Daawda e Siba
16
1 Nde Daawda faltinoo hoore waamnde ndeen, inan Siba, golloowo Mefiboset, na heɗii faa sakkitoo mo. Imo woodi araaji ɗiɗi dimndaaɗi buuruuje keme ɗiɗi e tame cabiije joorɗe hemre e ɓiɓɓe leɗɗe belɗe hemre e sumalle cabijam. 2 Kaananke wi'i Siba:— Ɗume wo saabe ɗume?
Siba jaabii, wi'i:
— Araaji ɗii kaa wo faa koreeji maaɗa mbaɗɗoo. Buuruuje ɗe e ɓiɓɓe leɗɗe ɗee du wo faa jokolɓe maa nyaama. Cabijam ɗam du wo faa tampuɓe ley ladde nde njara, keɓa semmbe.
3 Ndeen kaananke ƴami:
— Toy Mefiboset, taan jooma Sawulu woni?
Siba wi'i mo:
— Imo jooɗii Urusaliima sabo o miilake hannden yimɓe Israa'iila kokkitan mo laamu maamiiko.
4 Kaananke wi'i Siba:
— Hettinda, ko Mefiboset jeynoo fuu, aan jeyi joonin.
Siba wi'i:
— Mi teddinte. Joomam kaananke, hinney maaɗa heddoo dow am.
Daawda e Simi
5 Wakkati kaananke Daawda yottinoo Bahurim ndeen, hawri e gorko ina wurtoo. Gorko oon wo jeydaaɗo e Sawulu. Imo wi'ee Simi ɓii Gera. Imo yaha imo huɗa Daawda. 6 Imo limna Daawda e maccuɓe muuɗum fuu kaaƴe. O limniri noon fay ko tawa sordaasiiɓe kaananke suuyɓe e yimɓe mum ɓeen fuu na piilii ɗum. 7 Simi na yaha, na wi'a:
— Woɗɗa! Woɗɗa aan dufoowo ƴiiƴam, kuyfuɗo! 8 Joomiraaɗo yomnitake maa ƴiiƴam suudu Sawulu ɗam ndufuɗaa. Laamu njaɓtuɗaa e junngo Sawulu nguun, Joomiraaɗo hokkitii ngu ɓiya Absalom. Ndaar, jukkungo na woni dow maaɗa sabo a dufoowo ƴiiƴam!
9 Ndeen Abisay ɓii Seruya wi'i kaananke:
— Ko waɗi rawaandu waatundu ndu na huɗe, aan joomam kaananke? Accu mi yaha mi taƴa hoore makko.
10 Ammaa kaananke wi'i:
— Ɗume jomii on e am, onon ɓiɓɓe Seruya? Si imo huɗa kam sabo Joomiraaɗo wi'ii mo o huɗa kam, ndelle moy waawi felude mo dow ko o waɗata ɗum?
11 Ndeen Daawda wi'i Abisay oon e maccuɓe muuɗum fuu:
— Inan, fay ɓiyam na filoo halkude nguurndam am, sakko neɗɗo jeyaaɗo e lenyol Benyamin oon le. Accee o huɗa, sabo Joomiraaɗo wi'i mo waɗa ɗum. 12 Hasii Joomiraaɗo ndaaran torra am de yomnitanoo kam kuddi kuɗaami hannden ndi.
13 Nii Daawda e worɓe mum na njaha, Simi du na rewi senngo waamnde ɗakkundurnde e maɓɓe na huɗa yaade, na limna ɓe kaaƴe, na wicca ɓe sollaare.
14 Kaananke e yaadiraaɓe muuɗum fuu njottii hunnduko maayo Urdun, iɓe tampi sanne. Ɓe powti ɗoon.
Tindinooje Husay e Ahitofel
15 Tawi wakkati oon Absalom e worɓe Israa'iila fuu ngarii Urusaliima. Ahitofel du ina wondi e makko. 16 Nde Husay Arkiijo yigoo Daawda oon warnoo to Absalom ndeen, wi'i ɗum:
— Kaananke, Laamɗo juunna balɗe maa! Laamɗo juunna balɗe maa!
17 Absalom wi'i mo:
— Yalla nii woni hoolaare maaɗa to yigoo maaɗa Daawda naa? Ko waɗi a jokkaay yigoo maaɗa oon?
18 Husay wi'i Absalom:
— A'aa. Miɗo yiɗi wondude e mo Joomiraaɗo e yimɓe Urusaliima e yimɓe Israa'iila ɓeen fuu cuɓii. Wo kanko njiɗumi wondude, wo kanko njiɗumi jooɗodaade. 19 Katin du, moy njeyumi gollande? Wanaa miɗo jeyi gollande ɓiyiiko naa? Hono no ngollirannoomi bammaa, nii du ngolliranammaami.
20 Ndeen Absalom wi'i Ahitofel:
— Hokku min tindinooje maaɗa. Ɗume min njeyi waɗude?
21 Ahitofel jaabii, wi'i:
— Naattu nattaaɓe bammaa ɓe o yoppi faa ndooma laamordu ndu. Ndeen Israa'iila'en fuu nanan a laatake ko luuɓi e hinere bammaa, de juuɗe wonduɓe e maaɗa fuu cemmbinɗinte.
22 Ndelle ɓe nyiɓani Absalom hukum dow suudu. Absalom fukkodii e nattaaɓe bammum yeeso Israa'iila'en fuu.
23 Tawi ley balɗe ɗeen tindinooje ɗe Ahitofel hokkunoo ɗeen na teddi hono haala ƴuuruka to Laamɗo. Nii Daawda e Absalom ɗiɗo fuu taykorii haala makko kaan.