<<    <     2 Samuwiila     4     >    >> 
Wareede Isboset
4
1 Nde Isboset ɓii Sawulu nanunoo Abineer maayii ley Heberon ndeen, cuusal mum dilli. Israa'iila'en fuu kuli. 2 Tawi Isboset oon na joginoo worɓe ɗiɗo hooreeɓe kawrite honooɓe. Innde gooto wo Baana, innde oye oon du wo Rekap. Wo ɓe ɓiɓɓe Rimmon, Benyaminkeejo, jeyaaɗo wuro Beerot. Beerot ina limee hakkunde gure Benyamin. 3 Jooɗinooɓe Beerot ndoggii faa njottii Gitayim, iɓe njooɗii ɗoon faa hannden.
4 Tawi Yonatan ɓii Sawulu ina woodi ɓiɗɗo gorko. Innde makko wo Mefiboset. Nde kabaaru Sawulu e Yonatan ƴuurnoo Yesre'el ndeen, o waɗii duuɓi joy. Wakkati oon debbo ndaaranoowo mo hooƴi mo de doggi. Ammaa nde o doggannoo ndeen, suka oon saami, heli, laatii bonnguujo.
5 Joonin Rekap e Baana, ɓiɓɓe Rimmon jeyaaɗo Beerot oon, njehii to suudu Isboset, njottii to makko hakkunde naange, wakkati mo o fukkotoo, o fowta. 6-7 Ɓe naati faa hakkunde suudu hono wo bootooji alkama ɓe pilotoo.a Ɓe naati to suudu makko fukkordu, ɓe tawi imo fukkii dow leeso. Ɓe njuwi reedu makko. Noon ɓe piiri mo faa o maayi. Ɓe taƴi hoore makko de ɓe kooƴi nde. Ɓe ndilli, ɓe ndewi naɗɗol Urdun, ɓe mbaali yaade.
8 Ɓe njaari hoore Isboset to kaananke Daawda ley wuro Heberon, de ɓe mbi'i mo:
— Joomii amin, inan hoore Isboset ɓii ganyo ma Sawulu, piliiɗo ittude yonki maa. Hannden Joomiraaɗo yomnitanake ma dow Sawulu e ƴuwdi muuɗum.
9 Daawda jaabii Rekap e Baana, ɓiɓɓe Rimmon jeyaaɗo Beerot oon, wi'i ɓe:
— Mi hunorake Joomiraaɗo buurɗo, dannoowo kam e ley baasiiji fuu oon, mi haalanan on goonga: 10 wakkati mo Sawulu maaynoo oon, gorko gomma wari, holli kam kabaaru oon. Imo miilii o waddanii kam kabaaru lobbo, ammaa mi yamirii o nanngee, o waree wuro Sikilak. Nii njoɓirmi mo dow kabaaru makko lobbo! 11 Sakko bonɓe waruɓe neɗɗo ponnditiiɗo ley suudu muuɗum e dow leesom! Wanaa miɗo jeyi yomnitaade ƴiiƴam muuɗum e juuɗe mooɗon de mi halka on e adunaaru naa?
12 Ndelle Daawda yamiri jokolɓe mum mbara ɓe. Jokolɓe ɓeen taƴi newe juuɗe maɓɓe e njaaɓirdi koyɗe maɓɓe de ɓili ɓe ɗakkol weendu Heberon. Ɓe kooƴi hoore Isboset du, de ɓe uwi nde ley saabeere Abineer ley Heberon.