Daawda e Nabal e Abigayil
25
1 Samuwiila maayi. Yimɓe Israa'iila fuu kawriti mboyi mo, de ɓe uwi mo to wuro makko wonngo Rama.Ndeen Daawda ummii yehi ladde yeewniinde wi'eteende Paran. 2 Ina woodi gorko jeyaaɗo wuro Ma'on, jawdi makko du na woni wuro Karmel. Wo o danyuɗo sanne. Imo jogii baali ujunaaje tati e be'i ujunere. Wakkati oon imo woni wuro Karmel saabe taƴugol leeɓi baali makko. 3 Innde makko wo Nabal, deekiiko du na wi'ee Abigayil. Wo o debbo caruɗo jom ŋari, ammaa goriiko wo jom ɓernde yoornde, wo bonɗo. Ƴuwdi makko wo lenyol Kalibu.
4 Nde Daawda wonnoo ley ladde ndeen nanii Nabal na taƴa leeɓi baali muuɗum. 5 Ndelle Daawda neli jokolɓe sappo wi'i ɓe:
— Njehee wuro Karmel to Nabal, calminee mo e ley innde am, 6 mbi'ee mo, «Jam wondu e maaɗa, jam wondu e wuro maa, jam wondu e ko njogiɗaa fuu! 7 Joonin mi nanii aɗa wondi e taƴooɓe leeɓi baali maa. Nde durooɓe maaɗa ngondunoo e amin ndeen, min ngaɗaay ɓe ko boni, wakkati fuu iɓe ngoni to wuro Karmel fay huunde maɓɓe lallaay. 8 Ƴamaa maccuɓe maaɗa, ɓe laaɓinante. Ndelle accaa jokolɓe am keɓa yardaa-muye e maaɗa, sabo ɓe ngarii nyannde juulɗe. Miɗo ŋaare, kokkoraa maccuɓe ɓe e miin ɓiya Daawda ko mbaawuɗaa.»
9 Nde worɓe Daawda njottinoo ndeen, ɓe kumpiti Nabal kabaaru oon fuu ley innde Daawda. De ɓe munyi. 10 Nabal jaabii maccuɓe Daawda, wi'i:
— Moy woni Daawda? Moy woni ɓii Yesa? Hannden na woodi maccuɓe heewɓe na teetoo e joomiiɓe. 11 Yalla mi hooƴan buuru am e ndiyam am e ko kirsanmi taƴooɓe ɗuum, mi hokka worɓe ƴuuruɓe to mi anndaa naa? 12 Jokolɓe Daawda tottitii njeccii, kaalani Daawda ko Nabal wi'i fuu. 13 Daawda wi'i worɓe mum:
— Mono fuu sorna kaafaahi mum.
Ɓe fuu ɓe corni kaafaaje maɓɓe. Daawda du sorni kaafaahi mum. Ndeen worɓe hono keme nayo njehi njokki Daawda. Keme ɗiɗo du keddodii e gineeji.
14 Ammaa tawi gooto hakkunde maccuɓe Nabal ɓeen hollii Abigayil, dee Nabal, wi'i:
— Daawda nuli nulaaɓe ƴuuruɓe ladde faa calmina joomii amin, de o yenni ɓe. 15 Ammaa worɓe ɓeen ngaɗaniino min ko wooɗi. Min keɓaay fuu baasi, min lallinaay fay huunde wakkati min ngondunoo e maɓɓe ley ladde durdude. 16 Iɓe laatanii min hono kokuwol, jemma e nyalooma fuu, wakkati fuu miɗen ngondi e maɓɓe miɗen ndura dammuuli amin. 17 Joonin le, faamu ko njeyuɗaa waɗude, sabo bonanda na anniyaa dow joomii men e dow suudu mum fuu. Kanko kaa, wo o kuyfuɗo, neɗɗo fuu waawaa haaldude e makko.
18 Ndeen Abigayil harii hooƴi buuruuje keme ɗiɗi, e sumalleeji cabijam ɗiɗi, e baali kuttaaɗi joy, e siwooji gawri nduppaandi joy, e tame cabiije joorɗe hemre, e tame ƴibbe joorɗe keme ɗiɗi. O rimndi ɗum fuu dow araaji. 19 Ndeen o wi'i maccuɓe makko:
— Ardee njehee, faa mi jokka on.
Ammaa o hollaay goriiko Nabal oon.
20 Ndeen o waɗɗii araawa ngaan, imo yaha. Wakkati nde o regotonoo ceekol waamnde ndeen, inan Daawda e worɓe mum na ngara kam'en du, faa ɓadii mo. O hawri e maɓɓe. 21 Tawi Daawda na wi'annoo, «Si goonga mi doomaniino gorko oon kulle muuɗum ley ladde ɓolum. Wooɗi fay huunde muuɗum lallaay, de o barjitii kam ko boni dow mbooɗirka am. 22 Si mi heddii fay gorko gooto hakkunde ko o jogii fuu, Laamɗo jukkoram torra mawɗo!»
