No Yonatan walliri Daawda
20
1 Ndeen Daawda doggi dilli to wuro annabaaɓe wonngo Rama. O yehi to Yonatan, o ƴami ɗum, o wi'i:— Ɗume ngaɗumi? Ɗume woni boofi am, ɗume woni hakke am to bammaa faa o filoo warude kam?
2 Yonatan wi'i mo:
— Abada ɗum waɗataa! A maayataa. Hettinda, baabam waɗataa fay huunde yalla ko mawni naa ko famɗi si wanaa o haalana kam. Ko waɗi o suuɗa kam ɗum? Wanaa goonga.
3 Daawda hunake, wi'i:
— Bammaa na anndi faa wooɗi mi heɓii yardaa-muye e maaɗa. O yiɗaa faaminde ma ko o waɗata kam, sabo o anndii ɓernde maa mettan. Ammaa mi hunake hakkunde am e Joomiraaɗo buurɗo, wooɗi, hakkunde am e maaɗa du, taaɓannde wootere tan heddii hakkunde am e maayde.
4 Yonatan wi'i Daawda:
— Ko njiɗɗaa fuu, mi waɗante.
5 Daawda wi'i mo:
— Hettinda, jaango woni juulɗe daragol lewru, miɗo haani nyaamdude e kaananke. Ammaa accaa mi yoofee, mi suuɗowoo ley ngesa faa kiiral naange faɓɓi-jaango. 6 Si bammaa ƴamanii kam fu, a wi'an, «Daawda nyaagake kam e semmbe faa o haroo o yaha wuro makko Baytilaama, sabo hitaande fuu kirsamaari waɗete saabe saare maɓɓe fuu.» 7 Si o wi'ii, «Wooɗi» fu, nii paamirammi miin maccuɗo maaɗa mi hisii. Ammaa si o ɓernii fu, tennyoraa bonanda o anniyii. 8 Ndelle ngaɗanaa kam miin maccuɗo maaɗa hinney, sabo a haɓɓidi e am amaana yeeso Joomiraaɗo. De si miɗo woodi feloore fu, mbaraa kam aan e hoore maaɗa. Sabo ɗume yaarude kam yeeso bammaa nafata? 9 Yonatan wi'i:
— Abada ɗum waɗataa! Si mi faamii wo bonanda baabam anniyii e dow maaɗa fu, wanaa mi hollete ɗum naa?
10 Daawda ƴami Yonatan, wi'i:
— Si bammaa jaabake ma e tikkere fu, moy faaminta kam ɗum?
11 Yonatan wi'i Daawda:
— War, njehen ley ngesa.
Ɓe njehi ɓe ɗiɗo fuu ley ngesa.
12 Ndeen Yonatan wi'i Daawda:
— Joomiraaɗo Laamɗo Israa'iila laato ceedotooɗo, mi fonndan anniyaaji baabam jaango naa faɓɓi-jaango hono wakkati o. Si a heɓii yardaa-muye e makko fu, tennyoraa mi neldan kabaaru faa paamaa. 13 Ammaa si baabam muuyii torrude ma, de mi faaminaay ma, mi dillinaay ma faa kisaa fu, Joomiraaɗo hiitam kiite mawɗe. Joomiraaɗo wondu e maaɗa hono no o worrunoo e baabam! 14 Si miɗo wuuri fu, kollaa kam njinngu Joomiraaɗo koolniingu taa mi maaya. 15 Taa njoppaa njinngu maaɗa e suudu am faa abada, fay nde Joomiraaɗo taƴi wayɓe ma fuu e adunaaru ndu.
16 Nii Yonatan waɗiri amaana e suudu Daawda, ina wi'a du:
— Joomiraaɗo yomnitoo wayɓe Daawda.
17 Yonatan tilsinani Daawda hunoo e dow yigiraagu muɓɓen. Sabo Yonatan na yiɗi mo hono no yiɗiri hoore mum.
18 Ndeen Yonatan wi'i mo:
— Jaango wo juulɗe daragol lewru. Aan, a ƴamante sabo jooɗorgal maa nokku nyaamdu wo ɓolal. 19 Faɓɓi-jaango faro kiiral naange fu, njahaa nokkuure to cuuɗinoɗaa arande (nde ndoggunoɗaa suudu maa ndeen), ngona gaɗa hayre to Esel. 20 Mi fiɗan kure tati sera, hono ko fiɗetee woni toon. 21 Ndeen mi nelan suka gorko, mi wi'a ɗum yaha, filoo kure ɗeen.
