Bolwole Daawda
8
1 Caggal ɗuum Daawda jaalii Filistiyankooɓe, leeƴini ɓe. Katin du, o teeti ngalluure maɓɓe mawnde e laamu mayre. 2 Daawda jaalii Mo'abinkooɓe du. O fukkini nanngaaɓe ɓeen e leydi de o fonndiri ɓe e ɓoggol ponndirgol. Si ɓoggol ngool fonndaama e fukkiiɓe ɓeen kile ɗiɗi fu, ɓeen kaa mbaree. Si ngol fonndaama nde wootere du, ɓeen kaa accee mbuura. Mo'abinkooɓe ɓeen laatii maccuɓe Daawda, iɓe njoɓa ɗum lampo.3 Katin du, Daawda jaalii kaananke leydi Soba, bi'eteeɗo Hadadeser ɓii Rehoob. O haɓdi e muuɗum wakkati yahunoo faa semmbina laamu muuɗum to maayo Efaratis ndeen. 4 Daawda nanngi dorbotooɓe pucci makko ujunere e keme njeɗɗo e sordaasiiɓe ujunaaje noogayo. O taƴi codduli pucci ɗiin, ammaa o heddanii hoore makko hemre majji.
5 Siiriyankooɓe jeyaaɓe Damas ngarii faa mballa Hadadeser kaananke Soba, ammaa Daawda jaalake hakkunde maɓɓe worɓe ujunaaje noogay e ɗiɗo. 6 Daawda joƴƴini kawrite dawrooɓe faro Damas toon, de Siiriyankooɓe ɓeen du laatii maccuɓe Daawda na njoɓa ɗum lampo. Nokku fuu to Daawda yehi, Joomiraaɗo na hokka ɗum jaalagol. 7 Daawda jaɓii bawaaɗe kaŋŋe ɗe maccuɓe Hadadeser tiiginoo ɗeen, yaari ɗe Urusaliima. 8 Daawda itti alhana faa heewi e ley galluuje bi'eteeɗe Beeta e Berotay ɗe Hadadeser jeynoo ɗeen.
9 Wooɗi, kaananke leydi Hamat na wi'ee To'i. O humpitaa Daawda jaalake sordaasiiɓe Hadadeser fuu. 10 Ndelle o nuli ɓiyiiko Yoram to Daawda faa o jowta ɗum, o yetta (o barkina) ɗum ley ko jaalii Hadadeser, sabo tawa Hadadeser na haɓannoo e makko sanne. Yoram yaarani Daawda dokke gaɗiraaɗe cardi e kaŋŋe e alhan.
11 Daawda senini kujje ɗeen to Joomiraaɗo hono no o seniniri cardi e kaŋŋe ko ƴuuri e leyɗe ɗe o jaalii fuu. 12 Leyɗe ɗeen wo Edom e Mo'ab e Amon e Filistiya e Amalek. Gineeji ɗi o honi to Hadadeser ɓii Rehoob kaananke Soba du, o senini ɗi saabe Joomiraaɗo.
13 Innde Daawda ɓeydi mawnude (na nanee e tatteeji fuu) gaɗa ko warti wolde e Edomiyankooɓe. Ley wolde ndeen o wari Edomiyankooɓe ujunaaje sappo e njeetato ley Naɗɗol Lamɗam. 14 O joƴƴini kawrite dawrooɓe ley leydi Edom fuu. Yimɓe Edom ɓeen fuu laatii maccuɓe makko. To Daawda yehi fuu Joomiraaɗo na hokka ɗum jaalagol.
Gollidooɓe e Daawda
15 Daawda laamii Israa'iila fuu, ina waɗa ko dartii e ko fonnditii dow yimɓem. 16 Hooreejo sordaasiiɓe Daawda wo Yo'ap ɓii Seruya. Kayboowo dewte kabaaruuji wo Yoosafat ɓii Ahilut. 17 Almaami'en wo Sadok ɓii Ahituf e Ahimelek ɓii Abiyatar. Seraya du wo binndoowo. 18 Benaya ɓii Yehoyada wo hooreejo Karti'en e Peleti'en. Ɓiɓɓe Daawda worɓe du, wo ardiiɓe ley laamordu.