No Daawda acciri yonki Sawulu
24
1 Daawda dilli toon, jooɗowii ley lohi deenooji gonɗi En-Gedi. 2 Caggal nde Sawulu yeccinoo e riiwugol Filistiyankooɓe ndeen, humpitaama, wi'aa:— Hettina, Daawda na woni ley ladde En-Gedi. 3 Ndelle Sawulu suɓii worɓe ujunaaje tato ley leydi Israa'iila fuu, de njehi filowaade Daawda e worɓe mum faro tefaaje be'i ladde.
4 O wari to koowle baali gonɗe ɗakkol laawol. Na woodi lohol ley hayre toon. Sawulu naati faa yalta koyɗe seeɗa. Tawi Daawda e worɓe mum na ngoni faa gaɗa ley lohol ngool. 5 Worɓe Daawda mbi'i ɗum:
— Inan hannden woni nde Joomiraaɗo wi'unoo ma wattan ganyo ma e ley juuɗe maa faa ngaɗaa mo ko kaajaɗaa.
Ndeen Daawda ummii na nyuɗoo faa yottii Sawulu, de taƴi hoore kommbol saaya makko. 6 Caggal ɗuum, ɓernde Daawda felitii sabo ko o taƴi hoore kommbol saaya Sawulu ɗuum. 7 O wi'i worɓe makko:
— Joomiraaɗo haɗam waɗude joomam cuɓaaɗo Joomiraaɗo hono ɗum! Taa mi foorta junngo am dow makko, sabo wo o cuɓaaɗo Joomiraaɗo.
8 Ndelle haalaaji ɗiin Daawda sappiranii worɓe mum, haɗi ɓe ummanaade Sawulu. Sawulu du ummii wurtii lohol ngool de nanngi laawol muuɗum.
9 Ndeen Daawda du wurtii lohol ngool, feekii noddi Sawulu, wi'i:
— Joomam kaananke!
— Ko waɗi aɗa hettindoo ko yimɓe mbi'ete, iɓe mbi'a, «Ndaar, Daawda na filoo nawnude ma»? 11 Ndaar, hannden nii njiiruɗaa e gite maaɗa no Joomiraaɗo wattiri ma e ley juuɗe am ley lohol. Woɓɓe mbi'i kam mi ware, de mi yurmake ma. Mi wi'ii, «Taa mi foorta junngo am e dow joomam, sabo wo o cuɓaaɗo Joomiraaɗo.» 12 Ndaar! Baabam, ndaar tayre saaya maaɗa ley junngo am. Mi taƴii hoore kommbol saaya maaɗa de mi waraay ma. Faamu ndelle faa annditaa bonanda naa muurtere fuu walaa e am. Ammaa e ɗum fuu, aɗa riiwa kam faa mbaraa kam. 13 Joomiraaɗo saro hakkunde am e maaɗa. Joomiraaɗo yomnito baasiiji ɗi ngaɗuɗaa kam, ammaa junngo am meemataa ma. 14 Hono ko banndol kiinngol wi'i, «E bonɓe bonanda wurtoytoo». De junngo am kaa meemataa ma.
15 Moy kaananke Israa'iila wurtii faa riiwa? Moy ndiiwataa? Miin mo ɓuraa rawaandu waatundu naa? Miin kootu naa? 16 Joomiraaɗo laato carotooɗo de yomnitoo hakkunde meeɗen. Joomiraaɗo ndaara ɗum, de laamna kam, danna kam e junngo maaɗa.
17 Nde Daawda selnoo haalude ndeen, Sawulu ƴami, wi'i:
— Yalla ɗum wo daande maaɗa, aan ɓiyam Daawda naa?
— Aan ɓuri kam laaɓude. A waɗii kam ko wooɗi, de miin kaa mi waɗii ma ko boni. 19 Naanen a hollii kam no ngaɗiranɗaa kam ko wooɗi, sabo Joomiraaɗo wattii kam e ley juuɗe maaɗa de a waraay kam. 20 Si neɗɗo heɓii ganyom yalla accan ɗum hisa naa? Ndelle Joomiraaɗo yoɓe dow ko ngaɗanɗaa kam hannden. 21 Joonin miɗo anndi a laatoto kaananke sikke walaa, laamu Israa'iila du tabita e ley juuɗe maaɗa. 22 Jonle hunanam e ley innde Joomiraaɗo a halkataa ƴuwdi am caggal am, a tosataa innde am e ley suudu baabam. 23 Daawda hunanii Sawulu. Ndeen Sawulu hooti wuro mum, Daawda e worɓe mum du ƴeeŋi to lohol deenowol.