Si mi wi'ii kure na ngoni yeeso makko, o yaha o wadda ɗe fu, ndeen ngaraa, sabo mi hunake Joomiraaɗo buurɗo, a heɓii jam, a hisi baasiiji fuu. 22 Ammaa si mi wi'ii mo kure ɗeen na ngoni faa caggal makko fu, ndeen sanaa ndillaa, sabo Joomiraaɗo neli ma ndillaa. 23 Dow amaana hakkunde meeɗen du, wo goonga, Joomiraaɗo wo ceedotooɗo hakkunde meeɗen faa abada.
24 Ndelle Daawda suuɗii ley ngesa.
Juulɗe daragol lewru ngari de kaananke jooɗii faa nyaama. 25 O jooɗorii no o woowri dow jooɗorgal keedungal senngo suudu. Yonatan na jooɗii yeeso makko, Abineer du na woni ɗakkol makko. Jooɗorgal Daawda ngaal kaa, wo ɓolal. 26 Sawulu du wi'aay faa'e nyannde ndeen sabo miilake wo baasi hewtii mo. Imo tennyori Daawda laaɓaay e jamirooje. 27 Ammaa jaango majjum, nyannde ɗiɗaɓerde ndeen du, jooɗorgal Daawda wo ɓolal. Sawulu wi'i Yonatan:
— Ko waɗi ɓii Yesa waraay nyaamdu keeŋan e hannden fuu?
28 Yonatan jaabii, wi'i:
— O nyaagake kam nyaagunde mawnde o yaha faa Baytilaama. 29 O ŋaarii kam, mi acca o yaha, sabo saare maɓɓe na woodi kirsamaari ley wuro maɓɓe. Mawniiko du yamirii mo o wara. Ndelle, si o heɓii yardaa-muye e am fu, o yaha o yi'a sakiraaɓe makko. Ɗum waɗi de o waraay to nyaamdu kaananke.
30 Ndeen Sawulu ɓernani Yonatan sanne, wi'i mo:
— Aan ɓii debbo bonɗo cattuɗo! Wanaa miɗo anndi a suɓake ɓii Yesa faa cemtinaa hoore maa, wooɗi cemtinaa inna maa du! 31 Si ɓii Yesa na wuuri ley adunaaru ndu, aan e laamu maaɗa fuu, on tabitataa. Ndelle nanngaa mo ngaddaa to am, sanaa o waree! 32 Yonatan jaabii bammum Sawulu, wi'i:
— Ko waɗi de o waree? Ɗume o waɗi?
33 Sawulu tippii mo labbo faa wara mo. Ndelle Yonatan faamii bammum na anniyii warude Daawda.
34 Yonatan ummodii e tikkere mawnde nokku nyaamdu. Nyalaande ɗiɗaɓerde lewru nduun Yonatan nyaamaay fey. Ɓernde muuɗum metti sanne saabe ko bammum semtini Daawda. 35 Beetee majjum Yonatan yehi faa hawra e Daawda nokku to ɓe kokkunduri, o yaadi e suka gorko. 36 O wi'i suka oon:
— Doggu pilanoɗaa kam kure ɗe piɗammi joonin ɗeen.
Nde suka oon doggunoo fu, o fiɗi kural caggal muuɗum. 37 Nde suka oon yottinoo to kural ngaal saami ɗoon ndeen, Yonatan ƴeewnii wi'i mo:
— Hara, taa ndaroɗaa.
Ndelle suka Yonatan hooƴi kural ngaal de yeccii to joomum. 39 Suka oon faamaay ko saawi ley haala kaan fey, Yonatan e Daawda tan paami ɗum. 40 Ndeen Yonatan hokki suka gorko oon kaɓitirɗe muuɗum de wi'i mo:
— Yahu, hooru ɗe wuro.
41 Caggal nde suka oon dillunoo ndeen, Daawda ummii gere hoorɗoore hayre nde, de sujidi yeeso Yonatan kile tati. Ɓe muccunduri, ɓe mboydi. Ammaa Daawda ɓuri woyude.
42 Yonatan wi'i Daawda:
— Yahu e jam, sabo en kunodake hakkunde men e dow innde Joomiraaɗo, en mbi'ii, «Joomiraaɗo wonu hakkunde meeɗen e hakkunde ƴuwdi am e ƴuwdi maaɗa faa abada.»