23 Nde Abigayil yiinoo Daawda ndeen, o harii o jippii dow araawa de o sujidi e leydi yeeso Daawda. 24 O leeƴinii faa to koyɗe Daawda de o wi'i:
— Joomam, accu feloore nde saama dow am, miin tan. Miɗo ŋaare, accu korɗo maaɗa haalda e maaɗa. Hettina haala korɗo maaɗa. 25 Joomam, taa taykoɗaa Nabal kuyfuɗo oon. Kanko, o nootake innde makko - sabo maanaa innde makko wo puuyɗo, puuyndam du na yaada e makko. Miin korɗo maaɗa kaa, mi yi'aay jokolɓe ɓe aan joomam nelɗaa ɓeen. 26 Wo Joomiraaɗo haɗi ma rufude ƴiiƴam, haɗi ma yomnitoraade e junngo maaɗa. Joomam, mi hunorake Joomiraaɗo buurɗo, mi hunorake nguurndam maa du, wayɓe ma e yiɗuɓe nawnude ma ɓeen laatoto hono Nabal. 27 Joomam, accu dokkal ngal korɗo maaɗa waddani maa ngaal hokkee jokkuɓe ma ɓeen. 28 Miɗo ŋaare, njaafoɗaa woowre korɗo maaɗa, sabo sikke walaa Joomiraaɗo tabintinan suudu bammaa. Aɗa haɓa bolwole Joomiraaɗo, ammaa a waɗataa fuu ko boni haddi nguurndam maaɗa fuu. 29 Joomam, si worɓe ummake faa ndiiwa nguurndam maaɗa, Joomiraaɗo Laamɗo maaɗa reenan ɗam ley saawdu wuurɓe. Ammaa o faɗɗiran nguurey wayɓe ma e ley nguru piwlola. 30 Nde Joomiraaɗo waɗani ma ko wooɗi ko fodii waɗande ma ɗuum, de joƴƴini ma laatoɗaa hooreejo dow Israa'iila fu, 31 a mimsitataa dow ko ngaɗuɗaa hannden. Ɓernde maa du felataa ma sabo a rufaay ƴiiƴam ɓolum. A yomnitanaaki hoore maaɗa du. Nde Joomiraaɗo barkini ma aan joomam fu, miccitoɗaa kam miin korɗo maaɗa.
32 Daawda wi'i Abigayil:
— Jettooje ngoodanii Joomiraaɗo Laamɗo Israa'iila, nelɗo ma hannden faa kawraa e am. 33 Barke woodanii ma saabe hakkillo maa lobbo, barke woodanii ma du sabo ko kaɗuɗaa kam rufude ƴiiƴam e yomnitoranaade hoore am e juuɗe am. 34 Mi sennii Joomiraaɗo Laamɗo Israa'iila buurɗo, kaɗuɗo kam nawnude ma, si a waraayno law faa njaɓɓiɗaa kam, sikke fuu walaa fay neɗɗo gooto e worɓe Nabal heddataakeno ɗo yaade jaango fajiri.
35 Ndeen Daawda jaɓi e junngo makko ko o waddunoo ɗuum de wi'i:
— Hootu e jam. Paamaa, mi nanii ko mbiiɗaa, mi hokkete ko ŋaariɗaa.
36 Nde Abigayil wartunoo to Nabal ndeen, tawi Nabal na weltoo ley suudum hono no kaananke. Ɓernde makko na seyii, wo o culiiɗo sanne. Debbo oon hollaay mo fay huunde faa weeti. 37 Nde weetunoo fu, tawi Nabal du hakkillom wartii. Deekum holli ɗum kulle ɗeen fuu. Ndeen ɓanndu muuɗum fuu waati, o laatii hono hayre. 38 Caggal ɗuum hono balɗe sappo, Joomiraaɗo fiyi Nabal, de maayi.
39 Nde Daawda nannoo Nabal maayii ndeen, wi'i:
— Jettooje ngoodanii Joomiraaɗo. O laaɓinii kam, o hiitake Nabal cemtinɗo kam oon. O haɗi kam waɗude ko boni, miin maccuɗo makko. O wartiri bonnde Nabal dow hoore muuɗum.
Ndeen Daawda nuli e Abigayil na ƴama ɗum faa laatoo deekum. 40 Maccuɓe Daawda njehi wuro Karmel mbi'i Abigayil:
— Daawda nuli min to maaɗa faa min kooƴe laatoɗaa deekum.
41 O sujidi, o wi'i:
— Inani kam, miin korɗo cegilaniiɗo lootude koyɗe maccuɓe joomam.
42 Abigayil harii law waɗɗii araawa, de kam e horɓe muuɗum njoyo njaadi e nulaaɓe Daawda, de o laatii deekum.