Tindinooje Husay
17
1 Ahitofel wi'i Absalom:— Accu mi suɓoo worɓe ujunaaje sappo e ɗiɗo faa min njaha min ndiiwa Daawda ley jemmaare nde. 2 Mi yottoto to makko wakkati o tampi, o yoosia. Mi fiiran mo no hulɗinorii, yimɓe wonduɓe e makko fuu ndoggan. Kanko kaananke oon tan mbarammi. 3 Ndeen mi waddante yimɓe ɓeen fuu. Sabo si a heɓii gorko oon fu, wooɗi, a heɓii yimɓe Israa'iila ɓeen fuu. Ndeen yimɓe fuu keɓan jam.
4 Tindinooje ɗeen kawranii Absalom e mawɓe Israa'iila fuu.
5 Ammaa Absalom wi'i:
— Noddee Husay Arkiijo faa nanen ko wi'ata kam du.
6 Nde Husay warnoo to Absalom ndeen, Absalom wi'i mo:
— Inan ko Ahitofel wi'i. Yalla en ngaɗiran noon naa? Si wanaa noon fu, haalu aan du.
7 Ndeen Husay wi'i Absalom:
— Tindinooje ɗe Ahitofel hokki ɗeen mbooɗaa wakkati o. 8 Aɗa anndi bammaa e worɓe mum, wo ɓe sordaasiiɓe suuyɓe sanne, wo ɓe tikkuɓe hono no cirgu ngu ɓiɓɓem mbujjaa ley ladde. Katin du bammaa na woowi wolde sanne. O waaldataa e sordaasiiɓe. 9 Fay joonin tawan imo suuɗi ley ngayka naa nokkuuje goɗɗe. Ndelle, si o fuɗɗii saaminde yimɓe meeɗen, nanuɗo ɗum fu wi'an «Hey, jokkuɓe Absalom mbaraama!» 10 Ndeen fay cuuyɗo hono rawaandu ladde, ɓernde mum taayan kulol. Sabo Israa'iila'en fuu na anndi bammaa wo jaalotooɗo, wonduɓe e muuɗum du wo suuyɓe. 11 Jonle, miɗo tindine, accaa Israa'iila'en fuu kawrita to maaɗa, illa Dan faa yaha Beerseba, yimɓe ɗuuɗɓe hono njaareendi daande maayo. Aan du ardoɗaa ɓe ley wolde ndeen. 12 Ndeen en kippoto mo to o tawaa fuu, en caaman dow makko hono no saawandere waɗirta dow leydi. Fay gooto maɓɓe heddataako, wanaa kanko wanaa wonduɓe e makko du. 13 Si o naatii ley ngalluure faa o mooloo, ndeen Israa'iila'en fuu piildan ngalluure ndeen e ɓoggi, de ndaasen nde e ley naɗɗol faa taa fay pettel mayre heddoo.
14 Absalom e worɓe mum fuu mbi'i:
— Tindinooje Husay Arkiijo oon na camti ɗe Ahitofel ɗeen.
Ɗum laatorii noon sabo Joomiraaɗo na anniyii jaalaade tindinooje Ahitofel booɗuɗe ɗeen faa o yaara Absalom ley halkere.
15 Husay humpiti Sadok e Abisay, almaami'en ɓeen, wi'i:
— Ahitofel tindinii Absalom e mawɓe Israa'iila nii e nii ammaa miin, mi tindinii ɓe ngaɗa nii e nii. 16 Jonle karee nulee kabaaru oon to Daawda. Mbi'ee mo taa o walaa jemma oon ley ladde to feƴƴitirde maayo toon, de o feƴƴita, o yaha yeeso. Si wanaa noon fu, kanko kaananke e wonduɓe e makko fuu ɓe kalkete.
17 Yonatan e Ahimaas na keddii to wuro En-Rogel. Korɗo gomma yehi humpitowi ɓe kabaaru oon, de kamɓe du ɓe njehi faa ɓe kollowa ɗum kaananke Daawda. Ɓe mbaawaanoo naatude ngalluure ndeen kamɓe e ko'e maɓɓe, sabo ɓe nji'ete. 18 Ammaa jokolle gomma yi'i ɓe de holli Absalom. Ndelle ɓe ɗiɗo fuu ɓe karii ɓe njehi suudu neɗɗo jeyaaɗo Bahurim. Oon na jogii ɓunndu ley ɓaade mum. Ɓe naati ley mayru. 19 Deekiiko hooƴii daago, weƴƴiti ngo dow ɓunndu nduun de sankiti aawitirdi dow maggo. Fay huunde taykataake ɗoon.
20 Maccuɓe Absalom naatii suudu debbo oon, ƴami:
— Toy Ahimaas e Yonatan ngoni?
Debbo oon jaabii, wi'i:
— Ɓe peƴƴitii gooruwol.
Maccuɓe ɓeen pilii ɓe de njiitaay. Nii ɓe njeccorii Urusaliima.
21 Caggal ɓe njeccake, worɓe ɓeen mburtii ɓunndu, njehi kumpitowi kaananke Daawda. Ɓe mbi'i mo:
— Umma hara peƴƴitaa maayo, sabo Ahitofel tindinii nii e nii dow maaɗa.
22 Ndeen Daawda e wonduɓe e mum fuu ummii peƴƴiti maayo Urdun ngoon. Puɗal naange tawi fay gooto walaa mo feƴƴitaay Urdun.
23 Wakkati Ahitofel yiinoo tindinooje mum njokkaaka ndeen, watti kirke dow araawa mum, nanngi laawol, hooti wuro mum. O moƴƴini haajuuji koreeji makko de o ɓilitii. O maayi, o uwaa ley saabeere baabiiko.
24 Daawda du wari to wuro Mahanayim. Absalom du feƴƴiti maayo Urdun, kam e worɓe Israa'iila fuu. 25 Tawi Absalom waɗii Amasa hooreejo dow sordaasiiɓe, loomtini Yo'ap. Amasa wo ɓii Isma'ileejo bi'eteeɗo Itira. Dee Amasa wo Abigayil ɓii Nahas. Sakiike Abigayil debbo wo Seruya inna Yo'ap. 26 Absalom e yimɓe Israa'iila ndaaki ley leydi Galaad.
27 Wakkati Daawda warnoo wuro Mahanayim ndeen, wallooɓe ɗum woɓɓe du ngari. Kamɓe ngoni: Sobi ɓii Nahas jeyaaɗo wuro Rabba ley leydi Amoninkooɓe, e Makir ɓii Amiyel jeyaaɗo wuro Lo-Debar, e Barsilay jeyaaɗo wuro Rogelim ley leydi Galaad. 28 Ɓe ngaddii pukkorɗe e payanɗe e kaake e alkama e gawri e conndi e gawri ca'aandi e nyebbe iri feere feere, 29 tawti njuumndi e ɗaaniiɗam e baali e tame wulsere (waɗiraande kosam nagge). Ɓe ngaddii ɗum fuu faa Daawda e yimɓe muuɗum nyaama. Sabo ɓe mbi'ii, «Yimɓe ɓe njolbii, tampii, ɗomɗii e ley ladde.»