Nyiɓugol Suudu Dewal Laamɗo Mawndu
(2 Kabaaruuji 3:1-14)
6
1 Suleymaana fuɗɗi nyiɓude Suudu Dewal Joomiraaɗo duuɓi 480 caggal wurtaade yimɓe Israa'iila leydi Misira. Wakkati oon hawri e hitaande nayaɓerde laamu makko, ley lewru ɗiɗaɓurdu, lewru Siwa. 2 Njuuteefi suudu ndu Suleymaana nyiɓani Joomiraaɗo nduun wo piyanɗe 60, njaajeefi mayru wo piyanɗe 20, tooweefi mayru du, wo piyanɗe 30. 3 Tenddeere na takkondiri e suudu nduun, njuuteefi mayre wo piyanɗe 20, njaajeefi mayre du, wo piyanɗe 10. 4 O waɗi feneetereeji gaɗiraaɗi palpalti leɗɗe. 5 O nyiɓi cuuɗi goɗɗi takkii Suudu Dewal Mawndu, ɗi piilii becce suudu nduun tati, ammaa wecco yeesoowo ngoon fiilaaka. 6 Cuuɗi ɗiin ndekondira. Njaajeefi leyiiru nduun wo piyanɗe joy, hakkundeeru nduun piyanɗe jeegom, dowuuru nduun du, piyanɗe jeɗɗi, saabe kokuuji yaasiiji ɗiin na tekkiri ley de cewiri dow. Ɓe ngaɗi lugge e becce Suudu Dewal nduun faa taa leɗɗe cuuɗi takkiiɗi ɗeen naata ley nyimngo mayru. 7 Ndu nyiɓiraama kaaƴe cehaaɗe illa nokku to ittaa toon. Duko jammbere maa marto maa ko laatii duko njamndi fuu nanaaka faa nyiɓugol ngool timmina. 8 Dammbugal suudu leyiiru nduun na hucciti horɗoore. Ƴeeŋirɗe cuuɗi tati ɗiin fuu na ndobondiri. 9 O nyiɓi suudu nduun, o timmini de o hummbiri ndu leɗɗe seddere. 10 Cuuɗi takkiiɗi e kokuuji ɗiin wooturu fu piyanɗe joy tooweefi. Leɗɗe seddere ceeŋondiri ɗi e Suudu Dewal nduun.11 Joomiraaɗo haaldi e Suleymaana, wi'i:
12 — Saabe aɗa nyiɓa suudu ndu, wooɗi du, si nii a ɗowtanake jamirooje am, a taykake sariyaaji am, a jokkii ko njamirmi fu, mi tabintinan haala ka kaaldunoomi e bammaa Daawda kaan. 13 Mi jooɗoto hakkunde yimɓe am Israa'iilankooɓe, mi yoppataa ɓe.
14 Suleymaana nyiɓi suudu Joomiraaɗo nduun yottini. 15 Maadiiji ley suudu nduun fuu uddiraa leɗɗe seddere illa ley faa yotti kummbudi. O suddiri taliyaare ley suudu nduun fuu e leɗɗe sipire. 16 Suudu caggalaaru nduun o waɗi Nokkuure Ɓurnde Fuu Senaade. Njuuteefi mayru wo piyanɗe 20. O waɗi maadiiji nokkuure ndeen fuu uddira leɗɗe seddere. 17 Suudu go'aɓurdu nduun wo piyanɗe 40 njuuteefi. 18 Leɗɗe seddere ɗe o uddiri maadiiji ley suudu ɗeen fuu ŋarɗinira nate paali e iri pinndiiji peertiiɗi. Ɗum fuu wo leɗɗe seddere tan ɗum waɗira, hayre fuu yi'aaka nder majjum. 19 Suudu caggalaaru nduun moƴƴinaa faa Keesuwal Amaana Joomiraaɗo joƴƴinee, 20 njuuteefi e njaajeefi e tooweefi mayru fuu wo piyanɗe 20. O bolgorii ndu kaŋŋe. O waɗiri nokkuure kirsamaaji du e leɗɗe seddere de o bolgi kaŋŋe dow majje. 21 Suleymaana bolgorii ley suudu nduun fuu kaŋŋe dimo, o fiiltiniri dammbugal mayru callali kaŋŋe, wooɗi du, o bolgorii ngal kaŋŋe. 22 Ndelle o bolgorake Suudu Dewal Mawndu nduun fuu kaŋŋe, walaa fuu to kaŋŋe walaa e mayru. Sakkirde wonde to ɓuri fuu senaade ndeen du, bolgoraa kaŋŋe.
