboɗeeri tafira. 34 Tiigorɗe gonɗe sengooji majjum nay ɗeen fuu na cengondiri e majjum. 35 Dow tallirgel fuu na woodi hono hootonnde. Njaajeefi mayre wo feccere fiyande. Tiigorɗe tallirkoy ɗeen e cabbi majje fuu tafidaama e majjum. 36 Alluuje e taare e cabbi majjum fuu ŋarɗiniraama keruba'en e dawaaɗi ladde e leɗɗe tamarooje. Walaa fuu ɗo ŋarɗinaaka e majjum. Ɗum fuu ɗum fiilna alhaali taarde pinndi. 37 Noon Hiram waɗiri tallirkoy sappo koy fuu alhaali gooto. 38 O tafiri taasaaje mawɗe sappo e njamndi mboɗeeri. Njaajeefi taasawal gootal fuu piyanɗe nay. Liitereeji ndiyam 840 kebbinta ɗum. 39 O joƴƴini joy majje yaasin suudu nduun gere horɗoore, joy keddiiɗe du, yaasin suudu nduun gere soɓɓiire. O joƴƴini taasawal ngaal gere nyaamo, faro soɓɓundu suudu nduun horɗoore-lettugaare. 40 Hiram tafi du barmaaji e pelliiji e le'oy.
Hiram timminni gollande Kaananke Suleymaana ley Suudu Dewal Joomiraaɗo. Ɗum woni:
41 bimmbeeje ɗiɗi e
kufuneeje majje ɗe alhaali taasawal e
moorli callali ɗiɗi ŋarɗinirɗi kufuneeje ɗeen e
42 alhaali ɓiɓɓe rummaneeje 400 gonɗe dow moorli callali ɗeen e
43 taasaaje sappo dekaaɗe dow torkooji sappo ɗiin e
44 taasawal ndiyam manngal bi'eteengal Maayo e alhaali na'i tiigiiɗi ngal e
45 barmaaji e pelliiji e le'oy.
Kaananke Suleymaana waɗi Hiram tafiri kujje Suudu Dewal Joomiraaɗo ɗeen fuu e njamndi mboɗeeri ɓoominaandi. 46 Kaananke waɗi ɗum tafira e tafirɗe loope faro maayo Urdun hakkunde gure bi'eteenɗe Sukkoot e Saaretan. 47 Kujje gaɗiraaɗe njamndi mboɗeeri ɗeen na ɗuuɗi faa Suleymaana foondaay teddeefi majje.
48 Katin du, Suleymaana waɗiri kujje Suudu Dewal Mawndu ɗeen fuu e kaŋŋe:
hirsirde e
taabawal buuru cakketeeɗo gaddeteedo yeeso Joomiraaɗo e
49 fitillaaji e kaŋŋe dimo (ɗiin joƴƴinaa dammbugal Suudu Ɓurndu fuu Senaade nduun. Joy majji gere nyaamo, joy keddiiɗi du gere nano) e
alhaali pinndi e fitillaaji feere feere e
ko ittirtee ƴulɓe kuɓɓooje e
50 le'oy e taƴirkoy e taasawoy e payanɗe e jirbe nyeɗirɗe ƴulɓe kuɓɓooje fuu e kaŋŋe dimo.
51 Nde Kaananke Suleymaana timminoo gollal nyiɓugol Suudu Dewal Joomiraaɗo ngaal fuu, o watti kujje, ɗum woni kaŋŋe e cardi e kujje feere feere ɗe baabiiko Daawda seninnoo fuu ley keesuwal gonngal ley suudu ngaal.