No Daawda laatorii kaananke dow Israa'iila fuu
5
1 Ƴuwdiiji ley Israa'iila fuu ngari to Daawda ley wuro Heberon, ɓe mbi'i mo:— Inani min, wo min ƴiiƴam e enɗam ngootam e maaɗa. 2 Arande nde Sawulu laaminoo min ndeen, wo aan ardotoo Israa'iila ley jahaale e garte wolde fuu. Katin du, Joomiraaɗo wi'ii ma, aan durata yimɓe muuɗum Israa'iila, laatoɗaa hooreejo maɓɓe.
3 Ndelle mawɓe Israa'iila ngari to Daawda ley Heberon, de Daawda waɗi amaana e maɓɓe ley Heberon yeeso Joomiraaɗo. Ndeen ɓe njoori nebbam e hoore Daawda faa o laatoo kaananke dow Israa'iila. 4 Daawda ina wondi e duuɓi capanɗe tati nde o laamotonoo. O laamii duuɓi capanɗe nay. 5 O laamii duuɓi jeɗɗi e lebbi jeegom dow Yahuuda'en ley Heberon. Ndeen, ley Urusaliima du, o laamii duuɓi capanɗe tati e tati dow Israa'iila'en e Yahuuda'en fuu.
No Daawda teetiri ngalluure Urusaliima
6 (Caggal Daawda waɗaama kaananke dow Israa'iila,) yaadi e sordaasiiɓe mum to Urusaliima faa kaɓa e Yebusi'en jooɗiiɓe toon. Yebusi'en ɓeen ina miilii Daawda waawaa nanngude ngalluure ndeen. Ɓe mbi'i Daawda:
— On mbaawaa naatude ga. Fay wumɓe e bonnguuɓe na mbaawi riiwude on.
7 Ammaa e noon fu, Daawda naati, nanngi ngalluure reenoore nde naatataako ndeen. Inde wi'ee Siyona, maa ngalluure Daawda. (Inani no Daawda nanngiri nde.)
8 Nyannde ndeen Daawda wi'i:
— Jiɗɗo jaalaade Yebusi'en fu, sanaa rewa ciwtorgol basaangol ley waamnde saabe ndiyam. Noon o heɓan naatude to wumɓe e bonnguuɓe, wayɓe kam ɓeen.
Saabe ko o wi'i noon ɗuum waɗi de na wi'ee, «Wumɓe e bonnguuɓe mbaawaa naatude suudu Joomiraaɗo.»
9 Nii Daawda jooɗorii ley ngalluure reenaande ndeen, de inndiri nde Ngalluure Daawda. O ɓeydi nyimngo fiiliingo nde illa tiigorɗe kokuwol yaasiije faa e ley maggol.a 10 Daawda na ɓeyda semmbe wakkati fuu sabo Joomiraaɗo, Laamɗo jom baawɗeeji ina wondi e muuɗum.
11 Wooɗi, Hiram kaananke ngalluure Tirus nuli nulaaɓe to Daawda, nuldi ɗum leɗɗe ɗe semmbe bi'eteeɗe seddere, e sehooɓe leɗɗe e sehooɓe kaaƴe. Ɓe nyiɓani mo laamordu kaananke. 12 Nii Daawda faamiri Joomiraaɗo joƴƴinii ɗum laatoo kaananke dow Israa'iila. O faami du Joomiraaɗo mawnini laamu makko saabe yimɓe muuɗum Israa'iila.
13 Caggal nde Daawda dillunoo Heberon de wari Urusaliima ndeen, ɓeydi nattaaɓe e rewɓe muuɗum, de rimi ɓiɓɓe worɓe e ɓiɓɓe rewɓe. 14 Inan inɗe sukaaɓe ɓe o rimi toon: Sammuwa, Sobap, Natan, Suleymaanu, 15 Ibhar, Elisuwa, Nefek, Yafiya, 16 Elisama, Eliyada e Elifelet.
No Daawda jaalorii Filistiyankooɓe
17 Nde Filistiyankooɓe nannoo hoore Daawda jooraama nebbam faa laatoo kaananke Israa'iila ndeen, sordaasiiɓe maɓɓe fuu njehi faa ɓe piloo mo, ɓe nannga mo. Daawda nani ɗum de naati nokkuure reenoore. 18 Tawi Filistiyankooɓe ngarii de cankitii ley Naɗɗol Refayim. 19 Ndelle Daawda ƴami Joomiraaɗo, wi'i:
— Yalla mi yaha mi haɓa e Filistiyankooɓe naa? Yalla a wattan ɓe e ley juuɗe am naa?
Joomiraaɗo jaabii, wi'i:
— Yahu. Tennyora, mi wattan ɓe e ley juuɗe maaɗa.
20 Daawda wari to nokkuure Ba'al-Perasim de jaalii ɓe toon. O wi'i:
— Joomiraaɗo seekii wayɓe kam hono no ilam seekirta leydi.
Ɗum waɗi de nokku oon na wi'ee «Ba'al-Perasim». Ɗum na fiirta «Jom Ceeki». 21 Filistiyankooɓe ɓeen ndoggi, njoppi tooruuji muɓɓen, de Daawda e worɓe mum ngari adi ɗi.
22 Wooɗi, caggal ɗuum Filistiyankooɓe ngarti, de cankitii katin ley Naɗɗol Refayim. 23 Daawda ƴami Joomiraaɗo dow maɓɓe katin, de Joomiraaɗo wi'i:
— Taa kuccitaa e maɓɓe, ammaa ƴuuraa caggal maɓɓe de kawraa e maɓɓe yaasin cukkuri leɗɗe toon. 24 De wakkati nanuɗaa duko hono caaɓanɗe koyɗe dow ceɓoy leɓoy leɗɗe fu, karoɗaa. Sabo duko koon hollete Joomiraaɗo yehii yeeso maaɗa faa fiya sordaasiiɓe Filistiyankooɓe.
25 Daawda waɗi ko Joomiraaɗo yamiri ɗum. Kanko e sordaasiiɓe makko piyi Filistiyankooɓe ɓeen illa Geba faa yehi Geser.