2 Samuwiila 9

Daawda e Mefiboset

1 Wooɗi, nyannde gomma Daawda ƴamii:

— Yalla na woodi keddiiɗo ley suudu Sawulu naa? Miɗo yiɗi mi holla mo hinney saabe yigoo am Yonatan.

2 Tawi na woodi kawjotooɗo ley suudu Sawulu bi'eteeɗo Siba. Ɓe ngaddi mo to Daawda, de wi'i mo:

— Aan woni Siba naa?

O jaabii o wi'i:

— Miin, maccuɗo maaɗa.

3 Kaananke ƴami mo:

— Yalla na heddii e ley suudu Sawulu mo mbaawumi hollude hinney Laamɗo naa?

Siba jaabii kaananke, wi'i:

— Ayyo, na heddii ɓii Yonatan gooto. De o bonngiiɗo koyɗe ɗiɗi fuu. 4 Kaananke ƴami mo toy o woni? Siba jaabii, wi'i imo woni ley suudu Makir ɓii Amiyel to wuro Lo-Debar.

5 Ndelle Daawda nuli o waddee to suudu Makir ɓii Amiyel wuro Lo-Debar. 6 Innde makko wo Mefiboset ɓii Yonatan, taan Sawulu. O wari to Daawda de o sujidi e leydi faa o teddina ɗum.

Daawda noddi mo, wi'i:

— Mefiboset!

Oon jaabii, wi'i:

— Inani kam, miin maccuɗo maaɗa.

7 Daawda wi'i mo:

— Taa hulu, sabo sikke walaa mi hollete hinney saabe bammaa Yonatan. Mi hokkitete leyɗe ɗe maammaa Sawulu jeynoo fuu, de wakkati fuu a nyaamdan e amin.

8 Mefiboset sujidi, wi'i:

— Miin maccuɗo maaɗa wo mi ɗume faa taykoɗaa kam, miin rawaandu waatundu ndu?

9 Ndeen kaananke noddi Siba, maccuɗo Sawulu oon, wi'i mo:

— Ko Sawulu e suudum njoginoo fuu, mi hokkii ɗum taan jooma Sawulu. 10 Aan e ɓiɓɓe maa e maccuɓe maa, on ngollanan mo golle gese, a waddanan taan jooma ɓiɓɓe gese ɗeen. Mefiboset taan jooma du nyaamdan e amin wakkati fuu.

Tawi Siba na woodi ɓiɓɓe sappo e njoyo e maccuɓe noogayo. 11 Ndeen Siba wi'i kaananke:

— Miin maccuɗo maaɗa, mi waɗan ko njamirɗaa fuu, aan joomam kaananke.

Ndelle Mefiboset nyaamdi e Daawda hono wo o gooto e hakkunde ɓiɓɓe muuɗum. 12 Mefiboset na joginoo ɓinngel gorel bi'eteengel Mika. Wonɓe ley ɓaade Siba fuu laatii maccuɓe Mefiboset. 13 Nii Mefiboset wuurdi ley Urusaliima sabo wakkati fuu o nyaamdan e kaananke. Wo o bonngiiɗo koyɗe ɗiɗi fuu.