No Daawda hisiniri wuro Keyila
23
1 Woɓɓe kumpitii Daawda mbi'i:— Hettinda, Filistiyankooɓe na kaɓa e wuro Keyila de iɓe kona nyaamri to nokkuuje ƴarorɗe. 2 Daawda ŋaarii Joomiraaɗo, wi'i:
— Yalla mi yahan mi haɓa e Filistiyankooɓe ɓeen naa?
De Joomiraaɗo wi'i Daawda:
— Yahu haɓu faa kisinaa Keyila.
3 Worɓe Daawda kaa mbi'i mo:
— Ley Yahuuda ɗo miɗen kula, sakko wuro Keyila to ori sordaasiiɓe Filistiyankooɓe ngoni!
4 Ndelle Daawda ŋaarii Joomiraaɗo katin, de Joomiraaɗo jaabii mo wi'i:
— Umma jippaa, naata Keyila sabo mi wattan Filistiyankooɓe ɓeen e ley juuɗe maaɗa. 5 Ndeen Daawda e worɓe mum njehi wuro Keyila, kaɓi e Filistiyankooɓe, de teeti na'i maɓɓe. Ɓe keɓi jaalagol manngol dow Filistiyankooɓe. Nii Daawda hisiniri yimɓe wuro Keyila. 6 Tawi Abiyatar ɓii Ahimelek yaadiinoo e kaddungal almaamaaku wakkati mo doggunoo Sawulu faa yaha to Daawda wuro Keyila.
No Sawulu filorii nanngude Daawda
7 Sawulu humpitaa Daawda yehii Keyila, de wi'i:
— Laamɗo wattii Daawda ley juuɗe am, sabo o ommbii hoore makko ley ngalluure woodunde dammbuɗe e cokooɗe. 8 Ndelle Sawulu noddi yimɓe fuu wolde, ɓe njippoo to wuro Keyila, ɓe ɓilla Daawda e worɓe mum ley toon.
9 Daawda na anndi Sawulu na iimanoo ɗum bonanda. De o wi'i Abiyatar almaami oon:
— Joomiraaɗo Laamɗo Israa'iila, miin maccuɗo maaɗa mi nanii Sawulu na filoo naatude wuro Keyila de halka wuro ngo saabe am. 11 Yalla yimɓe Keyila ngattan kam e ley juuɗe makko naa? Yalla Sawulu jippoto ga hono no miin maccuɗo maaɗa nanirnoomi naa? Joomiraaɗo Laamɗo Israa'iila, miɗo ŋaare, kollaa maccuɗo maaɗa.
De Joomiraaɗo wi'i:
— O jippoto.
12 Ndeen Daawda wi'i:
— Yalla yimɓe Keyila ngattan kam e ley juuɗe Sawulu naa?
De Joomiraaɗo wi'i:
— Ɓe ngattete.
13 Ndelle Daawda e worɓe muuɗum, hono keme njeegomo, ummii dilli Keyila de njehi to mbaawi yahude fu. Nde Sawulu humpitanoo Daawda dilli Keyila ndeen, o acciti jahaangal ngaal. 14 Daawda heddake ley lohi deenooji, ley ladde yeewniinde to baamle Sif. Sawulu du na filoo mo wakkati oon, de Laamɗo wattaay Daawda e ley juuɗe makko.
15 Nde Daawda wonnoo Hores ley ladde Sif ndeen, faamii Sawulu wurtake faa wara ɗum. 16 Ndeen Yonatan ɓii Sawulu ummii yehi Hores to Daawda, faa walla ɗum heɓa semmbe to Laamɗo. 17 Yonatan wi'i:
— Taa hulu. Junngo baabam Sawulu yottataako ma. Wo aan laamotoo Israa'iila, miin du mi laatoo ɗiɗaɓo. Fay baabam Sawulu du na faami ɗum.
18 Ɓe ɗiɗo fuu ɓe ngaɗi amaana yeeso Joomiraaɗo. Daawda heddii Hores, Yonatan du hooti.
19 Yimɓe Sif njehii to Sawulu wonnoo wuro Gibeya, mbi'i:
— Daawda na suuɗii hakkunde amin. Imo woni ley lohi deenooji Hores to waamnde Hakila wonunde hoorɗoore ladde Yesimon. 20 Miɗen ŋaare kaananke, nde kaajeɗaa fu, njippoɗaa ngaraa. Minen du min ngattan mo e ley juuɗe maaɗa.
21 Sawulu jaabii, wi'i:
— Joomiraaɗo barkin on, onon yurmotooɓe kam. 22 Njehee, tennyoree faa laaɓa. Njiitowee nokkuure to o suuɗii toon, paamon yi'uɓe mo ɓeen du. Woɓɓe mbi'i kam wo o jom ƴoyre sanne. 23 Taykoɗon faa paamon nokkuuje to o suuɗotoo fuu. Sakitoo ngartidon to am e tennyoral, de mi yaada e mooɗon. Si imo woni ley leydi ndi fu, mi filoto mo hakkunde saare Yahuuda fuu faa mi yiita mo.
24 Ndeen ɓe ummii, ɓe kooti wuro maɓɓe Sif. Sakitii Sawulu du jokkitii ɓe.
Tawi Daawda e worɓe mum na ngoni ley ladde wi'eteende Ma'on ley leydi Araba hoorɗoore Yesimon. 25 Sawulu e worɓe mum njehi filowaade mo. Daawda humpitaa ɗum. Ndelle o yehi faa to tefaare wonnde ley ladde Ma'on, o jooɗii toon. Nde Sawulu nannoo ɗum ndeen, kam du naati ladde Ma'on faa riiwa mo.
26 Sawulu heedi gere ooga waamnde, Daawda e worɓe mum du keedi gere ooto waamnde nde, iɓe karoo faa ɓe kisa Sawulu. Sawulu e worɓe mum du na ɓattoo Daawda faa ɓadii kurwitinde dow maɓɓe, nannga ɓe. 27 Wakkati oon, nulaaɗo wari e Sawulu wi'i:
— Waru law! Filistiyankooɓe ngaɗii konu dow leydi.
28 Ndelle Sawulu acci riiwugol Daawda de yehi faa haɓowa e Filistiyankooɓe. Ɗum waɗi ɓe inndirii tefaare nde «Tefaare Kisey».