Wolde hakkunde Daawda e Amoninkooɓe
— Mi hollan Hanun ɓii Nahas hinney, hono no bammum hollirnoo kam hinney.
Ndelle Daawda nuli maccuɓe mum faa ɓe mbaaltina ɓernde makko e dow maayde baabiiko. Nde maccuɓe Daawda ɓeen njottinoo leydi Amon ndeen, 3 hooreeɓe Amon mbi'i Hanun kaananke muɓɓen:
— Yalla aɗa miiloo Daawda nuldi ma yurmotooɓe faa teddina bammaa naa? Yalla a faamaay Daawda nulii maccuɓe mum to maa faa kora, ndaara ngalluure nde naa? Ndeen o waran, o hipporoo ngalluure men wolde!
4 Ndelle Hanun nanngi maccuɓe Daawda, femmbi waare mono fuu senngo wooto de taƴi kaddule maɓɓe hakkunde faa ɓe cuurtii. De sakitii o yecci ɓe.
5 Nde Daawda humpitanoo ɗum ndeen, nuli nulaaɓe faa njaɓɓitoo worɓe ɓeen, sabo wo ɓe semtinaaɓe sanne. Kaananke Daawda wi'i ɓe njooɗoo ley wuro Yeriko tafon faa bahe maɓɓe ɓilita (puɗita), ndeen ɓe ngarta Urusaliima. 6 Nde Amoninkooɓe ɓeen paamunoo laatake ko nyiddini to Daawda ndeen, ɓe ŋaarii ballal sordaasiiɓe ujunaaje noogayo jeyaaɓe wuro Beti-Rehoob e wuro Soba ley leydi Siiriya, ɓe njoɓi ɗum'en. Ɓe ŋaarii ballal sordaasiiɓe ujunere to kaananke Maaka du e worɓe ujunaaje sappo e ɗiɗo wuro Top. 7 Nde Daawda nannoo ɗum ndeen nuli Yo'ap e sordaasiiɓe Israa'iila waawɓe wolde fuu faa kaɓda e maɓɓe. 8 Sordaasiiɓe leydi Amon ɓeen du ngari de cekunduri ori muɓɓen to dammbugal ngalluure faa kaɓa. Ndeen du, Siiriyankooɓe jeyaaɓe Soba e Rehoob e worɓe Top e Maaka na ngoni sera njaayri.
9 Yo'ap ndaari ori wayɓe muɓɓen gonɗi yeeso mum e gonɗi gaɗa mum ɗiin fuu. O suɓii worɓe ɓurɓe waawude wolde hakkunde Israa'iila'en, de o ardii ɓe faa ɓe kaɓda e Siiriyankooɓe. 10 Katin du, o halfini sordaasiiɓe heddiiɓe ɓeen sakiike makko Abisay. Ɓeen du ngaɗi orol yeeso Amoninkooɓe. 11 Ndeen o wi'i Abisay:
— Si Siiriyankooɓe ɓurii kam semmbe fu, mballon kam. Wooɗi si Amoninkooɓe ɓurii on semmbe du, mi waran mi walla on. 12 Cemmbiɗon, laatoɗon suusuɓe faa ndannen yimɓe meeɗen e galluuje Laamɗo men. Joomiraaɗo waɗa ko weli ɗum.
13 Ndeen Yo'ap e sordaasiiɓe wonduɓe e mum njehi yeeso faa kaɓa e Siiriyankooɓe, ammaa ɓeen ndoggi ɓe. 14 Wakkati Amoninkooɓe ɓeen nji'unoo Siiriyankooɓe na ndogga ndeen, kamɓe du ndoggi Abisay, ɓe naatowi ngalluure maɓɓe. Saabe ɗuum, Yo'ap yeccii haɓo e Amoninkooɓe, de warti Urusaliima.
15 Ammaa nde Siiriyankooɓe njiinoo Israa'iila'en njaalake ɗum'en ndeen, kawriti kawrital gootal. 16 Hadadeser wo kaananke maɓɓe. Kanko nuli waddanee Siiriyankooɓe wonɓe gere oo to maayo Efaratis. Ɓe ngari wuro Helam, hooreejo sordaasiiɓe Hadadeser bi'eteeɗo Sobak na ardii ɓe.
17 Daawda humpitaa ɗum de hawrunduri Israa'iila'en fuu. Ɓe peƴƴiti maayo Urdun de ɓe ngari Helam. Siiriyankooɓe ndarni ori muɓɓen yeeso Daawda de kaɓdi e muuɗum. 18 Ammaa Siiriyankooɓe ɓeen ndoggi Israa'iila'en katin. Daawda wari Siiriyankooɓe dorbotooɓe torkooji pucci keme njeɗɗo, e waɗɗiiɓe pucci ujunaaje capanɗe nayo. Daawda barmini Sobak hooreejo sordaasiiɓe maɓɓe oon du faa maayi toon. 19 Wakkati kaanankooɓe ɗowtaniiɓe Hadadeser ɓeen njiinoo Israa'iila'en njaalake ɗum'en ndeen, ɓe ndewriti e muɓɓen, ɓe laatii maccuɓe muɓɓen.
Caggal ɗuum, Siiriyankooɓe cuusaay wallude Amoninkooɓe katin.