Jahaangal Daawda to Adulam e Mispa
22
1 Daawda dilli Gaat yehi suuɗii to lohol gonngol Adulam. Nde sakiraaɓe makko e suudu baabaaɓe makko nannoo ɗum ndeen, ɓe njippii, ɓe ngari to makko ɗoon. 2 Hono nii du ɓilliiɓe e reweteeɓe nyamaale e haaɗa-ɓerɗe'en fuu kawriti to makko de o laatii hooreejo maɓɓe. Worɓe hono keme nayo ina ngondunoo e makko.3 Daawda dilli toon yehi wuro Mispa ley leydi Mo'ab. O haaldi e kaananke Mo'ab, o wi'i:
— Miɗo nyaage, accaa baaba am e inna am ngara njooɗodoo e maaɗa faa mi faama ko Laamɗo waɗanta kam.
4 Ndelle o yoppidi ɓe e kaananke Mo'ab, ɓe njooɗii toon. Ɓe ngoni toon faa haddi ko Daawda waɗi to lohol muuɗum deenowol.
5 Annabaajo bi'eteeɗo Gad wi'i Daawda:
— Taa suuɗa ley lohol ngool. Yahu leydi Yahuuda.
Ndelle Daawda dilli yehi cukkuri mbi'eteendi Heret.
No Sawulu wardi almaami'en wuro Nobi
6 Sawulu nanii Daawda e worɓe muuɗum paamanaama. Wakkati oon Sawulu na jooɗii ley lekki njammi dow waamnde wuro Gibeya, na tiigii labbo mum. Howruuɓe muuɗum na ndarii ɗakkol muuɗum. 7 Sawulu wi'i ɓe:
— Worɓe ƴuwdi Benyamin, kettindanee kam. Yalla ɓii Yesa oon hokkan on fuu gese gawri e gese cabiije naa? Yalla o waɗan faa laatoɗon hooreeɓe ujunaaje e hooreeɓe keme naa? 8 Ɗum waɗi de oɗon nyo'a kam naa? Fay gooto mooɗon hollaay kam ko ɓiyam waɗi amaana e ɓii Yesa. Fay gooto hakkunde mooɗon yurmataako kam. Fay gooto hollaay kam ko ɓiyam dawridi e maccuɗo am Daawda faa tuufina kam hono hannden. 9 Ndeen Do'ek jeyaaɗo leydi Edom oon wi'i:
— Mi yi'ii ɓii Yesa na wara to almaami bi'eteeɗo Ahimelek ɓii Ahituf wuro Nobi. 10 Ahimelek rookanii Daawda Joomiraaɗo. O hokki mo njooɓaari e kaafaahi Goliyat Filistiyankeejo.
11 Ndeen kaananke Sawulu nelani almaami Ahimelek ɓii Ahituf e suudu baabaaɓe mum fuu, ɓeen ngoni almaami'en wuro Nobi. Ɓe fuu ɓe ngari to makko. 12 Sawulu wi'i:
— Hettinda faa wooɗa ɓii Ahituf.
Ahimelek ɓii Ahituf jaabii, wi'i:
— Naam joomam.
13 Sawulu wi'i mo:
— Ko waɗi nyo'uɗaa kam, aan e ɓii Yesa? A hokkii mo buuru e kaafaahi. A rookanake mo Joomiraaɗo faa o muurtana kam o tuufinana kam hono hannden nii.
14 Ahimelek jaabii mo wi'i:
— Hakkunde maccuɓe maaɗa fuu moy woni koolniiɗo hono Daawda? Wo o eso maaɗa, wooɗi wo o hooreejo reenooɓe maa aan kaananke, wo o teddinaaɗo ley suudu maaɗa du. 15 Yalla hannden woni nde puɗɗumi rookanaade mo Joomiraaɗo naa? Wanaa goonga ɓadaaki! Taa pelaa kam miin maccuɗo maaɗa, taa pelaa fay gooto hakkunde suudu baabaaɓe am du, sabo miin maccuɗo maaɗa, mi faamaay fay huunde ley majjum ɗum fuu.
16 Ammaa kaananke wi'i:
— Sikke walaa a maayan Ahimelek, aan e suudu baabaaɓe maa fuu.
17 Ndeen kaananke yamiri reenooɓe baŋŋe muuɗum, wi'i:
— Kaawtanee almaami'en Joomiraaɗo ɓe, mbaree ɓe, sabo kamɓe du ɓe nanngundurii e Daawda junngo, ɓe paamii o doggii de ɓe kaalanaay kam.
Ammaa howruuɓe kaananke ɓeen njaɓaay yowude juuɗe muɓɓen e dow almaami'en Joomiraaɗo.
18 Jonle kaananke wi'i Do'ek Edominke oon:
— Ndelle aan kaa, haawtana almaami'en, waru ɗum'en.
Do'ek haawtanii ɓe, wari ɓe. Nyannde ndeen o warii worɓe capanɗe njeetato e njoyo ɓornaaɓe kaddule almaamaaku. 19 Katin du Sawulu watti kaafaahi e dow wuro Nobi, wuro almaami'en ngoon - worɓe e rewɓe, sukaaɓe ƴaakoy e keccoy, na'i e araaji e baali, fuu mbaraama.