No Daawda waddiri Keesuwal Laamɗo Urusaliima
6
1 Daawda hawrunduri haɓeteeɓe Israa'iila'en suɓaaɓe, worɓe ujunaaje capanɗe tato. 2 O yaadi e worɓe makko ɓeen faa wuro Baale ley leydi Yahuuda faa ɓe adowa Keesuwal Laamɗo. Ingal inndiree innde mawnde, innde Joomiraaɗo Jom Baawɗe fuu, jooɗiiɗo hakkunde keruba'en.a 3 Ɓe mburtini Keesuwal Laamɗo ngaal e ley suudu Abinadaabu wondu dow tilde. Ɓe adiri ngal torkooru heyru, de ɓe ndillidi e maggal.Ɓiɓɓe Abinadaabu oon, kam'en ooncata torkooru nduun. Inɗe maɓɓe, Ussa e Ahiyo. 4 Iɓe njaada e Keesuwal Laamɗo ngaal, Ahiyo du ina ardii. 5 Daawda e yimɓe Israa'iila fuu ina ceyii ina mbama yeeso Joomiraaɗo haddi semmbe muɓɓen. Iɓe njimira e sawtu kolli mawɗi e pamari, e tummbuɗe lenngoy e sii munkariiji leɗɗe sowre.
6 Wooɗi, ɓe ngari to nokkuure ƴarorde nde Nakon jeyi. Wakkati oon fu, ga'i ɗiin pergii, de Ussa foortii junngo muuɗum, nanngi Keesuwal Laamɗo ngaal taa ngal saama. 7 Ndeen tikkere Joomiraaɗo saami dow Ussa. Laamɗo fiyi mo toon, sabo ko o meemi keesuwal ngaal ɗuum wo boofol (woowre). O maayi ɗakkol Keesuwal Laamɗo toon. 8 Daawda ɓerni sabo tikkere Joomiraaɗo halkii Ussa. Nokkuure nde inndiraa Peres-Ussa (ɗum na fiirta «Ussa senndaama e adunaaru»). Inde wi'ee noon faa hannden.
9 Daawda huli Joomiraaɗo nyannde ndeen, wi'i:
— Noy Keesuwal Amaana Joomiraaɗo waawiri warude to am?
10 Daawda jaɓaay hooƴude Keesuwal Joomiraaɗo faa ngal wonda e muuɗum ley ngalluure mum. O yaari ngal to suudu Obed-Edom jeyaaɗo wuro Gat. 11 Keesuwal Joomiraaɗo heddii ley suudu Obed-Edom jeyaaɗo Gat faa waɗi lebbi tati. Joomiraaɗo barkini mo e suudu makko fuu. 12 Ndeen kaananke Daawda humpitaa, «Joomiraaɗo barkinii suudu Obed-Edom e huunde fuu ko o jeyi, saabe Keesuwal Laamɗo.»
Saabe ɗuum Daawda yehi adi Keesuwal Laamɗo to suudu Obed-Edom de yaariri ngal e seyo to ngalluure muuɗum. 13 Nde tiigiiɓe Keesuwal Joomiraaɗo ngaɗunoo caaɓanɗe jeegom fu, o hirsi ngaari e ɓii nagge payɗo. 14 Daawda wami yeeso Joomiraaɗo e semmbe mum fuu, ina ɓornii saaya almaamaaku ndaneeha. 15 Nii Daawda e yimɓe Israa'iila fuu njaariri Keesuwal Joomiraaɗo e peekaali seyo e sawtu luwal.
16 Wakkati Keesuwal Joomiraaɗo naatannoo ngalluure Daawda ndeen, Mikal ɓii Sawulu debbo ina yuurnoroo feneetere. Nde o yi'unoo kaananke Daawda na fitta na wama yeeso Joomiraaɗo ndeen, o yawi ɗum e ley ɓernde makko.
17 Ɓe ngaddi Keesuwal Joomiraaɗo de ɓe njoƴƴini ngal to lunnde maggal faa hakkunde hukum mo Daawda nyiɓani ngal. Daawda hirsani Joomiraaɗo kirsamaaji buleteeɗi e jeɗeteeɗi. 18 Caggal ko Daawda selnoo hirsude kirsamaaji buleteeɗi e jeɗeteeɗi ndeen, o barkini yimɓe e ley innde Joomiraaɗo Jom Baawɗe fuu. 19 Wakkati oon, kawrital Israa'iila'en heewɓe na tawaa ɗoon. Daawda hokki jamaa oon fuu nyaamdu. Gorko e debbo, mono fuu heɓii buuruure wootere e tamre tamarooje yoornde e tamre cabiije yoornde. De yimɓe ɓeen fuu kooti.
20 Daawda du yeccii faa barkina wuro mum. Mikal ɓii Sawulu oon wurtii faa jaɓɓitoo mo de wi'i:
— Haa! Hannden kaananke Israa'iila teddinii hoore mum! Ina ɓortii kaddule mum yeeso horɓe gollooɓe mum hono neɗɗo kuyfuɗo!
21 Daawda jaabii mo, wi'i:
— Wo saabe Joomiraaɗo de ceyiimi. Kam suɓii kam dow bammaa e dow suudu bammaa fuu. Kam joƴƴini kam mi laatoo hooreejo yimɓe mum Israa'iila. Ndelle mi weltoto yeeso Joomiraaɗo. 22 Mi ɓeydan huyfere am du faa mi huyfina hoore am. Ammaa horɓe ɓe mbiiɗaa ɓeen, ɓe teddinan kam.
23 Mikal ɓii Sawulu heɓaay ɓiɗɗo faa maayi.