23 Ley nokkuure ndeen o waɗiri maleyka'en ɗiɗo wi'eteeɓe keruba'en e leɗɗe jaytun, mono fuu darnde muuɗum wo piyanɗe sappo. 24 Njuuteefi wippeengo kerubaajo wooto fu, wo piyanɗe joy. Hoore wippeengo nyaamo yaade hoore wippeengo nano wo piyanɗe sappo. 25 Njaajeefi kerubaajo ɗiɗaɓo oon du, wo piyanɗe sappo. Ɓe ɗiɗo fuu darɗe maɓɓe e alhaaliiji maɓɓe fuu wo gootum. 26 Darnde gooto maɓɓe fuu wo piyanɗe sappo. 27 O darni ɓe hakkunde Nokkuure Ɓurnde Fuu Senaade ndeen. Bippeele maɓɓe na peerti faa hoore wippeengo wooto na meema wecco suudu nduun gere nano, hoore wonngo du na meema wecco nyaamo, bippeele maɓɓe ɗeen na kawri hakkunde suudu ɗoon. 28 O bolgorii keruba'en ɓeen kaŋŋe.
29 Maadiiji Suudu Dewal Mawndu nduun, ley e yaasin majji fuu, nyenyiraa nate keruba'en e pinndiiji peertiiɗi. 30 Taliyaare ley Suudu Ɓurndu fuu Senaade e suudu go'aɓurdu nduun fuu mbolgoraa kaŋŋe. 31 O waɗiri gampuuje ɗiɗi kawrooje ommbirɗe suudu caggalaaru ɗeen e leɗɗe jaytun. Njaajeefi seraaji dammbuɗe ɗeen wo piyanɗe nay. 32 O ŋarɗiniri gampuuje ɗiɗi gaɗiraaɗe leɗɗe jaytun ɗeen e nate keruba'en e leɗɗe tamarooje e pinndiiji peertiiɗi. O bolgorii gampuuje ɗeen fuu e kaŋŋe, o bolgii kaŋŋe dow keruba'en e dow leɗɗe tamarooje ɗeen fuu. 33 Noon du dammbugal Suudu Dewal Mawndu naatirgal ngaal waɗiraa leɗɗe jaytun. Njaajeefi seraaji dammbugal ɗiin wo piyanɗe joy. 34 O waɗani dammbugal ngaal gampuuje ɗiɗi gaɗiraaɗe leɗɗe sipire. Gampuwal fuu na woodi pecce ɗiɗi baawɗe sowondireede. 35 O sehi nate keruba'en e leɗɗe tamarooje e pinndiiji peertiiɗi dow gampuuje ɗeen. O bolgii kaŋŋe dow majjum faa naatondirii. 36 O nyiɓiri kokuuji ɓaade caggalaare ɗiin guurti kaaƴe tati e guurtol leɗɗe seddere gootol. 37 Maadi Suudu Dewal Joomiraaɗo mawndu nduun njoƴƴinaamaa hitaande nayaɓerde laamu Suleymaana ley lewru Siw. 38 Ley hitaande sappo e go'aɓerde laamu makko, ley lewru jeetataburdu ɗum woni lewru Buulb, suudu nduun nyiɓidaa faa hawri, tawi alhaali nyimngo ngon fuu na foti e no anniyorano. Duuɓi jeɗɗi Suleymaana nyiɓiri ndu.