Amaana mo Laamɗo waɗani Daawda
7
1 Kaananke Daawda jooɗii ley suudu mum laamordu, tawi Laamɗo hokkii mo powtiri e wayɓe fiiliiɓe mo fuu. 2 Kaananke wi'i annabaajo bi'eteeɗo Natan:— Inani kam, miɗo wuuri ley suudu maysiniraandu leɗɗe seddere, de Keesuwal Laamɗo kaa na jooɗii ley hukum.
3 Natan jaabii kaananke, wi'i:
— Yahu, ngaɗaa fuu ko woni e ley ɓernde maaɗa sabo Joomiraaɗo ina wondi e maaɗa.
4 Ammaa jemma oon haala Joomiraaɗo wari to Natan, wi'i:
5 — Yahu, hollu maccuɗo am Daawda, «Inan ko Joomiraaɗo wi'i: Yalla wo aan nyiɓanta kam suudu to njooɗotoomi naa? 6 Wo goonga, mi jooɗaaki ley suudu illa nyannde nde njaarunoomi yimɓe Israa'iila leydi Misira faa warde hannden. Miɗo yuusoo ley hukum laatiiɗo joonnde am. 7 To njaadumi e yimɓe Israa'iila fuu, yalla mi ƴami hooreeɓe ɓe njoƴƴinmi faa laatoo durooɓe yimɓe am, mbi'umi, ‹ko waɗi on nyiɓanaay kam suudu maysiniraandu leɗɗe?› » 8 Jonle, hollu maccuɗo am Daawda, «Inan ko miin Joomiraaɗo Jom Baawɗe fuu wi'i: Miin itti ma durngol cogge, yaari ma faa laatoɗaa hooreejo dow yimɓe am Israa'iila. 9 Miɗo wondi e maa nokku fuu to njahuɗaa. Mi ittii wayɓe ma fuu yeeso maa. Joonin du, mi mawninan innde maaɗa hono inɗe ɓurɓe teddude ley adunaaru. 10 Mi hokkan yimɓe am Israa'iila nokkuure, mi joƴƴina ɓe faa ɓe mbuura ley nokkuure maɓɓe. Ɓe ndiwnataa kulol katin. Bonɓe du tiinnantaa ɓe hono arande, 11 hono wakkati nde njoƴƴinnoomi sarotooɓe (ardiiɓe) dow Israa'iila, yimɓe am ɓeen. Mi hokkete powtiri e wayɓe ma.»
Wo miin Joomiraaɗo nyiɓante suudu. 12 Aan Daawda, wakkati nde balɗe maaɗa timmi, de powtidoyɗaa e baabiraaɓe maa ndeen fu, mi umminan ƴuwɗo e maaɗa, ɓeyngu maa pay, mi tabintina laamu muuɗum. 13 Wo kanko nyiɓanta innde am suudu, de miin du mi tabintinan jooɗorgal laamu makko faa abada. 14 Mi laatoto baabiiko, kanko du o laatoto ɓiyam. Si o woofii fu, mi umminan yimɓe piira mo cabbi faa saroo mo. 15 Ammaa njinngu am koolniingu dillataa to makko abada, hono no ndillinirmi ngu to Sawulu mo ittumi yeeso maaɗa. 16 Ƴuwdi maa e laamu maa keddoto faa abada. Jooɗorgal laamu maaɗa tabintinte faa abada.
17 Natan hollii Daawda ko yi'i e holleede ɗuum fuu e haalaaji ɗiin fuu.
Du'aare Daawda
18 Ndeen Daawda naati jooɗii yeeso Joomiraaɗo, wi'i:
— Laamɗo Joomiraaɗo, Miin wo mi moy? Ɓeye ngoni koreeji am du faa ngadduɗaa kam to ngonumi ɗo? 19 Ammaa kulle ɗe na pamɗi ley gite maaɗa, aan Laamɗo Joomiraaɗo. A haalii dow ƴuwdi am keddotoondi faa ɓooya, miin maccuɗo maaɗa. Laamɗo Joomiraaɗo yalla nii mboowruɗaa waɗirde e tomette naa? 20 Ɗume kaaldammi e maaɗa katin? Sabo aan Laamɗo Joomiraaɗo, aɗa anndi kam, miin maccuɗo maaɗa. 21 Saabe fodoore maa e muuyo maa waɗi ngaɗuɗaa huunde mawnde nde fuu, de kolluɗaa nde maccuɗo maaɗa. 22 Ɗum fuu na holla manngu maaɗa Laamɗo Joomiraaɗo! Yeru maa walaa! Aan tan woni Joomiraaɗo - abada noppi amin nanaay kabaaru goɗɗo hono maaɗa! 23 Lenyol fay gootol walaa ley adunaaru nanndungol e yimɓe maaɗa Israa'iila. Si goonga, lenyol gonngol walaa ngol aan Laamɗo yehi soottiti ƴuwde e maccungaaku, faa laatoo yimɓe maaɗa, faa mawninaa innde maaɗa. A waɗanii hoore maa kulle mawɗe, a waɗii kulle kaayniiɗe du saabe leydi maa. A soottitii ndi e leydi Misira, a riiwii lenyi goɗɗi e tooruuji muɓɓen yeeso yimɓe maaɗa. 24 A jogake yimɓe maaɗa Israa'iila faa ɓe laatoo yimɓe maa faa abada. Aan du Joomiraaɗo, a laatake Laamɗo maɓɓe. 25 Ndelle, Laamɗo Joomiraaɗo, njogoɗaa haala ka kaaluɗaa dow maccuɗo maaɗa e suudu muuɗum kaan, ngaɗaa ko aadiɗaa. 26 Innde maaɗa teddinee faa abada, wi'ee, «Joomiraaɗo wo jom baawɗeeji dow Israa'iila.» Ƴuwdi am miin maccuɗo maaɗa du tabintinee yeeso maaɗa. 27 Joomiraaɗo Jom Baawɗe fuu, Laamɗo Israa'iila, wo aan holli kam miin maccuɗo maaɗa mi nyiɓane suudu. Nii maccuɗo maaɗa heɓiri cuusal waɗude du'aare nde. 28 Joonin le, Laamɗo Joomiraaɗo, aan woni Laamɗo. Haalaaji maa wo goonga. Wooɗi du, a fodanake kam miin maccuɗo maaɗa huunde lobbere nde. 29 Ndelle barkin ƴuwdi maccuɗo maaɗa faa ndi heddodoo e maaɗa. Sabo wo aan Laamɗo Joomiraaɗo haali, de wo saabe barke maaɗa ƴuwdi maccuɗo maaɗa barkinirtee faa abada.